პოლ პოგბა 2013 წლის საუკეთესო ახალგაზრდა ფეხბურთელი გახდა

იტალიური სპორტული გაზეთი "ტუტოსპორტი" "ოქროს ბიჭს" (Golden Boy) 2003 წლიდან ასახელებს. ეს წოდება წლის საუკეთესო 21-წლამდელ ფეხბურთელებს ენიჭებათ ხოლმე და ისეთ მოთამაშებს აქვთ მოგებული, როგორებიც მარიო გიოტცე და მარიო ბალოტელი არიან.

ცხადია, თავის დროზე ამ ტიტულს ლიონელ მესიც ფლობდა. ამჯერად "ტუტოსპორტმა" "ოქროს ბიჭი" მეცამეტედ გამოავლინა: 2013 წლის საუკეთესო ახალგაზრდა ფეხბურთელი "იუვენტუსისა" და საფრანგეთის ნაკრების 20 წლის საყრდენი ნახევარმცველი პოლ პოგბა გახდა.

"ეს ჩემთვის უდიდესი პატივია და ძალიან ვამაყობ, რომ ეს ჯილდო დავიმსახურე," - განაცხადა პოგბამ "ტუტოსპორტისთვის" მიცემულ ინტერვიუში. ფრანგმა, რომლის მშობლები წარმოშობით გვინეადან არიან, ეს წოდება ისკოს ჩამოართვა. შარშან ამ დროს "ოქროს ბიჭი" სწორედ "მალაგას" ახალგაზრდა ესპანელი ნახევარმცველი გახდა, რომელიც ახლა მადრიდის "რეალშია".

პოლ პოგბამ კარიერაში პირველი სერიოზული ნაბიჯები "მანჩესტერ იუნაიტედში" გადადგა და რაკი ინგლისურ გრანდში არ ათამაშებდნენ, 2012 წლის ზაფხულში "იუვენტუსში" უფასოდ გადაბარგდა. "იუნაიტედის" ხელმძღვანელები მის გაშვებას ალბათ ძალიან ნანობენ, რადგან პოგბა "იუვენტუსში" მაღალი კლასის ფეხბურთელად ჩამოყალიბდა და უკვე ტურინული კლუბის ქომაგების ერთ-ერთი უსაყვარლესი მოთამაშეა. "იუვენტუსიდან" პოგბა საფრანგეთის ნაკრებშიც დამკვიდრდა და დიდიე დეშამის ხელმძღვანელობით უკვე 7 მატჩი აქვს ჩატარებული.

2012/13 წლების სეზონი პოგბასთვის ყველაზე წარმატებული იყო: "იუვეში" პირველსავე სეზონში იტალიის ჩემპიონი გახდა და ჩემპიონთა ლიგაში მეოთხედფინალამდე გააღწია. ამას გარდა, პოგბა საფრანგეთის 20-წლამდელთა ნაკრებში მსოფლიოს ჩემპიონი გახდა.

"იუვენტუსის" ხელმძღვანელების მთავარი მიზანი უკვე პოგბას ახალი ხელშეკრულებაა, რადგან მას ძალიან ბევრი მთხოვნელი გამოუჩნდა. პოლის კონტრაქტს ტურინულ კლუბთან ვადა 2015 წელს გასდის და მისდამი უდიდეს ინტერესს იჩენენ პსჟ და "რეალი".

"იუვეს" პრეზიდენტმა ანდრეა ანიელიმ ამას წინათ თქვა, თუ პოგბას გრანდიოზულ პირობებს შესთავაზებენ, მისი შენარჩუნება ძალიან გაგვიჭირდებაო. ფეხბურთელის აგენტი ცნობილი მინო რაიოლაა, რომელსაც თავისი მოთამაშეების მაღალ ფასად გაყიდვა ეხერხება. ამის დასტურად თუნდაც ის ფაქტი გამოდგება, რომ ზლატან იბრაჰიმოვიჩი და მარიო ბალოტელიც რაიოლას კლიენტები არიან.

ყველა "ოქროს ბიჭი"

წელი ფეხბურთელი კლუბი ქვეყანა
2003 რაფაელ ვან დერ ვაარტი აიაქსი ჰოლანდია
2004 უეინ რუნი ევერტონი/მან. იუნ. ინგლისი
2005 ლიონელ მესი ბარსელონა არგენტინა
2006 სესკ ფაბრეგასი არსენალი ინგლისი
2007 სერხიო აგუერო ატლეტიკო ესპანეთი
2008 ანდერსონი იუნაიტედი ბრაზილია
2009 ალეშანდრე პატო მილანი ბრაზილია
2010 მარიო ბალოტელი ინტერი/სიტი იტალია
2011 მარიო გიოტცე დორტმუნდი გერმანია
2012 ისკო მალაგა ესპანეთი
2013 პოლ პოგბა იუვენტუსი საფრანგეთი

ყოველდღიური სპორტული გაზეთი "ლელო"

ასევე იხილეთ:
პოლ პოგბა: ბურთი უხეიროდ მივიღე და დავამუშავე