NBA. რეგულარული ჩემპიონატი: ლავინმა სეზონი დაასრულა

"მინესოტას" მცველი ზაკ ლავინი გამოტოვებს სეზონის დარჩენილ ნაწილს მარცხენა მუხლის ჯვარედინი მყესების გაწყვეტის გამო, - იტყობინება კლუბის ოფიციალური ვებგვერდი. ოპერაციის თარიღი მოგვიანებით გახდება ცნობილი.

ლავინმა ტრავმა შაბათს, "დეტროიტთან" მატჩის (108:116) დროს მიიღო.
რეგულარული ჩემპიონატის 47 მატჩში, ლავინი საშუალოდ 18.9 ქულას, 3.4 მოხსნასა და 3.0 შედეგიან გადაცემას აგროვებდა.

ლავინი ჩატენვების კონკურსის ზედიზედ ორგზის გამარჯვებულია, მაგრამ წელს არ აპირებდა ტიტულის დაცვას.

"ბოსტონ სელტიქსის" მთავარი მწვრთნელი ბრედ სტივენსი "ყველა ვარსკვლავის მატჩზე" აღმოსავლეთი კონფერენციის ნაკრების დამრიგებელი იქნება.

მართალია, ამ მომენტისთვის აღმოსავლეთში "კლივლენდი" ლიდერობს, მაგრამ ამ გუნდის დამრიგებელს ტაირონ ლიუს არ აქვს აღმოსავლელთა მწვრთნელობის უფლება, რადგან შარშან ხელმძღვანელობდა მათ. ამიტომაც, ეს პატივი წილად ხვდა სტივენსს, რომლის "ბოსტონსაც" "ყველა ვარსკვლავის მატჩამდე" ვერც ერთი გუნდი ვერ წაართმევს მეორე ადგილს.

შეგახსენებთ, რომ დასავლეთის მთავარი მწვრთნელი იქნება "გოლდენ სტეიტის" თავკაცი სტივ კერი.

"ჰიუსტონ როკეტსმა" ხმარებიდან ამოიღო მე-11 ნომერი, რომლითაც ამ კლუბში ჩინელი ცენტრი იაო მინი თამაშობდა. "ტოიოტა-ცენტრში" საზეიმო ცერემონია შაბათს, "როკეტსისა" და "ჩიკაგოს" შეხვედრის წინ გაიმართა.

მინმა "ჰიუსტონის" რიგებში 486 მატჩი ჩაატარა, საშუალოდ 19.0 ქულა, 9.2 მოხსნა და 1.9 დაფარება დააგროვა. მან ათჯერ მიიღო მონაწილეობა "ყველა ვარსკვლავის მატჩში".

ვებგვერდ Cleveland.com-ის ინფორმაციით, "კლივლენდის" შემტევი მცველი ჯეი არ სმიტი მწყობრში უნდა ჩადგეს აპრილში და მოასწროს პლეი ოფამდე რეგულარული ჩემპიონატის რამდენიმე მატჩის ჩატარება.

სმიტმა დეკემბრის ბოლოს გადაიტანა ოპერაცია მარჯვენა ფეხის ცერა თითის მოტეხვის შემდეგ. კალათბურთელს შეუძლია ვადაზე ადრე დაბრუნება, მაგრამ კლუბის ხელმძღვანელობა არ აჩქარებს მას.

როგორც ESPN.com წერს, "კლივლენდი" ისევ ფიქრობს შემადგენლობის გაძლიერებაზე. ამჯერად, იტყობინებიან, რომ "კავალიერზს" სურს "ლეიკერსის" გამთამაშებელი ხოსე კალდერონი და "დალასის" ცენტრი ენდრიუ ბოგუტი. გარდა ამისა, მოქმედი ჩემპიონი ახალ შეთავაზებას ამზადებს "დალასის" პლეიმეიკერ დერონ უილიამსისთვის.

"კლივლენდის" ხელმძღვანელობას ესმის, რომ ნაკლებად შეძლებს კალდერონის, ბოგუტის ან უილიამსის გაცვლის შედეგად ხელში ჩაგდებას, ამიტომაც იმედი აქვს, რომ ამ მოთამაშეებიდან ერთ-ერთის კონტრაქტს გამოისყიდიან და ის თავისუფალი აგენტების ბაზარზე გავა.

"გოლდენ სტეიტი უორიორზმა" გაწყვიტა კონტრაქტი ბრაზილიელ ცენტრთან ანდერსონ ვარეჟაოსთან, - ამის შესახებ წერს კლუბის ოფიციალური ვებგვერდი. "მეომრების" შემადგენლობა 14 მოთამაშემდე შემცირდა.

მიმდინარე სეზონში 34 წლის ვარეჟაომ 14 მატჩი ჩაატარა "უორიორზის" რიგებში. მისი საშუალო სტატისტიკა 1.3 ქულა და 1.9 მოხსნა იყო. ვარეჟაო "გოლდენ სტეიტში" 2016 წლის თებერვალში მივიდა. მანამდე, მან ზედიზედ 11 სეზონი ჩაატარა "კლივლენდში".

ყოველდღიური სპორტული გაზეთი "ლელო"