დანიელე დე როსის არჩევანი: "რომა" თუ "ინტერი"?

მიმდინარე სეზონის ბოლოს დანიელე დე როსის "რომასთან" ხელშეკრულების ვადა ეწურება. რომაული კლუბის მესვეურები 33 წლის ნახევარმცველისთვის ახალ კონტრაქტს ამზადებენ, რომელიც ერთწლიანი იქნება, გახანგრძლივების პერსპექტივით.

რომაული კლუბი დე როსის სეზონში 3 მილიონ ევროს ჰპირდება - საგულისხმოა, რომ მოქმედი ხელშეკრულებით, დანიელე წელიწადში 6 მილიონ ევროს იღებს და ერთ-ერთი ყველაზე მაღალანაზღაურებადი ფეხბურთელია იტალიაში.

ამასობაში, დე როსის გადაბირების სურვილი "ინტერმა" გამოთქვა - მილანური გრანდის მესვეურები გამოცდილ ნასევარმცველს 2-წლიან კონტრაქტს და სეზონში 4 მილიონ ევროს სთავაზობენ.

"ნერაძურის" წინადადება გაცილებით სარფიანია, მაგრამ თავად ფეხბურთელს "რომაში" სურს დარჩენა - მიმდინარე სეზონის ბოლოს ფრანჩესკო ტოტი, სავარაუდოდ, დაასრულებს კარიერას, გუნდის კაპიტანი კი დანიელე გახდება. ამ თემაზე დე როსიმ მოკლე კომენტარი გააკეთა:

"მთელი კარიერა "რომაში" გავატარე და მსურს, მშობლიურ გუნდში დავრჩე. ჩემთვის ფული არ არის მთავარი, თუმცა კლუბისგან პატივისცემას ველოდები. უახლოეს პერიოდში, შევხვდები კლუბის წარმომადგენლებს და იმედია, მარტივად მივაღწევთ შეთანხმებას. "ინტერის" შემოთავაზება? - სასიამოვნოა, რომ ჩემი გადაბირებით ევროპული გრანდები არიან დაინტერესებულნი".

ყოველდღიური სპორტული გაზეთი "ლელო"