..."ეს ძალიან მძიმე თამაში იყო. "გენგამს" კარგი ფეხბურთელები ჰყავს, ჩვენ კი მეორე გოლის შემდეგ საკუთარი თავის რწმენა დავკარგეთ. პსჟ-ს ახლა რთული დროება უდგას, თუმცა იმედი არ უნდა დავკარგოთ, რადგან წინ მთელი მეორე წრეა. დარწმუნებული ვარ, ჩვენ დავბრუნდებით პირველ საფეხურზე და ჩემპიონებიც გავხდებით. მატჩის შემდეგ უკვე ვესაუბრე კლუბის გენერალურ დირექტორსა და პრეზიდენტს - ისინი მხარს გვიჭერენ.
ასე რომ, ვაგრძელებთ მუშაობას", - ცოტა არ იყოს, დაბნეული ლაპარაკობდა უნაი ემერი "გენგამთან" შაბათის მატჩში დამარცხების (1:2) შემდეგ...
420 თუ 33,6?
..."გენგამს" ნამდვილად ჰყავს კარგი ფეხბურთელები, ნებისმიერ შემთხვევაში, უნაი ემერის სიტყვები, რომ მეორე გოლის შემდეგ მისმა გუნდმა საკუთარი თავის რწმენა დაკარგა, უცნაურად ჟღერს. შეიძლება ყველაფერი უიღბლობას გადააბრალო ან მსაჯობას, გნებავთ, მეტოქესაც, რომელიც მთელი გუნდით საკუთარ საჯარიმოში ჩაიკეტა, ან ცუდ გაზონს, სიცხეს, სიცივეს, დაღლილობას... მაგრამ ემერის არ აქვს წონადი არგუმენტი, თავი იმართლოს, მით უმეტეს, შიდაფრანგული დაპირისპირებებიდან გამომდინარე.
ყველაფერს რომ თავი დავანებოთ, პორტალ "ტრანსფერმარკტის" მონაცემებით, პსჟ-ის ფეხბურთელების საერთო ფასი 420 მილიონ ევროს შეადგენს, რაც დაახლოებით მესამედია ლიგა 1-ის ყველა ფეხბურთელის ჯამური ღირებულებისა.
შედარებისთვის, იმავე "გენგამის" ფეხბურთელების საერთო ფასი 33,6 მილიონი ევროა. ვთქვათ ისიც, რომ ზედიზედ ორი სეზონის განმავლობაში პსჟ სამივე ფრანგულ ტიტულს იგებდა...
ბლანის ნასუფრალზე...
ამ ტიტულებს კი ლორან ბლანმა მოუყარა თავი. ამ წლის თებერვალში პსჟ-მა 51 წლის სპეციალისტთან ახალი, 2-წლიანი კონტრაქტი გააფორმა, მაგრამ... 27 ივნისს მხარეებმა ხელშეკრულება ურთიერთშეთანხმების საფუძველზე გაწყვიტეს. როგორც მაშინ "ეკიპმა" დაწერა, ბლანმა კომპენსაციის სახით 22 მილიონი ევრო მიიღო...ბლანთან განშორება არ მომხდარა უმიზეზოდ - პარიზული გრანდის ყატარელ ბოსებს ძალიან არ ესიამოვნათ ჩემპიონთა ლიგის მეოთხედფინალიდან გავარდნა (პსჟ "მანჩესტერ სიტისთან" დამარცხდა). მიუხედავად იმისა, რომ გუნდს ქვეყნის შიგნით უკვე ყველაფერი მოგებული ჰქონდა, პრეზიდენტმა ნასერ ალ-ხელაიფიმ სეზონი ერთმნიშვნელოვნად წარუმატებლად შეაფასა.
ესეც სრულიად გასაგებია, რადგან პსჟ აღარ არის ადგილობრივი გაქანების გრანდი - ყატარული ინვესტიციები იმის წინაპირობა უნდა ყოფილიყო, რომ პსჟ-ს თუნდაც ჩემპიონთა ლიგის ფინალში ეთამაშა. თამასა ახლა ძალიან მაღლაა აწეული, ემერის კი არ აქვს უფლება, შინაურ ფრონტზე განცდილი ფიასკო თითიდან გამოწოვილი მიზეზით ახსნას...
მაგრამ ასეა თუ ისე, ამ თამასას ახლა სწორედ ემერი უნდა შესწვდეს. ყოველ შემთხვევაში, ამ დავალებით მიიყვანეს "სევილიიდან" პსჟ-ში 45 წლის სპეციალისტი, რომელმაც იცის, როგორ მოიგოს ევროთასები.
"შენ ერთ კლუბთან ერთად სამჯერ მოიგე ევროპალიგა და მე მინდა, იგივე გაიმეორო ჩემს კლუბში. მე კარგი გუნდი მყავს, მაგრამ ძალიან მინდა, ის კიდევ უფრო უკეთესი იყოს", - უთხრა ემერის ალ-ხელაიფიმ პირველივე შეხვედრის დროს.
ვინც გასახდელში ამინდს ქმნიდა...
იმისთვის, რომ პსჟ "უკეთესი" ყოფილიყო, ემერიმ "სევილიიდან" მისთვის კარგად ნაცნობი, პოლონელი ნახევარმცველი გჟეგოჟ კრიხოვიაკი (35 მილიონი ევრო), ხოლო "რეალიდან" ფორვარდი ხესე (25 მილიონი) აიყვანა. ამ დროისთვის, ორივემ 9-9 მატჩი ჩაატარა ლიგა 1-ში, ამასთან, ხესემ მხოლოდ ერთი გოლით გამოიჩინა თავი.მაგრამ ჩანს, პსჟ-სთვის აუნაზღაურებელი დანაკლისია ზლატან იბრაჰიმოვიჩისა და დავიდ ლუიზის წასვლა. ამ ორი ფეხბურთელის ფასი მხოლოდ მათი პროფესიული დონით არ განისაზღვრება - იბრაჰიმოვიჩიც და დავიდ ლუიზიც ქარიზმატული ფიგურები არიან. მათ მაღალ ავტორიტეტს შეუძლია, გასახდელში ამინდი შექმნას...
საბოლოოდ, პსჟ-მა ვერ მოძებნა ამ ორი ფეხბურთელის სრულფასოვანი ალტერნატივა. მაგრამ ესეც უნდა ითქვას - რომ არა კლუბის ხელმძღვანელობის სურვილი (ეკონომიკური ფაქტორი), არა გვგონია, ემერი საკუთარი ნებით შელეოდა იბრაჰიმოვიჩსა და დავიდ ლუიზს...
თუ ჩემპიონთა ლიგის მოგება გინდა...
მიუხედავად ამისა, პსჟ აქამდე თანაბრად და სტაბილურად მოდიოდა. ჩავარდნა მოხდა მხოლოდ დეკემბერში - მარცხი "მონპელიესა" (0:3) და "გენგამთან" (1:2), პლუს ამას, საშინაო ფრე (2:2) ლიდერ "ნიცასთან", რომელიც გაცილებით სახელოვან და მდიდარ მეტოქეზე უკეთ გამოიყურებოდა...იმავე "ნიცასთან" ჩამორჩენაც (გუშინდელ ტურამდე მესამე ადგილი და მინუს 7 ქულა) ნამდვილად არ არის კრიტიკული. გავიხსენოთ, რომ 2014/15 წლების სეზონშიც პსჟ ზამთრის პაუზაზე "მარსელთან" 3-ქულიანი დეფიციტით გავიდა, მაგრამ ბოლოს მაინც ჩემპიონი გახდა, თანაც - ვადამდე...
დეკემბერშივე იყო ძალზე უცნაური მატჩი ჩემპიონთა ლიგაშიც: ემერის შეგირდებმა "პარკ დე პრენსზე" ვერ დაამარცხეს (2:2) ბულგარეთის ჩემპიონი "ლუდოგორეცი" და ჯგუფში მეორე ადგილს დასჯერდნენ. ამას კი შედეგად მოჰყვა ის, რომ 1/8-ფინალში პსჟ წილისყრამ მთლად "ბარსელონას" გადაჰყარა. თუმცა ვერ ვიტყვით, რომ ჯგუფში პირველ ადგილზე გასვლა დიდი შვება იქნებოდა - "არსენალს", რომელმაც პარიზელებს გადაუსწრო, მეტოქედ "ბაიერნი" ერგო...
აბა, როგორ? - "ბარსელონა" იქნება თუ "ბაიერნი", თუ კლუბს ჩემპიონთა ლიგის მოგება აქვს მიზნად დასახული, ამ რანგის გრანდების დამარცხებაშიც უნდა გაიწაფოს...
უთანხმოება ვარსკვლავებთან
მაგრამ აქ პრობლემა არც წილისყრაშია. დაკვირვებული თვალისთვის შეუმჩნეველი არ დარჩენილა ის, რომ ემერიმ, თუ საბოლოოდ არ დაკარგა კონტროლი გასახდელზე, ყოველ შემთხვევაში, აშკარად გაიფუჭა ურთიერთობა ზოგიერთ წამყვან ფეხბურთელთან. ჯერ კიდევ ზაფხულში ზოგი მათგანი ჩიოდა ძალიან დიდ დატვირთვებზე... მაშინ ემერიმ ამის პასუხად თქვა (უფრო სწორად - აგრძნობინა), რომ არ შეუშლიდა ხელს გუნდის ერთ-ერთი მთავარი ფიგურის, საფრანგეთის ნაკრების ნახევარმცველ ბლეზ მატუიდის წასვლას.
"ის ძალიან კარგი მოთამაშეა, მაგრამ ჩვენ რამდენიმე ცაცია ნახევარმცველი გყავს - რაბიო, ტიაგო მოტა... თუ მატუიდის აქვს მიწვევები სხვა გუნდებისგან, ან ის ჩათვლის, რომ გუნდში დიდი კონკურენციაა, მაშინ... ისე, არ მინდა, რომ წავიდეს", - თქვა მაშინ ემერიმ.
მატუიდი დარჩა, თუმცა ოქტომბერში გაჩნდა ინფორმაცია მწვრთნელსა და მარკო ვერატის შორის კონფლიქტზე, რაც დღემდე აქტუალურია და იტალიელ ნახევარმცველს სამშობლოში დაბრუნებასაც უწინასწარმეტყველებენ.
მთელი 65 პროცენტი...
მწვრთნელის მუშაობით უკმაყოფილონი არიან ფანებიც. "ეკიპის" გამოკითხვის თანახმად, გულშემატკივართა მთელი 65 პროცენტი ემერის გადადგომას ემხრობა და უკვე ლაპარაკია მის სავარაუდო შემცვლელებზეც - ლუი ვან გაალსა და რობერტო მანჩინიზე.იქნებ აქედან მოდის კიდეც ემერის ჩივილი საკუთარ თავში რწმენის დეფიციტზე? ფეხბურთელებიც ხომ ხედავენ, რაც ხდება მწვრთნელის თავს? ზაფხულში ალ-ხელაიფი ურჩევდა ყველას, რომ მოთმინებით აღიჭურვონ და დაელოდონ შედეგს.
საინტერესოა, თავად სადამდე გაუძლებთ მოთმინების ძაფი ყატარელ ბოსებს? ზოგიერთი ვერსიით, ემერის ვერ უშველის გამარჯვებების სერიაც კი და არც 10 მილიონი ევროს კომპენსაცია იქნება ძნელად გასასტუმრებელი...
ემერიმ, ჯერჯერობით, ვერსად გამოიჩინა თავი, ესპანეთის გარდა. ვნახოთ, დარჩება ის ადგილობრივი მასშტაბის სპეციალისტად თუ?..
ყოველდღიური სპორტული გაზეთი "ლელო"
