გორელი კალათბურთელი ვლადიმერ თავაქარაშვილი ერთ-ერთ ყველაზე პერსპექტიულად ითვლება თავისი თაობის კალათბურთელებს შორის. დასტურად მხოლოდ იმის თქმაც საკმარისია, რომ 15 წლის სპორტსმენი 18-წლამდელთა საქართველოს ნაკრების წევრია, ბოლო სპორტული სეზონი სექტემბრიდან მარტამდე ესპანეთში ჩაატარა, სადაც "მიერესში" გამოდიოდა. აღნიშნული კლუბი რეგიონის ჩემპიონი გახდა, სამშობლოში დაბრუნებული თავაქარაშვილი კი 18-წლამდელთა საქართველოს ჩემპიონატში ჩაერთო და მშობლიური ქალაქის გუნდს, "გორს" დაეხმარა ბრინჯაოს მედლების მოპოვებაში. თავაქარაშვილი გორის სასპორტო სკოლის კალათბურთის სექციის აღზრდილია. მან უმცროსი ასაკიდანვე მიიქცია სპეციალისტთა ყურადღება და ჯერ ადგილობრივ გუნდებში, შემდეგ კი ქვეყნის ასაკობრივ ნაკრებებშიც მიიწვიეს.
- სათამაშო დრო "მიერესში" საკმარისად მქონდა. მწვრთნელი მენდობოდა და ფაქტობრივად, მთელი მატჩის მანძილზე მათამაშებდა. აქედანაც ჩანს, რომ კლუბის ხელმძღვანელობა კმაყოფილი იყო ჩემი გარჯით.
ჩვენი გუნდი ძირითადად ადგილობრივი კალათბურთელებით გახლდათ დაკომპლექტებული. სულ რამდენიმე ლეგიონერი ვთამაშობდით, მათ შორის, ორი ქართველი - ლევან მიქელაძე და მე. სეზონი ჩვენთვის მარტში დასრულდა, რადგან "მიერესმა" პლეი ოფში გასვლა ვერ შეძლო.
ცხადია, ძალიან გახარებული და კმაყოფილი ვარ იმითაც, რომ პირინეიდან დაბრუნების მერე "გორის" შემადგენლობაში საქართველოს 18-წლამდელთა ჩემპიონატის ბრინჯაოსპრიზიორი გავხდი, - გვითხრა ვოვამ.
აღსანიშნავია, რომ "გორს" ცოტა დააკლდა ფინალში გასვლამდე და შესაბამისად, უფრო მაღალი სინჯის მედლების მოპოვებამდე. პლეი ოფის ნახევარფინალში შიდაქართლელებმა "ჰიუნდაის" ვერ აჯობეს მესამე გადამწყვეტ პაექრობაში (1:2). საერთოდ კი, პლეი ოფში ჩატარებული სამივე საშინაო მატჩი - მეოთხედფინალში "ქუთაისთან", ნახევარფინალში - "ჰიუნდაისთან" და მესამე ადგილისთვის ბრძოლაში "არმიასთან" გამარჯვებით დაასრულეს.
აქედანაც ჩანს, რომ შინაური კედლები გორელებზე კარგად მოქმედებს. საზოგადოდ, გუნდის მიღწევაც ადგილობრივი კალათბურთის განვითარებაში მნიშვნელოვანია. სხვათა შორის, ვაჟთა გუნდის ეს წარმატება ქალმა მწვრთნელებმა, მარინე გოჩაშვილმა და მარი ხაჩიშვილმა გამოჭედეს.
- ჩვენი მწვრთნელები კარგი სპეციალისტები არიან. მათი წვლილი დიდია "გორის" წარმატებაში. მეტადრე, პლეი ოფის ეტაპზე ყველა თავდაუზოგავად ვშრომობდით და სასიხარულოა, რომ ვარჯიშმა შედეგი გამოიღო.
მიუხედავად სეზონის დასრულებისა, აქტიური სავარჯიშო ეტაპი ახლაც არ დამიმთავრებია. მზადყოფნაში ვარ სანაკრებოდაც და ზაფხულის მიწურულს ისევ ესპანეთში გასამგზავრებლად, - გვითხრა ვოვა თავაქარაშვილმა.
(იბეჭდება მცირე ცვლილებით)
ყოველდღიური სპორტული გაზეთი "ლელო"
