NBA. ფინალი. V მატჩი: ჯინობილის დირიჟორობით და გრინის სიზუსტით

მეხუთე მატჩის წინ ამერიკული პრესის ყურადღება მიპყრობილი იყო "სან ანტონიოს" გამთამაშებლის, ტონი პარკერის მიმართ.

მან მარჯვენა ფეხი მესამე მატჩში დაიზიანა და თამაშებს შორის პაუზებს სარეაბილიტაციო პროცედურებს უთმობდა. შეხვედრის წინ ფრანგმა აღიარა, რომ მოედანზე ტრავმის გართულების რისკის ფასად გადის:

"ექიმებმა მითხრეს, რომ ნებისმიერ დროს შეიძლება გავიწყვიტო მუხლის მყესები, თუმცა ახლა ფინალია. ნებისმიერ სხვა სიტუაციაში 10-დღიან დასვენებას ავიღებდი, მაგრამ ჩემი ფიქრები ტიტულის მოპოვებისკენ არის მიმართული".

გუნდებმა ექსპერიმენტული სასტარტო ხუთეულებით დაიწყეს თამაში. მოედანზე მხოლოდ ორი ნომინალური "მაღალი" იყო, ტიმ დანკანისა და კრის ბოშის სახით. "მაიამიში" მძიმე ფორვარდის როლს ლებრონ ჯეიმსი ასრულებდა, "სპურსს" კი ამ პოზიციაზე კავაი ლეონარდი ჰყავდა. მას კვლავ ოთხგზის MVP-ის მეურვეობა ევალებოდა.

სასტარტო ხუთეულში იყო მანუ ჯინობილი. მეოთხე მატჩის წაგების შემდეგ სწორედ არგენტინელის მისამართით იყო ყველაზე მეტი კრიტიკა - პირველ ოთხ მატჩში მანუ საშუალოდ 7.5 ქულას აგროვებდა. მისი სასტარტოში დაყენებით, გრეგ პოპოვიჩმა სამხრეთამერიკელის გამოფხიზლება გადაწყვიტა.

ჯინობილიმაც თავიდანვე მიხედა საქმეს და უკვე შეხვედრის დებიუტში დაამტკიცა, რომ ამჯერად უბრალო სტატისტის როლი არ დააკმაყოფილებდა: მარტო პირველ ხუთ წუთში მის ანგარიშზე შვიდი ქულა იყო. რაც მთავარია, ჩვენ ვიხილეთ ის ჯინობილი, რომელიც მეტოქის ნებისმიერი დაცვისთვის დიდ პრობლემას წარმოადგენდა.

სწორედ მას მიჰყავდა "სან ანტონიოს" თამაში: ხან საჭირო და დროული გადაცემებით ამარაგებდა პარტნიორებს და ხან თავად მიდიოდა შეტევაში. თუმცა თავიდან "მაიამი" შორს არ უშვებდა მეტოქეს. შეტევების გაცვლა ლებრონ ჯეიმსის სამქულიანით დასრულდა და ანგარიში თანაბარი იყო - 17:17.

მაგრამ ამის შემდეგ "ჰიტს" შეტევაში სერიოზული ჩავარდნა ჰქონდა და პირველი მეოთხედი მასპინძლების გაქცევით დასრულდა - 15:2. "სპურსის" შეტევა ძალიან უბრალოდ და საიმედოდ მოქმედებდა: მასპინძლებს მოედანზე ოთხი "სნაიპერი" ჰყავდათ და ერთმანეთის ურთიერთდაზღვევით, ყოველი შეტევა თავისუფალი სამქულიანით სრულდებოდა. გარდა ამისა, ამით ფართან ახლოს საჭირო სივრცე შეიქმნა პარკერისთვის, ჯინობილისთვისა და დანკანისთვის.

მეორე მეოთხედში სტუმრებმა სცადეს პირველ 12-წუთეულში მიღებული ჩამორჩენის გაბათილება, მაგრამ ოთხ ქულაზე უფრო ახლოს მეტოქესთან ვერ მივიდნენ. ამას ხელს უწყობდა "სპურსის" კალათბურთელების ფენომენალური სიზუსტე. დენი გრინმა მეორე მეოთხედის სტარტზე ჩააგდო ზედიზედ სამი სამქულიანი. ამით მას ფინალურ სერიაში 22 ზუსტი შორეული ტყორცნა დაუგროვდა, რაც რეი ალენის რეკორდის (რომელიც 2008 წელს, "ლეიკერსთან" სერიის ექვს მატჩში იყო დამყარებული) გამეორება იყო.

გრინი ძალიან თავდაჯერებული იყო სროლის დროს და ბოლოს, დაამხო კიდეც დღევანდელი მაიამელი სნაიპერის რეკორდი.

მეორე ტაიმის სტარტი სტუმრებისა იყო, რომლებიც დიდი შესვენების შემდეგ ორჯერ ერთი სროლის მანძილზე მიუახლოვდნენ მეტოქეს. ბოლოს ეს მოხდა ბატიეს ზუსტი საჯარიმოს შემდეგ - 75:74 მასპინძლების სასარგებლოდ და ამას მოჰყვა "სპურსის" მხრიდან აქტიურობა.

მესამე მეოთხედი დასრულდა გრინის სამქულიანით, ჯინობილის 7 ქულითა და სპლიტერის ზუსტი სროლით. ბოლო მეოთხედის დაწყებას "ჰიტი" საკუთარი სპურტით აპირებდა, მაგრამ "სან ანტონიომ" თავდადებით ითამაშა დაცვაში. აქ განსაკუთრებით გამოიჩინა თავი იმავე გრინმა, რომელიც პრაქტიკულად ყველგან იყო. მან ზედიზედ შვიდი ქულა ჩააგდო და გაამყარა თავისი გუნდის უპირატესობა - 94:75.

"მაიამიმ" მაინც ბოლომდე იბრძოლა და სცადა ამ დიდი დეფიციტის გაბათილება, მაგრამ მხოლოდ 13 ქულამდე მიუახლოვდა მეტოქეს. მეტის იმედი სტუმრებს არ უნდა ჰქონოდათ, რადგან ჯეიმსი და უეიდი ფარქვეშიდან ხშირად აცილებდნენ სროლებს. "სპურსი" კი ბოლომდე კარგად თამაშობდა შეტევაში და საბოლოოდ, 60-პროცენტიანი სიზუსტე დააფიქსირა, რაც ფინალურ სერიაში 2010 წლის შემდეგ არ მომხდარა.

ახლა სერია მაიამიში ბრუნდება. "ჰიტს" ორივე მატჩში მოგება სჭირდება ჩემპიონობის შესანარჩუნებლად. რაც შეეხება პროგნოზებს, ძალიან ბევრი თანხმდება იმაზე, რომ სერია შვიდმატჩიანი იქნება.

სან ანტონიო-მაიამი 114:104
32:19, 29:33, 26:23, 27:29
ს-ა: პარკერი (26+5 პასი), გრინი (24+6 მოხსნა+3 დაფარება), ჯინობილი (24+10 პასი), დანკანი (17+12 მოხსნა+3 დაფარება), ლეონარდი (16+8 მოხსნა+3 ჩაჭრა).
მ: ჯეიმსი (25+8 პასი+6 მოხსნა+4 ჩაჭრა), უეიდი (25+10 პასი), ალენი (21), ბოში (16+6 მოხსნა).
სერია: 3-2

თამაშებს ამერიკაშიც აწყობენ
ამერიკის ქალაქ ობერნის (ალაბამას შტატი) საუნივერსიტეტო გუნდი, რომელიც NCAA-ს ჩემპიონატში გამოდის, მატჩების შედეგების მანიპულირებაშია მხილებული.

ბრალი წაუყენეს გუნდის ყოფილ მცველ ვარეზ უორდს. ბრალდების თანახმად, ის 2011-12 წლების სეზონში მატჩების ჩაწყობით იყო დაკავებული - მეტოქეებს შეხვედრებში ქულათა სხვაობაზე (ე. წ. point-shaving) უთანხმდებოდა. ალაბამას შტატის საოლქო პროკურორმა უორდი დაადანაშაულა სპორტული შედეგების გაყალბებასა და 2012 წლის 25 იანვარს, "არკანზასის" წინააღმდეგ ჩაწყობილი მატჩის ორგანიზებაში.

პროკურორი აგრეთვე ამტკიცებს, რომ ბრალდებული მომდევნო მატჩებშიც აგრძელებდა მატჩების შედეგების გაყალბებას. საქმეში ნახსენებია თამაში "ობერნსა" და "ალაბამას" შორის (7 თებერვალი), რომელშიც უორდი საეჭვოდ ხშირად კარგავდა ბურთს. შედეგად, მისმა გუნდმა დიდი ანგარიშით წააგო - 50:68, არადა, ბუკმეიკერები ამ მატჩში ვარაუდობდნენ ფორას - "პლუს ხუთი".

უორდი "ობერნის" რიგებიდან 2012 წლის 25 თებერვალს, "არკანზასთან" მატჩის წინ გარიცხეს. მიზეზად უნივერსიტეტის ხელმძღვანელობამ გუნდური დისციპლინის დარღვევა დაასახელა. მას შემდეგ უორდს აღარ უთამაშია. მასთან ერთად, გუნდიდან გააძევეს კრის დენსონი, მაგრამ მოგვიანებით მას ეჭვმიტანილის სტატუსი მოეხსნა და გუნდის შემადგენლობაში დაბრუნდა.

თუ სასამართლო უორდს ბრალს დაუმტკიცებს, მას ხუთი წელი პატიმრობა და 250 ათასი დოლარის ოდენობის ჯარიმა ელის.

ბოლო დროს ეს უკვე მეორე შემთხვევაა, როცა NCAA-ს მოთამაშეებს ჩაწყობილი მატჩებისთვის ასამართლებენ. ერთი თვის წინ სან დიეგოს უნივერსიტეტის ყოფილ მოთამაშეს, ბრენდონ ჯონსონს მიუსაჯეს ექვსთვიანი პატიმრობა.

ყოველდღიური სპორტული გაზეთი "ლელო"

ასევე იხილეთ:
NBA. ფინალი: დიდი ტრიოს დიდი მატჩი