ქართველი ლეგიონერებიდან ყველაზე გვიან სეზონი თორნიკე შენგელიასთვის დასრულდა. "ლაბორალ კუჩა" ესპანეთის ჩემპიონატის ნახევარფინალში გავიდა და იქ "ბარსელონასთან" სერია 1:3 წააგო. გადამწყვეტი მატჩი კატალონიელებმა 10 ივნისს ვიტორიაში ისე მოიგეს, მეტოქისთვის შანსი არ მიუციათ - 85:63.
ოპერაციისა და ამას მოყოლილი 3-თვიანი რეაბილიტაციის შემდეგ შენგელია პირველად გამოჩნდა სასტარტო ხუთეულში, თუმცა მოედანზე მთლიანობაში მხოლოდ 10:48 წუთი გაატარა. ქართველმა ფორვარდმა 2-დან 1 სამქულიანი ჩააგდო და შეხვედრა 3 ქულით დაასრულა.
13 ქულით ვიტორიელთა შორის ბომბარდირი კიმ ტილი გახდა, 10-10 ქულა დააგროვეს დარკო პლანინიჩმა და ადამ ჰანგამ.
ფინალში გასული "ბარსელონა" "რეალს" შეხვდება, რომელმაც თავის მხრივ ნახევარფინალიდან "ვალენსია" გამოაგდო.
მომზადებულია gbf.ge-ს მიხედვით
![შენგელიას 17 ქულა "პანათინაიკოსთან" "ვირტუსი" ფავორიტთან ბოლო წუთებზე დამარცხდა [VIDEO]](/pictures/image7/4c6d6a1f4963611f07c11dc3d4c1444f.jpg "შენგელიას 17 ქულა \"პანათინაიკოსთან\" \"ვირტუსი\" ფავორიტთან ბოლო წუთებზე დამარცხდა [VIDEO]")
