ბრაზილიის ჩემპიონატის მე-9 ტურში რამდენიმე მნიშვნელოვანი დერბი გაიმართა და პირველობის ლიდერი კიდევ ერთხელ შეიცვალა...ბელუ ორიზონტის დერბი
ჩემპიონატის ერთ-ერთმა ფავორიტმა "კრუზეირომ", ლიბერტადორესის თასის ახალ გამარჯვებულ "ატლეტიკო მინეიროს" უმასპინძლა.
მიუხედავად იმისა, რომ აღნიშნული დაპირისპირება ბელუ ორიზონტის დერბი გახლავთ, სტუმართა დამრიგებელმა კუკამ პრაქტიკულად მეორე შემადგენლობა ათამაშა - "ატლეტიკოს" რონალდინიო, ბერნარდი, ჟო, მეკარე ვიქტორი, რევერი, ლიბერტადორესის თასის ფინალის ერთ-ერთი გმირი ლეონარდო სილვა, ჟოსუე და დიეგო ტარდელი არ ჰყავდა. ამ ყველაფრის გათვალისწინებით, ნამდვილად არაა გასაკვირი, რომ ბრაზილიის ჩემპიონატების ისტორიაში 57-ე დერბი "სამხრეთის ვარსკვლავის" დამაჯერებელი
სერიოზული დანაკლისის მიუხედავად, ანგარიში "მამლებმა" გახსნეს - ალეკსანდრომ 11-მეტრიანი გამოიყენა და სტუმრები დააწინაურა, თუმცა ამის შემდეგ თამაშს "კრუზეირო" აკონტროლებდა. შეხვედრის გმირები 22 წლის როკარდო გულარტი და 24 წლის ევერტონ რიბეირო გახდნენ - პირველმა დუბლი შეასრულა, ევერტონმა კი გოლს ერთი საგოლე პასი დაუმატა. კიდევ ერთი ბურთი "ვასკოდან" გადასული ნილტონის ანგარიშზეა. საბოლოოდ, 4:1 და მასპინძლები "ატლეტიკოსთან" ურთიერთშეხვედრებში დაწინაურდნენ: 20 მოგება 19-ის წინააღმდეგ (18 თამაში ფრედ დასრულდა). აღსანიშნავია, რომ ბოლო 15 დაპირისპირებიდან, "კრუზეირომ" თანაქალაქელს მე-11 მატჩი მოუგო (1 ფრე და 3 წაგება).
სამწუხაროდ, ყველა ტურნირზე ჩატარებული მატჩების ზუსტი სტატისტიკა არ არსებობს, რადგან ორივე გუნდს საკუთარი ვერსია აქვს და სპეციალისტები თუ ისტორიკოსები დღემდე ვერ შეთანხმებულან, რომელი ვერსიაა უფრო სანდო...
სენსაცია რესიფეში
4-მატჩიანი წაგება სერია დაასრულა "ნაუტიკომ" და თავის მხრივ, 4-მატჩიანი მოგებათა სერია შეუწყვიტა "ინტერნასიონალს", რომელიც ამ მარცხის გამო მეორე ადგილზე ჩამოქვეითდა.
მასპინძლებმა ჩემპიონატში სულ მეორე, შინ კი საერთოდ პირველი გამარჯვება მოიპოვეს, არადა შარშან "ნაუტიკო" საკუთარ მოედანზე უძლეველი იყო და არავის ახარებდა. "ინტერს" რამდენიმე ლიდერი (დალესანდრო, დამიაო) არ ჰყავდა, მაგრამ ასეთ მარცხს მაინც ვერავინ იწინასწარმეტყველებდა. სტუმრები დიდ უპირატესობას ფლობდნენ, მაგრამ დიეგო ფორლანი, ჟორჟე ენრიკე და რაფაელ მოურა საგოლე მომენტებს ვერ იყენებდნენ, რისთვისაც 73-ე წუთზე ისინი დერლეიმ დასაჯა და ანგარიში გახსნა. შესანიშნავი მატჩი ჩაატარა "პალმეირასის" ყოფილმა ფეხბურთელმა მაიკონ ლეიტემ, ვისაც ახალ გუნდში დებიუტი ჰქონდა - "ნაუტიკოს" ფორვარდმა 89-ე წუთზე თავად გაიტანა, არბიტრის მიერ დამატებულ პირველ წუთზე კი როჟერიოს საგოლე გადაცემა გაუკეთა.
"ნაუტიკომ" ჩემპიონატი ძალიან ცუდად დაიწყო, მაგრამ ივნის-ივლისში გუნდი რამდენიმე კარგი ფეხბურთელით გაძლიერდა. რესიფეს კლუბში მაიკონ ლეიტე, ტიაგო რეალი, ლეანდრო ამარო (სამივე "პალმეირასი"), ურუგვაელი ხუან ოლივეირა ("პენიაროლი"), ვენესუელელი ანხელო პენია ("კარაკასი"), "ტიგრეს" ყოფილი ლიდერი არგენტინელი დიეგო მორალესი ("ალ აჰლი") და მეკარე რიკარდო ბერნა ("ფლუმინენსე) გადავიდნენ.
სან პაულოს დერბი
"კორინთიანსის" და "სან პაულოს" 250-ე დაპირისპირება ფრედ, 0:0 დასრულდა. საინტერესოა, რომ ბრაზილიის ჩემპიონატში "ტიმაო" მეტოქეს უკვე 4 მატჩია ვერ ამარცხებს, მაგრამ ურთიერთშეხვედრებში მაინც დამაჯერებლად ლიდერობს: 22 მოგება 13-ის წინააღმდეგ ჩემპიონატში (20 ფრე) და 88 მოგება 79-ის წინააღმდეგ ყველა ტურნირზე (83 ფრე).
"სან პაულოს" ყველა ტურნიზე უკვე 11 თამაშია (!) არ მოუგია, კონკრეტულად სერია A-ში კი ბრაზილიის 6-გზის ჩემპიონის წატუმატებელი სერია 9 მატჩია გრძელდება, თანაც პაულო აუტუორის გუნდმა ამ 9 შეხვედრაში მხოლოდ 4 გოლი გაიტანა.
ბოლო სამ კვირაში ეს გუნდები ერთმანეთს მესამედ შეხვდნენ - რეკოპა სუდამერიკანაზე ორივე მატჩი "კორინთიანსმა" მოიგო, ამჯერად კი "ტიმაომ" ლუიშ ფაბიანოს გარეშე მოთამაშე "სან პაულო" ვერ გატეხა და როჟერიო სენიმ კარი მშრალად შეინახა.
"კორინთიანსი" მე-11 პოზიციაზეა, "სან პაულო" კი გასავარდნ ზონაში, მე-18 ადგილზე იმყოფება და რაც უფრო მთავარია, აგვისტოში გასამართი კომერციული ამხანაგური შეხვედრების გამო, კლუბს უკვე 11 მატჩი აქვს ჩატარებული.
აბელ ბრაგა მძიმე მდგომარეობაშია
საშინელ ფორმაშია ბრაზილიის მოქმედი ჩემპიონი "ფლუმინენსე" - აბელ ბრაგას სამწყსომ ზედიზედ მე-5 მატჩი წააგო და გასავარდნ ზონაში ჩაეშვა. მორიგი მარცხი "ფლუმ" "გრემიოსთან" განიცადა, რომელიც, თავის მხრივ, გამოცოცხლა და ჩაგდებული სტარტის შემდეგ, სატურნირო ცხრილში ზევით მიიწევს. მასპინძლები კრისტიან რივეროსმა დააწინაურა, რომელიც "გრემიოს" რიგებში სადებიუტო მატჩს ატარებდა - შოთა არველაძის ყოფილმა შეგირდმა ("ქაისერისპორში") ანგარიში 51-ე წუთზე გახსნა, მეორე ბურთი კი კლებერის ანგარიშზეა.
ბრაზილიურ პრესაში აბელ ბრაგას შესაძლო გადაყენებაზე ალაპარაკდნენ, მაგრამ "ფლუს" დამრიგებელი მშვიდად არის და აცხადებს, რომ მას ჯერ არაფერი ემუქრება და მიუხედავად მძიმე მდგომარეობისა, კლუბის ხელმძღვანელობა ბოლომდე ენდობა. მომდევნო ტურში "ფლუმინენსე" "კრუზიეროს" მასპინძლობს და თუ ჩემპიონატის ლიდერთანაც დამარცხა, ბრაზილიის 2012 წლის საუკეთესო მწვრთნელს ვერაფერი იხსნის.
რიოს დერბი
ლიდერობის დაბრუნებასთან ახლოს იყო "ბოტაფოგო", რომელიც სტუმრად "ფლამენგოს" რაფაელ მარკეშის (ფორვარდი, "ატლეტიკო მინეროს" მცველში არ აგერიოთ) გოლით ამარცხებდა, მაგრამ მასპინძლები მადრიდის "ატლეტიკოს" ყოფილმა ფეხბურთელმა ელიასმა იხსნა, ვინც ანგარიში 95-ე წუთზე გაათანაბრა.
ელიას გოლის წყალობით გაგრძელდა სერია, რომლის დროსაც "ფოგო" "ფლას" ვერ ამარცხებს - უკანასკნელად, ბრაზილიის ჩემპიონატში, "ბოტაფოგომ" მეტოქეს 2 000 წელს მოუგო. იქიდან მოყოლებული "ფლამ" 8 მატჩში იმარჯვა, 13 შეხვედრა კი ფრედ დასრულდა. შესაბამისად, ურთიერთშეხვედრებში "ფლამენგოს" შთამბეჭდავი უპირატესობა აქვს: 18 მოგება, 25 ფრე და 9 წაგება. ამდენი ფრე გასაკვირი არაა, რადგან გუნდებმა საყაიმო ანგარიშით ბოლო 6 შეხვედრა დაასრულეს.
რაც შეეხება "ფლამენგოს" მოედანზე გამართულ მატჩებს: "ბოტაფოგოს" სტუმრად სულ ერთხელ, 1995 წელს აქვს მოგებული, დანარჩენი 27 მატჩიდან 11 "ფლამ" მოიგო, 16 კი ფრედ დასრულდა. ზოგადად კი ეს ამ გუნდების 298-ე დაპირისპირება იყო და ისტორიაში 99-ე ფრე დაფიქსირდა (107 მატჩი "ფლამ" მოიგო, 92 "ბოტაფოგომ").
ალექსი და მაქსი
მორიგი გოლები გაიტანეს ალექსმა და მაქსი ბიანკუჩიმ, მათი გუნდების შეხვედრა კი ფრედ, 1:1 დასრულდა. "კორიტიბა" ერთადერთი დაუმარცხებელი გუნდია, "ვიტორია" კი 15 ქულით მე-6 ადგილზეა, რაც ამ კლუბისთვის საკმაოდ კარგი შედეგია.
ვეტერანმა ნახევარმცველმა უკვე მე-5 გოლი გაიტანა და დიეგო ფორლანს წამოეწია, ლეო მესის ბიძაშვილი კი 7 გოლით საუკეთესო ბომბარდირია.
ზედიზედ მეორე მატჩი მოიგო "ვასკო და გამამ" და კვლავ გაიტანა ჟუნინიო პერნამბუკანომ, ვინც ბრაზილიაში დაბრუნების შემდეგ მხოლოდ მეორე მატჩს ატარებდა. წინა ტურში, 38 წლის ნახევარმცველმა "ფლუმინენსეს" კარი აიღო, ამჯერად კი მან "კრისიუმას" გაუტანა. ნამდვილად არ გაგიკვირდებათ თუ გეტყვით, რომ ორივე ბურთი ჟუნინიომ ჯარიმიდან გაიტანა.
სერია A. IX ტური
ვასკო-კრისიუმა 3:2
გოლები: 1:0 ჟუნინიო პერნამბუკანო (9), 2:0 რაფაელ ვასი (55), 2:1 ივო (62), 2:2 ველინგტონ პაულისტა (72), 3:2 ედმილსონი (73)
პორტუგეზა-ატლ. პარანაენსე 2:3
გოლები: 0:1 მანოელი (8), 1:1 მოიზეს მოურა (12), 2:1 ჟილბერტო (22-პენ), 2:2 გილერმე დელატორე (64), 2:3 ლეო (90)
გაძევება: სოუზა (51. პორტუგეზა)
პონტე პრეტა-სანტოსი 1:0
გოლი: 1:0 რილდო (50)
გრემიო-ფლუმინენსე 2:0
გოლები: 1:0 რივეროსი (51), 2:0 კლებერი (85)
ნაუტიკო-ინტერნასიონალი 3:0
გოლები: 1:0 დერლეი (73), 2:0 მაიკონ ლეიტე (89), 3:0 როჟერიო (90)
კრუზეირო-ატლ. მინეირო 4:1
გოლები: 0:1 ალეკსანდრო (18-პენ), 1:1 ევერტონ რიბეირო (32), 2:1 რიკარდო გულარტი (44), 3:1 ნილტონი (53), 4:1 რიკარდო გულარტი (58)
ფლამენგო-ბოტაფოგო 1:1
გოლები: 0:1 რაფაელ მარკეში (22), 1:1 ელიასი (90)
ბაია-გოაისი 2:1
გოლები: 1:0 მარკინიოს გაბრიელი (2), 2:0 მარკინიოს გაბრიელი (33), 2:1 ტიაგო მენდეში (35)
კორიტიბა-ვიტორია 1:1
გოლები: 0:1 ბიანკუჩი (9), 1:1 ალექსი (45)
კორინთიანსი-სან პაულო 0:0
სატურნირო მდგომარეობა
ბომბარდირები: 7 - ბიანკუჩი (ვიტორია); 5 - ალექსი (კორიტიბა), ფორლანი (ინტერნასიონალი).
ყოველდღიური სპორტული გაზეთი "ლელო"
ასევე იხილეთ:
ბრაზილია. სერია A. VIII ტური: ვეტერანების ტური
