დავით უსტიაშვილის ხელმძღვანელობით "ბათუმმა" პირველი მატჩი ქუთაისში მოიგო

"ბათუმმა" სუპერლიგის მე-9 ტურის შეხედრაში "ქუთაისი" დაამარცხა. დავით უსტიაშვილმა აჭარულ გუნდში მთავარი მწვრთნელის რანგში პირველი მატჩი მოიგო. "ბათუმის" ყოფილი თავკაცი, მიხეილ კობეშავიძე დღეს "ქუთაისის" მთავარი მწვრთნელის ასისტენტია. სატურნირო მნიშვნელობასთან ერთად ამ მატჩის მთავარი შტრიხიც მწვრთნელების ფაქტორი იყო.

"ქუთაისი" ბათუმელებს ცხრილში 3 მოგებით გვარიანად უსწრებდა, თან შინ თამაშობდა და ცხადია, ფავორიტად ითვლებოდა. თამაშის მსვლელობამ კი საპირისპირო აჩვენა. შინაურ სარბიელზე ტრადიციულად კარგად მოასპარეზე ქუთაისელებმა გამართულად მოთამაშე ბათუმელებს ვერაფერი დაუპირისპირეს.

თანაბარი პირველი მეოთხედის შემდეგ სტუმრებმა სათამაშო ინიციატივა მოიპოვეს და ეს შედეგზეც აისახა. მეორე პერიოდი ბათუმელებმა 27:18 მოიგეს და დიდ შესვენებაზე 10-ქულიანი ლიდერობით გავიდნენ - 46:36.

ბათუმელები გუნდურად თამაშობდნენ, მათი წინამძღოლი კი ბომბარდირი ბიჯეი იანგი გახლდათ, რომელმაც საბოლოოდ 37 ქულა ჩააგდო და აჭარულ გუნდს გამარჯვება მნიშვნელოვნად განსაზღვრა. იანგს ოპონენტობას უწევდა ქუთაისელთა სლოვენიელი ახალწვეული მირზა სარალია, რომელმაც იმერულ კლუბში თავის რიგით მეორე მატჩში 23 ქულა ჩააგდო.

მესამე პერიოდში მასპინძლებმა თამაში გამოაკეთეს და ჩამორჩენა 3 ქულამდე შეამცირეს. ცხადი გახდა, რომ ყველაფერზე პასუხი ბოლო მეოთხედს უნდა გაეცა. გუნდებმა შედეგიანობა გამოავლინეს და უკანასკნელი ათწუთეულში მთლიანობაში 65 ქულა ჩავარდა. ბათუმელებმა გუნდურად ითამაშეს - იანგმა, ნოდარ თენიეშვილმა, ნიკ კელოგმა, ირაკლი მიქელაძემ და კრის ფელჩერმა გასამარჯვებლად აუცილებელი ბურთები ჩააგდეს და ქუთაისელთა მცდელობა, მატჩის ბედი შემოატრიალებინათ, მცდელობად დარჩა. მაქსიმუმი, რაც მალხაზ კოხრეიძის გაწვრთნილმა ქუთაისელებმა შეძლეს, სხვაობის 3 ქულით შემცირება იყო.

საბოლოოდ ბათუმელებმა 97:91 მოიგეს და ცხრილში პოზიცია გაიმაგრეს. ქუთაისურ მატჩში საუკეთესო ზემოთხსენებული იანგი გახლდათ, 17-17 ქულა დააგროვეს ირაკლი მიქელაძემ და ნიკ კელოგმა. მატჩის ერთადერთი ორმაგი დუბლი ბათუმელთა ამერიკელმა ცენტრმა, კრის ფელჩერმა მიითვალა - 13 ქულა, 14 მოხსნა. ქუთაისურ გუნდში 23 ქულით საუკეთესო მირზა სარალია გახლდათ, ზაურ ფაშაევმა კი 21 ქულა მიითვალა.

13.02.15, 18:00
ქუთაისი - ბათუმი 91:97
ქუთაისი 18 18 24 31
ბათუმი 19 27 17 34

მატჩისშემდგომი კომენტარები
მედეა მხეიძე ("ქუთაისის" მწვრთნელი): როგორც ყოველთვის, დაძაბული და საინტერესო თამაში გამოვიდა. ბათუმის გუნდი ძალიან მომზადებული ჩამოვიდა ქუთაისში და მივულოცავ ამ წარმატებას. სამწუხაროდ, ჩვენ ვერ ვაჩვენეთ დალაგებული თამაში და არ მოგვეცა ჩვენი უპირატესობის გამოყენების საშულება. ფარქვეშ თამაში წავაგეთ, დავკარგეთ ძალიან ბევრი ბურთი... როდესაც თანაბარი ძალების მქონე გუნდთან თამაშობ, ბურთის დაკარგვა მეტოქის მიერ ჩაგდებული ქულების ტოლფასია. ძალიან დაგვაკლდა გიორგი ბარბაქაძე, თუმცა მე მინდა მადლობა გადავუხადო ყველა მოთამაშეს, ვინც დღეს მოედანზე იმყოფებოდა და ცდილობდა თავისი წვლილი შეეტანა ამ შეხვედრაში. სპორტული ფორტუნა დღეს არ გვწყალობდა. გული მწყდება რომ ვერ ვასიამოვნეთ ჩვენი გულშემატკივარი, თუმცა ყველაფერი წინაა და ძალიან საინტერესო მატჩები გველოდება.

დავით უსტიაშვილი ("ბათუმის" მთავარი მწვრთნელი): ძალიან დაძაბული მატჩი და კარგი ატმოსფერო იყო. მთელი თამაშის მანძილზე ვიგებდით, შეხვედრას ჩვენ ვაკონტროლებდით და ვფიქრობ დამსახურებულად მოვიგეთ. ჩვენმა ბიჭებმა ძალიან მაგრად ითამაშეს და ბოლომდე იბრძოლეს. მოწინააღმდეგე გუნდმაც ბრწყინვალედ იასპარეზა. გამოვარჩევდი "ქუთაისის" ახალ ლეგიონერს, მირზა სარალიას, რომელიც შესანიშნავი მოთამაშეა და ძალიან კარგი შთაბეჭდილება დატოვა. წინ დაძაბული მატჩები გველის, ყველა გუნდი გაძლიერებულია და ვფიქრობ მეორე წრე საინტერესო იქნება.

მომზადებულია superleague.ge-ს მიხედვით