"მანჩესტერ იუნაიტედი" გამალებით ცდილობს პოლ პოგბას დაბრუნებას. არადა, 2012 წელს "წითელმა ეშმაკებმა" ლამის უფასოდ გაუშვეს ფრანგი თინეიჯერი "იუვენტუსში", ახლა კი მისი დაბრუნების სურვილით იწვიან.დღევანდელ ჩვენს წერილში იმ ფეხბურთელებს გავიხსენებთ, რომლებიც სხვადასხვა დროს წავიდნენ მათი მშობლიური კლუბიდან, თუმცა მოგვიანებით ისევ დაბრუნდნენ.
ჟერარდ პიკე
"ბარსელონამ" 2004 წელს უფასოდ გაუშვა "მანჩესტერ იუნაიტედში" ჟერარდ პიკე. მაშინ პიკე 17 წლის იყო. კიდევ კარგი, კატალონიური კლუბის ხელმძღვანელები მალევე გამოფხიზლდნენ და 5 მილიონ გირვანქად პიკე დაიბრუნეს. რამდენიმე წელიც და, ვიდიჩისა და ფერდინანდის ჩრდილიდან ამოზრდილი მცველი უკვე
ალესანდრო მატრი
მოგზაურობის მოყვარული ფორვარდი მშობლიური "მილანიდან" 2007 წელს წავიდა "კალიარიში". მის სანაცვლოდ გუნდმა 4 მილიონი ევრო გადაიხადა. ამის შემდეგ მატრი აღმოჩნდა "იუვენტუსში", სადაც რამდენიმე სკუდეტო მოიგო. "მილანმა" მისი დაბრუნება ჩაიფიქრა და ამ საქმისათვის 11 მილიონი ევრო არ დაინანა. სულ ტყუილად. მატრი ჯერაც "როსონერის" კუთვნილებაა, თუმცა იჯარით მოგზაურობს სხვადასხვა კლუბში. "მილანის" შემადგენლობაში მან მხოლოდ 1 გოლი გაიტანა.
პეტერ კრაუჩი
დაბრუნებების დიდი ოსტატი, რომელსაც ჩვენ კიდევ შევხვდებით. საუკუნის დასაწყისში ახალგაზრდა და ძალიან უცნაურმა ფორვარდმა შესანიშნავი სეზონი ჩაატარა "პორტსმუთში". ეს იყო მეორე დივიზიონში. კრაუჩი სასწრაფოდ გადაიბირა "ასტონ ვილამ". ფეხბურთელი 5 მილიონ გირვანქად გაიყიდა, 6 წლის შემდეგ კი "პორტსმუთს" 11 მილიონად დაუბრუნდა.
ალვარო მორატა
ორ წლის წინათ "რეალის" ხელმძღვანელები აშკარად შეცდნენ. ისინი არ ენდნენ საკუთარი აკადემიის აღზრდილს და 20 მილიონ ევროდ გაუშვეს ტურინის "იუვენტუსში". ვერ ვიტყვით, რომ მორატა გამუდმებით ბრწყინავდა "ბებერ ქალბატონში", მაგრამ ის კი მოახერხა, რომ ჩემპიონთა ლიგიდან მშობლიური გუნდი დაითხოვა. "რეალმა" ამ ზაფხულს 30 მილიონ ევროდ დაიბრუნა თავისი აღზრდილი.
პიტერ კრაუჩი II
"ტოტენჰემმა" თავის დროზე, 60 ათას გირვანქად გაასხვისა კრაუჩი. ერთ-ერთი ყველაზე ბრიყვული გასხვისება ინგლისური ფეხბურთის ისტორიაში. რა იცოდნენ მაშინ "დეზების" შეფებმა, რომ მოვიდოდა დრო და პიტერი ინგლისის ნაკრების ნომერ პირველი ფორვარდი გახდებოდა. "ტოტენჰემს" მისი დაბრუნება 10 მილიონ გირვანქამდე დაუჯდა.
ჟერმენ დეფო
ზოგადად, "ტოტენჰემის" მფლობელმა დანიელ ლევიმ არაერთი ჭკვიანური გარიგება განახორციელა, მაგრამ იყო ჩავარდნებიც. 2008 წელს დეფოს კარიერა "ტოტენჰემში" ძველებურად კარგი ვეღარ იყო. კლუბის ხელმძღვანელობამ ის 6 მილიონ გირვანქად გაყიდა "პორტსმუთში". გაბრაზებულმა დეფომ დიდებული სეზონი ჩაატარა და ერთ წელიწადში "ტოტენჰემმა" უკვე 16 მილიონი ფუნტი გადაიხადა მის სანაცვლოდ.
მარკო როისი
ბევრმა ალბათ არც კი იცის, რომ "დორტმუნდის" ერთ-ერთმა ლიდერმა საფეხბურთო კარიერა სწორედ ამ კლუბში დაიწყო და მერე, 10 წლისა გადაბარგდა "აალენში". საფეხბურთო საზოგადოებამ როისი "გლადბახში" შესანიშნავი თამაშით გაიცნო. თავის დროზე სრულიად უფასოდ გაშვებული ბავშვის უკან დაბრუნება "დორტმუნდს" 17,1 მილიონი გირვანქა დაუჯდა. დღეს როისს მსურველები არ აკლია. რა თქმა უნდა, სურვილის შემთხვევაში დორტმუნდელები ფეხბურთელს გაცილებით ძვირად გაყიდიან.
ნემანია მატიჩი
"ჩელსის" ახალგაზრდულ სისტემაში ძალიან ბევრმა ფეხბურთელმა გაიარა. რა თქმა უნდა, ყველა მათგანზე არ ხერხდებოდა ჯეროვანი ყურადღების გამახვილება. სწორედ ასეთთა კატეგორიას მიეკუთვნება ლონდონელთა სერბი ნახევარმცველი ნემანია მატიჩი. თავის დროზე "ჩელსიმ" ის ხურდად გამოიყენა "ბენფიკასთან" სავაჭროდ, გაჩარხა რა ბრაზილიელი ვარსკვლავის, დავიდ ლუისის ტრანსფერი.
ეს მოხდა 2011 წელს. დრომ დაადასტურა, რომ ლონდონელები სწორად არ მოიქცნენ. სამი წლის შემდეგ მათ 21 მილიონი გირვანქა გადაიხადეს მატიჩის სანაცვლოდ. ცხადია, პორტუგალიურმა გრანდმა მაგრად იხეირა. "ჩელსიმ" თავის დროზე დაახლოებით ამდენი გადაიხადა დავიდ ლუისის ტრანსფერში, რომელსაც სერბი ხურდად გააყოლეს.
ნიკოლა ანელკა
თავის დროზე ყოველივე ფრანგულის მოტრფიალე არსენ ვენგერმა ეს დიდებული ფორვარდი ხელში ჩალის ფასად ჩაიგდო. საკმარისია აღინიშნოს, რომ "არსენალმა" ანელკას სანაცვლოდ "პარი სენ-ჟერმენს" სულ რაღაც 500 ათასი გირვანქა გადაუხადა. მაშინ გამხდარ, შავკანიან ბიჭს ბევრი არავინ იცნობდა, თუმცა ვენგერმა მასში განსაკუთრებული ნიჭი დაინახა.
მას შემდეგ, რაც ბევრი არაფერი გამოუვიდა მადრიდის "რეალში", ანელკამ პარიზში დაბრუნება გადაწყვიტა. "სენ-ჟერმენმა" "სამეფო კლუბს" 22 მილიონი გირვანქა გადაუხადა.
მატს ჰუმელსი
"ბაიერნის" სისტემაში გაიზარდა. მსოფლიოს ერთ-ერთ საუკეთესო მცველად კი "დორტმუნდში" ჩამოყალიბდა. თავის დროზე ჰუმელსი "დორტმუნდმა" შედარებით იაფად, 4 მილიონ ევროდ აიყვანა. მატსი მშობლიურ "ბაიერნს" ახლახან დაუბრუნდა. სწორედ მან უნდა გადაჭრას "ბაიერნის" დაცვაში არსებული პრობლემები. მიუნხენურმა გრანდმა გერმანიის ნაკრების დაცვის ბურჯში 38 მილიონი ევრო გადაიხადა.
სესკ ფაბრეგასი
თითქმის პიკესთან ერთად გაუშვა "ბარსელონამ" ინგლისში, ოღონდ "არსენალში". კატალონიელები სესკს ისე შეელივნენ, რომ მის ნაცვლად არაფერი მიუღიათ. მოვიდა დრო და "ბარსელონამ" სესკის დაბრუნება მოიწადინა. ფაბრეგასის სანაცვლოდ კატალონიურმა კლუბმა "არსენალს" 34 მილიონი ევრო გადაუხადა.
მოლოდინი - პოლ პოგბა
ფრანგი ვარსკვლავის დაბრუნება "მანჩესტერ იუნაიტედში" ძალიან რეალურია. თავის დროზე ის 800 ათას გირვანქად გაუშვა "იუნაიტედმა". ალბათ, ერთ-ერთი მთავარი შეცდომა სერ ალექს ფერგიუსონის დიდებული სამწვრთნელო კარიერისა. ვნახოთ, დაბრუნდება თუ არა პოლი "ოლდ ტრაფორდზე".
ყოველდღიური სპორტული გაზეთი "ლელო"
