ზაზა ფაჩულია საჩემპიონო ტიტულს უახლოვდება, "გოლდენ სტეიტმა" მეორეც მოიგო [VIDEO]

ზაზა ფაჩულია NBA-ს საჩემპიონო ტიტულს უახლოვდება. მისმა გუნდმა "გოლდენ სტეიტმა" მეორე საშინაო მატჩიც მოუგო "კლივლენდს" - 132:113 და ფინალურ სერიაში 2:0 დაწინაურდა.

თბილისის დროით 5 ივნისს ჩატარებულ შეხვედრაში მასპინძელთა ქართველი ცენტრი იმდენად შედეგიანი არ გახლდათ, როგორც ეს სერიის პირველ მატჩში იყო, თუმცა ზაზამ, ტრადიციულად, სასტარტო ხუთეულში დაიწყო თამაში და იმ 13 წუთის განმავლობაში, რაც მოედანზე დაჰყო, დაცვაში საიმედოდ გაისარჯა. შეტევაში კი მან 2 ცდიდან 1 ორქულიანი ჩააგდო, რასაც მეტოქის ფარზე ორი მოხსნილი ბურთი მიამატა.

"გოლდენ სტეიტს" აღიარებულმა სუპერვარსკვლავებმა - კევინ დურანტმა და სტეფ კარიმ ულიდერეს. ამ უკანასკნელმა კარიერის პირველი საპლეიოფო სამმაგი დუბლი მიითვალა - 32 ქულა, 11 პასი, 10 მოხსნა. არანაკლებ შედეგიანი გახლდათ დურანტი, რომელმაც 33 ქულა, 13 მოხნა, 6 პასი და 5 დაფარება მიითვალა. წინა მატჩში ინერტულმა კლეი ტომპსონმა შეხვედრა 22 ქულით დაასრულა.

"კლივლენდში" შეუდარებელი იყო ლებრონ ჯეიმსი, რომელმაც ფინალურ სერიაში მე-8 სამმაგი დუბლი (29 ქულა, 14 პასი, 11 მოხსნა) გაიფორმა და გაუთანაბრდა ამ კომპონენტში ყველა დროის ლიდერ მეჯიქ ჯონსონს. ლებრონს ფეხი ვერ აუბეს თანაგუნდელებმა და "კლივლენდს" ახლა საკუთარი მოედნის იმედი აქვს.

სერიის მომდევნო ორი შეხვედრა კლივლენდში 8 და 10 ივნისს გაიმართება.

წყარო: gbf.ge