რიკი რუბიო: ამერიკამ ლამაზი თამაშისთვის შემიყვარა

ევრობასკეტის დროს, ესპანეთის ნაკრების გამთამაშებელი რიკი რუბიო NBA-ის იმ ვარსკვლავს არ ჰგავდა, რომლის ხილვაც სურდათ კალათბურთის მოყვარულებს. სავსებით შესაძლებელია, რომ სწორედ რუბიოს პროდუქტიულობა არ ეყო ესპანეთის ნაკრებს იმისთვის, რომ სველონიაში ტიტული შეენარჩუნებინა.

ტურნირის დროს, "მინესოტას" პლეიმეიკერს HoopsHype-ის ამერიკელი ჟურნალისტები გაესაუბრნენ. აღნიშნულ ინტერვიუში სიტყვაც არ არის ნახსენები ევროპის ჩემპიონატზე...

- ელოდებით "მინესოტას" საწვრთნელ ბანაკს?
- მოუთმენლად ველოდები. განსაკუთრებით იმიტომ, რომ ამ ზაფხულს შემადგენლობაში დავამატეთ საჭირო კადრები. ერთობლივი ვარჯიშის ერთმა თვემ ბევრი უნდა მოგვცეს, უნდა დაგვეხმაროს გუნდური მექანიზმების ამუშავებაში.

- რომელი წინასასეზონო

სვლა იყო კლუბისთვის საუკეთესო?
- იყო რამდენიმე კარგი შენაძენი, მაგრამ განსაკუთრებულ ადგილს იკავებს ნიკოლა პეკოვიჩის შენარჩუნება. ის ძალიან მნიშვნელოვანია ჩვენთვის. ჩეიზ ბადინგერიც მნიშვნელოვანი მოთამაშეა. კევინ მარტინი დამატებით "ბონუსს" მოგვცემს დაგროვილი ქულების მხრივ. ის რამდენიმე სეზონი მუშაობდა რიკ ადელმანთან ერთად და საშუალოდ მატჩში 20 ქულას აგროვებდა. ეს იმას ნიშნავს, რომ ჩვენი სათამაშო სისტემა მისთვის მოსახერხებელია.

- რას იტყვით კლუბში მისულ კორი ბრიუერზე?
- მე ეს შენაძენიც მომწონს. ანდრეი კირილენკო ძალიან სასარგებლო იყო დაცვაში თავისი მოქმედებებით და ახლა, როცა ის წავიდა, შეიძლება მხოლოდ მოხარულები ვიყოთ ბრიუერის მოსვლით. ის შეძლებს კირილენკოს დაკარგვის კომპენსირებას.

- "მინესოტას" მფლობელმა გლენ ტეილორმა ამასწინ დაადასტურა, რომ რიკ ადელმანი მომავალ სეზონშიც დარჩება მთავარი მწვრთნელის პოსტზე. ესეც კარგი ამბავია?
- რა თქმა უნდა! ძალიან გამეხარდა, როცა ეს ამბავი გავიგე. ადელმანის შესახებ მხოლოდ კარგის თქმა შემიძლია. მთელი თავისი კარიერით მან დაამტკიცა, რომ შეუძლია მოთამაშეებს დამაჯერებლობა შემატოს და გუნდში დაამკვიდროს სათამაშო სისტემა, რომელიც პირადად მე ძალიან მომწონს. ჩვენ ვთამაშობთ მიმზიდველ, მხიარულ კალათბურთს. მწვრთნელი გარკვეულ თავისუფლებასა და იმპროვიზაციის უფლებას გვაძლევს, ის არ გვიყვირის, ჩვენზე ზეწოლას არ აქვს ადგილი. მას კალათბურთელებამდე საკუთარი იდეების მიტანის თავისებური მანერა აქვს. და ის შეგირდებში დიდი პატივისცემით სარგებლობს.

- მას მთელი გასული სეზონის განმავლობაში ოჯახური პრობლემები ჰქონდა...
- ოჯახური პრობლემები ნებისმიერ ჩვენთაგანს აქვს, მაგრამ ადელმანი პროფესიონალია და გუნდის საქმეებში ბოლომდე იყო ჩართული. ჩვენ მას ამისთვის მადლობა უნდა გადავუხადოთ.

- გენერალურმა მენეჯერმა დევიდ ქანმა, რომელმაც, თავის დროზე, დრაფტზე აგიყვანათ, კლუბი ამ ზაფხულს დატოვა. როგორი იყო თქვენი რეაქცია?
- მან ჩემზე გააკეთა აქცენტი, რაც რისკიანი სვლა იყო - და მე ამისთვის ყოველთვის მისი მადლიერი ვიქნები. ამჟამად, ახალი ხელმძღვანელი ფლიპ სონდერსი მთელი თავისი მოქმედებით გვიჩვენებს, რომ უფრო მეტის მიღწევა სურს. მე მას რამდენჯერმე ლოს ანჯელესში შევხვდი და ჩემზე კარგი შთაბეჭდილება დატოვა.

- თქვენ უკვე დაამტკიცეთ, რომ იმასახურებთ ადგილს NBA-ში. რის დამტკიცებას აპირებთ დამდეგ სეზონში?
- მინდა უფრო სტაბილური ვიყო, თავიდან ავიცილო ტრავმები და მთელი სეზონი ბოლომდე ჩავატარო. აგრეთვე გავიყვანო გუნდი ახალ დონეზე. ბევრი მიზეზით, ძირითადად ტრავმების გამო, გასული ჩემპიონატი ჩვენი გუნდისთვის ჩავარდნებით იყო სავსე და საერთო ჯამში, წარუმატებელი აღმოჩნდა. ჯანმრთელები უნდა ვიყოთ, რათა პროგრესს მივაღწიოთ.

- მაგალითად, გახვიდეთ პლეი ოფში?
- ჯერ ადრეა პლეი ოფში გასვლაზე ლაპარაკი. ჯერ კარგად უნდა ჩავატაროთ საწვრთნელი ბანაკი, შევთამაშდეთ. შემდეგ ნაბიჯია სეზონის კარგად დაწყება. პლეი ოფამდე ჯერ შორია.

- მაგრამ გუნდის განწყობა მრავლისმეტყველია...
- დიახ, ეს ასეა. ჩვენ სავსე ვართ ამბიციებით, მაგრამ მოდით, საკითხები ნაბიჯ-ნაბიჯ გადავწყვიტოთ. ასევე დავსახოთ მიზნები. აჩქარება - ცუდი თანაშემწეა.

- კომფორტულად ცხოვრობთ მინეაპოლისში?
- ჩემთვის აქ იოლია ცხოვრება. საკალათბურთო მოედნის მიღმა მუდმივად კეთილი ადამიანები მხვდებიან. ეს მშვიდი და ჩუმი ქალაქია და მე აქ ყველაფერი მომწონს.

- შეიძლება აგვიხსნათ, რატომ შეგიყვარათ ასე ამერიკამ?
- არც კი ვიცი. ალბათ, იმიტომ, რომ ლამაზად თამაშს ვცდილობ. ყოველთვის მოგებაზე ვთამაშობ, მაგრამ არც იმას ვივიწყებ, რომ ადამიანების გართობაც საჭიროა. აუცილებელია ორგანულად შეერწყას ეს ორი ფაქტორი. მოგება – მთავარი მიზანია, მაგრამ თამაშისგან სიამოვნების მიღებაც მნიშვნელოვანია.

- კევინ ლავი გუნდის ლიდერია?
- ეჭვგარეშე. ის ვარსკვლავია, მაგრამ ძალიან ეხმარება გუნდს გასახდელშიც. მას ძალიან რთული წელი ჰქონდა ტრავმების გამო და ის ძალიან გვაკლდა. კევინი იმ მოთამაშეების კატეგორიას მიეკუთვნება, ვინც საკუთარ თავზე მხოლოდ თამაშით ლაპარაკობს და არა სიტყვებით.

- ის ბედნიერია "მინესოტაში"?
- როგორც გითხარით, მას რთული წელი ჰქონდა. ვფიქრობ, როცა ყველაფერი წესრიგში იქნება, ის დიდ სიამოვნებას მიიღებს ცხოვრებისგან და თამაშისგან.

- საკუთარ თავს ხედავთ გუნდის ლიდერად? თუ ევროპელისთვის NBA-ში ასეთი როლი რთულია?
- ეს ფაქტორი აქ არაფერ შუაშია. ბავშვობიდან ვცდილობდი მეჩვენებინა პარტნიორებისთვის კარგი მაგალითი. სწორედ მოედანზე და არა მის ფარგლებს გარეთ. ყოველთვის მთელს ენერგიას ვხარჯავდი გუნდისთვის. ეს სწორედ ის არის, რასაც ნამდვილი ლიდერი აკეთებს.

ყოველდღიური სპორტული გაზეთი "ლელო"

ასევე იხილეთ:
კოლექტიური ინტერვიუ: ჯრიუ ჰოლიდეისთან, დამიენ ლილარდთან, რიკი რუბიოსთან და ჯონ უოლთან