ფინალური კვარტეტი: იტალია, ნორვეგია, ესპანეთი, ჰოლანდია

11 ივნისს ისრაელში, ევროპის 21-წლამდელთა ჩემპიონატზე ორი შეხვედრა გაიმართა, რომელთაგან ერთი მეორეზე მეტ ყურადღებას წმინდა სატურნირო ინტრიგის გამო იქცევდა.

ცენტრალურ დაპირისპირებაში ნორვეგიელებს სამი წუთი დააკლდათ ფავორიტი იტალიელების დასამარცხებლად. პირობითი სტუმრები თამაშს 90 წუთის განმავლობაში აკონტროლებდნენ, მაგრამ სკანდინავიელთა კარის ასაღებად ყოველთვის რაღაც აკლდებოდათ.

ნორვეგიელებმა ანგარიში უკანასკნელ წუთზე საეჭვო პენალტით გახსნეს, თუმცა მსაჯის მიერ კომპენსირებულ უკანასკნელ წუთზე იქამდე დამაჯერებლად მოთამაშე არილდ ესტბე გამოსვლაზე შეცდა. ბურთი კარისკენ ზურგით მდგარ ანდრეა ბერტოლაცის მიუვიდა, ვინც ულამაზესი დარტყმით საკუთარ გუნდს ქულა და ჯგუფის გამარჯვებულის სახელი მოუტანა.

მატჩის დასრულების შემდეგ ორივე გუნდის მთავარი მწვრთნელები მეტ-ნაკლებად კმაყოფილნი იყვნენ. ტორ ელე სკელერუდის თქმით:

"ნახევარფინალისთვის მოსამზადებლად მეტოქეზე 24 საათით მეტი გვაქვს და იმედია, ეს ფაქტორი წაგვადგება. ჩვენს წარმატებაში ფეხბურთელებმა თანაბარი წილი დაიდეს. წინ მნიშვნელოვანი შეხვედრა გველის, სადაც ძირითადი შემადგენლობის არჩევა ერთობ რთული, მაგრამ ამასთან, სასიამოვნო პროცესი იქნება".

ნორვეგიელთა კაპიტანმა სტეფან სანდბერგმა კი დაამატა: "გულსატკენი იყო ბოლო წამებზე იტალიასთან გამარჯვების ხელიდან გაშვება, თუმცა მთავარია, რომ პლეი ოფში გავედით. ახლა ყოველმა ჩვენგანმა ეროვნულ გუნდს ერთგულება უნდა დაუმტკიცოს. ამ ეტაპზე უკან დახევის უფლება უკვე აღარ გვაქვს".

პლეი ოფის მატჩებზე ფიქრობს უკვე იტალიის თავკაცი დევის მანჯაც: "ესპანეთს შესანიშნავი გუნდი ჰყავს, რომელმაც წინა ევროპის ჩემპიონატი მოიგო. ჩვენ მას შარშან ნოემბერში შევხვდით. მართალია, მას მერე დიდი ხანი გავიდა, მაგრამ გარკვეული წარმოდგენა ნამდვილად გვაქვს".

დაბოლოს, ინგლისის ნაკრებზეც ვთქვათ ორიოდე სიტყვა, რომლის მთავარი მწვრთნელი სტიუარტ პირსი ჩემპიონატის დაწყებამდე მის მოგებაზე ოცნებობდა. საქმე საქმეზე რომ მიდგა, ახალგაზრდა "სამმა ლომმა" სამივე შეხვედრა დათმო. მეტოქეებმა შეხვედრის განმავლობაში რამდენიმე სახიფათო მომენტი შექმნეს. ხშირი იყო შორიდან დარტყმები. ერთ-ერთი ასეთი შორიდან გასროლის შემდეგ ბურთი ჯეისონ სტილის კარში გაეხვია.

"ჩემპიონატზე სამჯერ გვცემეს. ფეხბურთელებს უნდა ესმოდეთ, რომ მათი დაცვის სურვილი აღარ მაქვს. ელემენტარულად, ამის საფუძველსაც კი არ მაძლევენ. ახლა ისინი უნდა იდგნენ ჩემს ადგილას და პასუხობდნენ შეკითხვას, თუ რატომ იყო თითოეული მათგანის მოქმედება ასეთი არაეფექტური. ბოლო წლების განმავლობაში ჩვენ გარკვეული სტანდარტი დავამკვიდრეთ, რომლისგანაც დღეს ძალიან შორს ვიყავით," - განაცხადა სტიუარტ პირსმა.

რუსეთმა და გერმანიამ ერთმანეთს კარისკენ თუ კარში უხვად ურტყეს. ჩრდილოელებმა თამაშის მიწურულს ბაუმანის კარის ძელსაც გაარტყეს. მათდა სასახელოდ უნდა ითქვას, რომ ჯერ კიდევ პირველი ტაიმიდან კაცნაკლულნი თამაშობდნენ, მაგრამ დანებება წამითაც არ უფიქრიათ. საბოლოო ჯამში რაინერ ადრიონის გუნდმა იმარჯვა, თუმცა კი დიდი წვალებით.

აი, ჰოლანდიელებმა კი ძირითადი გუნდი "გადამალეს" და "ფურია როხას" სათადარიგო შემადგენლობა დაუპირისპირეს. გაამართლებს თუ არა კორნელიუს პოტის ჩანაფიქრი, ამას 15 ივნისს იტალიის წინააღმდეგ ვნახავთ. მეორე 1/2-ფინალურ წყვილში კი, ვფიქრობთ, ფავორიტი გამოკვეთილია.

A ჯგუფი

ისრაელი-ინგლისი 1:0
გოლი: 1:0 კრიაფი (80)
ისრაელი (4-2-3-1): კლეიმანი - ვერტა, ბენ ჰარუში, ვააბა, დავიდაძე - ბიტონი, კრიაფი - ზაგური, დაბური (55. ალტმანი), სალალიკჰი (87. აზამი) - ტურგემანი (63. ბარუჩი)
ინგლისი (4-2-3-1): სტილი - კლაინი, უისდომი, ლისი, როუზი - ჩალობა (78. სორდელი), მაკეხრანი (71. რედმონდი) - ზაჰა, შელვი, ინსი (46. ჰენდერსონი) - უიკჰემი

ნორვეგია-იტალია 1:1
გოლები: 1:0 სტანდბერგი (90-პენ), 1:1 ბერტოლაჩი (90+4)
ნორვეგია (4-3-3): ესტბე - ლინესი, როგნე (54. სტანდბერგი), ნორდვეიტი, ჰედენსტადი - ბერიშა, ჰენრიკსენი, კონრადსენი - ნილსენი (60. კასტრატი), კინგი (74. იბრაჰიმი), დე ლანლაი
იტალია (4-4-2): ბარდი - დონატე, კაპუანო, კალდიროლა, რეჯინი - კრიმი, როსი (61. ფლორენცი), სანსონე, საპონარა (46. ბერტოლაცი) - პალოსკი, დესტრო (72. გაბიადინი)

თ მ ფ წ ბ ქ
1. იტალია 3 2 1 0 6-1 7
2. ნორვეგია 3 1 2 0 6-4 5
3. ისრაელი 3 1 1 1 3-6 4
4. ინგლისი 3 0 0 3 1-5 0

B ჯგუფი

რუსეთი-გერმანია 1:2
გოლები: 1:0 ძაგოევი (22), 1:1 ჰერმანი (34), 1:2 რუდი (69-პენ)
რუსეთი (4-2-3-1): ფილცოვი – ცალაგოვი, ბურლაკი, ბელიაევი, შენიკოვი – პეტროვი, ემელიანოვი (43. შატოვი) – ჩერიშევი (77. სმოლოვი), ძაგოევი, ბიბილოვი – გრიგორიევი (48. იაკოვლევი)
გერმანია (4-1-2-3): ბაუმანი – იანჩკე, სობიხი, მუსტაფი, თესკერი – გინტერი – როდე (70. ფუნკი), ჰოლტბი (46. რუდი) – ჰერმანი, ფოლანდი, კლემენსი (46. პოლტერი)

ესპანეთი-ჰოლანდია 3:0
გოლები: 1:0 მორატა (26), 2:0 ისკო (32), 3:0 ვასკესი (90)
ესპანეთი (4-3-2-1): დე ხეა – კარვახალი, ა. გონსალესი, ი. მარტინესი, მონრეალი – მუნიაინი, კამაჩო (52. ილიარამენდი), სარაბია – ტ. ალკანტარა (79. მუნიესა), ისკო (62. ა. ვასკესი) - მორატა
ჰოლანდია (4-3-3): ბიზოტი – ლეერდამი, ვან დერ ჰოორნი, ნუიტინკი, ვან აანჰოლტი – კლასი, ფერი, ვილიენა (71. მაჰერი) – იოზეფსონი, ჰუსენი, დეპაი

თ მ ფ წ ბ ქ
1. ესპანეთი 3 3 0 0 5-0 9
2. ჰოლანდია 3 2 0 1 8-6 6
3. გერმანია 3 1 0 2 4-5 3
4. რუსეთი 3 0 0 3 2-8 0

1/2-ფინალები

15 ივნისი
ესპანეთი-ნორვეგია
იტალია-ჰოლანდია

ყოველდღიური სპორტული გაზეთი "ლელო"

ასევე იხილეთ:
U21. ევროპის ჩემპიონატი: იტალია პირველი ნახევარფინალისტია! [VIDEO]