ბრაზილია. სერია A. ბოლო ტური: როგორ გადარჩა "პალმეირასი"

ბრაზილიის ჩემპიონატის ბოლო ტურისთვის ინტრიგა ცხრილის ქვედა ნაწილშიღა იყო დარჩენილი და ის ბოლო წამებამდე შენარჩუნდა. უკვე გავარდნილ "კრისიუმასა" და "ბოტაფოგოს" კიდევ ორი გუნდი უნდა შეერთებოდა, კანდიდატი კი სამი იყო - "პალმეირასი", "ვიტორია" და "ბაია".

"პალმეირასმა" არცთუ დიდი ხნის წინ ჭამა სირცხვილი, როდესაც დაქვეითდა და ახლაც იგივე ემუქრებოდა, გუნდი ბოლო ტურს მიჯრით 5 წაგებით შეხვდა და მარცხდებოდა "ატლეტიკო პარანაენსესთანაც", მაგრამ "მწვანეებს" მათმა ლიდერმა და გოლეადორმა ენრიკემ უშველა და გაათანაბრა. თუმცა, ვერც ენრიკე და ვერც ვერავინ სხვა ვერ უშველიდა მათ, კონკურენტს რომ ეყოჩაღა. "პალმეირასმა" ბეწვის ხიდზე გაიარა და ძალიან გაუმართლა, რომ გავარდნას გადაურჩა.

საქმე ის არის, რომ "ვიტორიასა" და "სანტოსის" შეხვედრაში ბოლო წამებამდე 0:0 იყო. მასპინძლების ერთი გოლი კი მათ ადგილს შეუნარჩუნებდა და "პალმეირასი" გავარდებოდა. გოლი გავიდა, 94-ე წუთზე, მაგრამ "ვიტორიას" კარში, წინგაქცეულ სალვადორელებს ტიაგო რიბეირომ გაუტანა და სანტოსელებმა არაფრისმომცემი 3 ქულა მოიპოვეს.

"ვიტორიას" მიჰყვა ასევე სალვადორული "ბაია", რომელიც 2:0-ს კი უგებდა "კურიტიბას", მაგრამ საბოლოოდ წააგო. გადამწყვეტი 85-ე წუთზე გაშვებული ბურთი გახლდათ, "ბაია" გატყდა და ბოლოს მესამე ბურთიც მიიღო. თუმცა ამას გადამწყვეტი მნიშვნელობა აღარ ჰქონია, რადგან "ბაიას" რომც მოეგო და ქულებით "პალმეირასს" გათანაბრებოდა, მაინც გავარდებოდა, რადგან "მწვანეებს" ერთი მატჩით მეტი გამოსდიოდათ მოგებული, რაც ბრაზილიაში თანაბარქულიანობისას პირველი კრიტერიუმია.

ბარემ ვთქვათ ისიც, რომ უმაღლესი ლიგის საგზური მოიპოვეს "ჟოინვილმა", "პონტე პრეტამ", რაც მთავარია, "ვასკო და გამამ" და "ავაიმ", რომელსაც ბევრი ეცილებოდა, მაგრამ "ავაიმ" ბოლო ტურის მატჩი სწორედ "ვასკო და გამასთან" მოიგო და მე-4 ადგილი შეინარჩუნა.

სერია A-ს თუ დავუბრუნდებით, ვიტყვით, რომ ზედიზედ ორგზის ჩემპიონმა "კრუზეირომ" მოგებით დაასრულა პირველობა. მარსელო ოლივეირას გუნდი "ფლუმინენსესთან" აგებდა, მაგრამ მატჩი მოაბრუნა. კიდევ ერთი საგოლე პასი გააკეთა ევერტონ რიბეირომ, რომელიც 11 გადაცემით, ჩემპიონატის საუკეთესო ასისტენტად მოგვევლინა. ხოლო "ფლუს" მხრიდან გოლი ფრედმა შეაგდო და 18 ბურთით ბომბარდირი გახდა. მან ორით გაასწრო უახლოეს მდევარს, "პალმეირასის" ენრიკეს. სწორედ ამის მერე მოდიან "კრუზეიროს" ფორვარდები 15-15 გოლით - რიკარდო გულარტი და მარსელო მორენო.

"სან პაულუს" მეორე ადგილი გარანტირებული ჰქონდა და "რესიფესთან" წააგო, ხოლო "ინტერნასიონალმა" "ფიგეირენსესთან" საგარეო გამარჯვებით გაინაღდა მესამე პოზიცია და "კორინთიანსი", რომელმაც "კრისიუმას" აჯობა, მეოთხეზე დატოვა, რაც იმას ნიშნავს, რომ "კორინთიანსს" ლიბერტადორესის თასის საკვალიფიკაციო ეტაპზე მოუწევს თამაში და არა პირდაპირ ფინალურ ეტაპზე.

საინტერესოა, რომ "ფიგეირენსე"-"ინტერნასიონალის" მატჩში არბიტრმა მარიელსონ ალვეშ სილვამ ფეხბურთელებს 5 წითელი ბარათი უჩვენა - 3 მასპინძლებს და 2 სტუმრებს. თან 4 აქედან პირდაპირ წითელი ბარათი იყო. მატჩი ძალიან დაძაბული გამოვიდა და ბოლოსკენ ფეხბურთელებმა იჩხუბეს და იუხეშეს. "ფიგეირენსე" 87-ე წუთამდე იგებდა, მაგრამ უკანასკნელ წუთებში ორი გოლი გაუშვა.

სერია A. ბოლო ტური
კორინთიანსი-კრისიუმა 2:1
გოლები: 1:0 ელიასი (26), 1:1 როჟერი (61), 2:1 ფაბიო სანტოსი (72)

ფიგეირენსე-ინტერნასიონალი 1:2
გოლები: 1:0 პაბლო (50), 1:1 რაფაელ მოურა (87), 1:2 ველინგტონ სილვა (90+5)
გაძევება: ფრანსა (77. ფიგეირენსე), ალან რუშელი (88. ინტერნასიონალი), ნირლეი (90+3. ფიგეირენსე), ველინგტონ პაულისტა (90+3. ინტერნასიონალი), ტიაგო ელენო (90+5. ინტერნასიონალი)

ბოტაფოგო-ატლეტიკო მნ. 0:0

რესიფე-სან პაულუ 1:0
გოლი: 1:0 ჟოელინტონი (4)

პალმეირასი-ატლეტიკო პრ. 1:1
გოლები: 0:1 პოტიგუარი (10), 1:1 ენრიკე (19-პენ.)

კურიტიბა-ბაია 3:2
გოლები: 0:1 ენრიკე (14), 0:2 რომულო (26), 1:2 ზე ედუარდო (35), 2:2 დუდუ (85), 3:2 კეირისონი (90+5)

კრუზეირო-ფლუმინენსე 2:1
გოლები: 0:1 ფრედი (34), 1:1 ნილტონი (45), 2:1 მორენო (59)

ვიტორია-სანტოსი 0:1
გოლი: 0:1 ტიაგო რიბეირო (90+4)

გრემიო-ფლამენგო 1:1
გოლები: 0:1 ლუის ადრიანო (32), 1:1 ლუანი (58)
გაძევება: სეზარი (58. ფლამენგო)

გოიასი-შაპეკოენსე 4:2
გოლები: 1:0 ერიკი (15), 1:1 აბუდა (28), 2:1 ველინტონი (41), 3:1 დავიდი (60), 3:2 ბრუნო რანხელი (64), 4:2 ერიკი (90)

თ მ ფ წ ბ ქ
1. კრუზეირო 38 24 8 6 67-38 80
2. სან პაულუ 38 20 10 8 59-40 70
3. ინტერნასიონალი 38 21 6 11 53-41 69
4. კორინთიანსი 38 19 12 7 49-31 69
5. ატლეტიკო მნ. 38 17 11 10 51-38 62
6. ფლუმინენსე 38 17 10 11 61-42 61
7. გრემიო 38 17 10 11 36-24 61
8. ატლეტიკო პრ. 38 15 9 14 43-42 54
9. სანტოსი 38 15 8 15 42-35 53
10. ფლამენგო 38 14 10 14 46-47 52
11. რესიფე 38 14 10 14 36-46 52
12. გოიასი 38 13 8 17 38-40 47
13. ფიგეირენსე 38 13 8 17 37-47 47
14. კურიტიბა 38 12 11 15 42-45 47
15. შაპეკოენსე 38 11 10 17 39-44 43
16. პალმეირასი 38 11 7 20 34-59 40
17. ვიტორია 38 10 8 20 37-54 38
18. ბაია 38 9 10 19 31-43 37
19. ბოტაფოგო 38 9 7 22 31-48 34
20. კრისიუმა 38 7 11 20 28-56 32

ბომბარდირები:
18 - ფრედი (ფლუმინენსე)
16 - ენრიკე (პალმეირასი)
15 - რიკარდო გულარტი (კრუზეირო)
15 - მარსელო მორენო (კრუზეირო)
14 - ერნან ბარკოსი (გრემიო)

მეპასეები:
11 - ევერტონ რიბეირო (კრუზეირო)
9 - დარიო კონკა (ფლუმინენსე)
9 - ანდრეს დ’ასლესანდრო (ინტერნასიონალი)
9 - ხესუს ალბერტო დატოლო (ატლეტიკო მინეირო)

ყოველდღიური სპორტული გაზეთი "ლელო"