NBA. რეგულარული ჩემპიონატი: "ოკლაჰომა" უკვე ლიდერია

კევინ დურანტმა კიდევ ერთი ვირტუალური ქულა ჩაიწერა სეზონის MVP-ის ტიტულისთვის ბრძოლაში. 22 იანვრის ცენტრალურ მატჩში მან 36 ქულა დააგროვა და თავის გუნდს "სან ანტონიოსთან" გამარჯვება გაუნაღდა - 111:105 (კევინი ზედიზედ მეცხრე მატჩია მინიმუმ 30 ქულას აგროვებს).

შეგახსენებთ, რომ წინა დღეს "დურანტულამ" 46 ქულა მიითვალა "პორტლენდის" წინააღმდეგ და ამით "ოკლაჰომამ" "ბლეიზერსს" ლიდერობა წაართვა ჩრდილო-დასავლეთ დივიზიონში. გუშინდელი მოგების შემდეგ კი "თანდერი" უკვე მთლიანად დასავლეთში იკავებს პირველ ადგილს.

დურანტს ტექსასში დიდი დახმარება გაუწია რასელ უესტბრუკის ტრავმის პერიოდში გამთამაშებლის პოზიციაზე მოთამაშე რეჯი ჯექსონმა, რომელმაც 27 ქულა დააგროვა. "სან ანტონიოში" კი ვერ მოინახა ღირსეული შემცვლელი ტიაგუ სპლიტერისთვის, დენი გრინისთვისა და კავაი ლეონარდისთვის. ეს უკანასკნელი თავიდან კარგად მეურვებოდა ჯექსონს, მაგრამ მეორე მეოთხედში იძულებით დატოვა მოედანი თითის მოტეხვის გამო.

"სპურსის" რიგებში მხოლოდ ტონი პარკერს გამოვყოფთ, რომელმაც შედეგიანობით აჯობა დურანტს (ფრანგმა 37 ქულა დააგროვა), მაგრამ მისი მონდომება მხოლოდ იმისთვის აღმოჩნდა საკმარისი, რომ მასპინძლებს სირენამდე ორწუთნახევრით ადრე ოთხ ქულამდე შეემცირებინათ სხვაობა. მაგრამ ამას მოჰყვა ორი სამქულიანი დურანტისგან, რამაც საბოლოოდ დაასამარა ტექსასელთა იმედები.

* * *
მთლიანად ლიგის ერთპიროვნულმა ლიდერმა "ინდიანამ" რეგულარული ჩემპიონატის პირველი ნაწილი "ფინიქსთან" გამანადგურებელი წაგებით დაასრულა - 100:124. "ინდიანას" ვერც ერთმა ვარსკვლავმა ვერ შეძლო არიზონელთა სწრაფი კალათბურთისთვის გამკლავება. განსაკუთრებით აქტიურობდნენ გორან დრაგიჩი (22 ქულა 21 წუთში) და ჯერალდ გრინი, რომელიც მაქსიმალურად ცდილობდა დაემტკიცებინა "ინდიანასთვის", რომ შარშან მისი სხვა გუნდში გაშვება შეცდომა იყო.

შეგახსენებთ, რომ გასულ ზაფხულს "პეისერსმა" გრინი "სანზში" მაილზ პლამლისთან ერთად გაუშვა, სანაცვლოდ კი ლუის სკოლა მიიღო. 22 იანვრის შედეგების მიხედვით, ეს გარიგება "ინდიანასთვის" გაუმართლებელი იყო: პლამლიმ გრინის 23 ქულას თავისი 11 დაუმატა, სკოლამ კი ეს მატჩი ჩააგდო. ასე რომ, "ფინიქსმა", რომელიც თავიდან უიმედო აუტსაიდერად მიიჩნეოდა, ისევ დაადასტურა სეზონის პირველი ნახევრის აღმოჩენის სტატუსი (24 მოგებით ჯეფ ჰორნაჩეკის გუნდი მეშვიდე ადგილზეა დასავლეთში).

* * *
ზედიზედ მეხუთე მატჩი წააგეს ნიუიორკელმა კალათბურთელებმა, სულ კი "მედისონ სკვერ გარდენში" "ნიქსის" ანგარიშზე 15-დან მხოლოდ შვიდი მოგება მოდის. ამჯერად მაიკ ვუდსონის შეგირდებმა "ფილადელფიასთან" შეირცხვინეს თავი, რასაც, ალბათ, არავინ ელოდა, რადგან "სიქსერსისგან" ამ სეზონში მოგება იშვიათი რამაა. ეს გამარჯვება ევან ტერნერის დამსახურებაა, რომელმაც შედეგიანობის პირადი რეკორდი დაამყარა, ახალბედა მაიკლ კარტერ-უილიამსს კი სამი შედეგიანი პასი არ ეყო სამმაგ დუბლამდე.

* * *
22 იანვრის სათამაშო დღეს სამმაგი დუბლი მაინც შედგა, რომლის ავტორი გახდა "ვაშინგტონის" გამთამაშებელი ჯონ უოლი. თუმცა ამან დედაქალაქურ კლუბს ვერ უშველა. "უიზარდსს" მეხუთედ ჰქონდა ამ სეზონში შანსი, დაეფიქსირებინა მოგება-წაგების 50-პროცენტიანი მაჩვენებელი და ისევ ვერ გადალახა ეს ზღვარი. ასეთი რამ "ვაშინგტონს" 2009 წლის შემოდგომის შემდეგ არ ჰქონია.

"ბოსტონისგან" 22 იანვარს ნაწვნევი მარცხი განსაკუთრებით დასანანი იყო, რადგან მასპინძლებმა ვერ გამოიყენეს "სელტიქსის" რიგებში რაჟონ რონდოს არყოფნა (მწვრთნელებმა გამთამაშებელს დასვენების საშუალება მისცეს). გარდა ამისა, "უიზარდსმა" ვერ შეინარჩუნა ბოლო წამებზე სამქულიანი უპირატესობა, ოვერტაიმში კი თანაბარ ანგარიშზე, 2.2 წამით ადრე ჩააგდებინა ორქულიანი ჯერალდ უოლასს. სხვათა შორის, ანგარიში თანაბარი იმიტომ იყო, რომ საჯარიმო ვერ გამოიყენა დედაქალაქელთა ცენტრმა მარცინ გორტატმა.

შარლოტი-კლიპერსი 95:91
26:25, 22:24, 24:21, 23:21
შ: ჯეფერსონი (24+10 მოხსნა).
კ: გრიფინი (27), ჯამ. კროუფორდი (20), რედიკი (15), ჯორდანი (4+20 მოხსნა).

კლივლენდი-ჩიკაგო 87:98
17:23, 27:20, 18:28, 25:27
კ: ირვინგი (26), უეიტერსი (15), ვარეჟაო (10+11 მოხსნა).
ჩ: ოგასტინი (27), ტ. გიბსონი (26), დანლივი (22), ნოა (9+18 მოხსნა).

მილუოკი-დეტროიტი 104:101
25:28, 25:28, 31:29, 23:16
მ: კ. ბატლერი (30), ნაითი (16).
დ: ჯენინგსი (30), სტაკი (23), მონრო (18), დრამონდი (11+12 მოხსნა).

ორლანდო-ატლანტა 109:112
21:29, 35:31, 24:28, 29:24
ო: ოლადიპო (24), ტ. ჰარისი (19+12 მოხსნა), ჯ. ნელსონი (17).
ა: მილსეპი (24), ტიგი (23), კეროლი (17), ანტიჩი (10+12 მოხსნა).

ტორონტო-დალასი 93:85
15:34, 31:17, 22:22, 25:12
ტ: დეროზანი (40), გ. ვასკესი (17), ვალანჩუნასი (12+10 მოხსნა).
დ: ელისი (21).

ვაშინგტონი-ბოსტონი 111:113 (ო)
22:32, 21:29, 30:15, 26:23, 12:14
ვ: უოლი (28+11 მოხსნა+10 პასი), ნენე (17), გორტატი (11+13 მოხსნა).
ბ: ჯეფ გრინი (39), პრესი (20), სალინჯერი (14+11 მოხსნა).

ნიუ იორკი-ფილადელფია 106:110
26:33, 30:28, 24:23, 26:26
ნ-ი: ენტონი (28), ბარნიანი (20), შამპერტი (19), ტ. ჩენდლერი (10+14 მოხსნა).
ფ: ტერნერი (34+11 მოხსნა), კარტერ-უილიამსი (19+12 მოხსნა), ტ. იანგი (19), ჯ. ანდერსონი (18).

ჰიუსტონი-საკრამენტო 119:98
29:22, 26:22, 33:29, 31:25
ჰ: ჰოვარდი (26+13 მოხსნა), ჰარდენი (24), კასპი (20+12 მოხსნა), პარსონსი (19).
ს: უილიამსი (22+11 მოხსნა), ა. ტომასი (20).

სან ანტონიო-ოკლაჰომა 105:111
24:30, 29:25, 22:21, 30:25
ს-ა: ტ. პარკერი (37), დანკანი (14+13 მოხსნა).
ო: დურანტი (36), ს. ჯექსონი (27).

ფინიქსი-ინდიანა 124:100
30:29, 32:20, 34:30, 28:21
ფ: ჯერ. გრინი (23), გ. დრაგიჩი (21), მორისი (20).
ი: ჯორჯი (26), ჯორჯ ჯოლი (16).

ოცნების გუნდის კონტურები
23 იანვარს აშშ-ის კალათბურთის ფედერაცია დაასახელებს მოთამაშეთა გაფართოებულ სიას მსოფლიოს 2014 წლის ჩემპიონატისთვისა და 2016 წლის ოლიმპიადისთვის მოსამზადებლად.

სიაში შეიყვანენ 25-30 კალათბურთელს და მათგან შეარჩევენ 12 მოთამაშეს ესპანეთში პლანეტის პირველობაზე და რიოს ოლიმპიადაზე მონაწილეობისთვის.

ამერიკული გაზეთები ეჯიბრებიან ერთმანეთს რაც შეიძლება ზუსტი ინფორმაციის მიწოდებაში. უკვე დღეს არის ცნობილი, რომ სიაში ნამდვილად შევლენ NBA-ს ახალგაზრდა ვარსკვლავები - სტივენ კარი, დემარკუს კაზინსი, დამიან ლილარდი, პოლ ჯორჯი.

ყველაზე მოხერხებული აღმოჩნდა ESPN-ის მიმომხილველი მარკ სტეინი, რომელმაც სიის თავისი ვერსია შემოგვთავაზა:

მცველები: ბრედლი ბილი, სტივენ კარი, კაირი ირვინგი, ჯეიმს ჰარდენი, გორდონ ჰეივორდი, დამიენ ლილარდი, კრის პოლი, დერიკ როუზი, კლეი ტომპსონი, რასელ უესტბრუკი, დერონ უილიამსი.

ფორვარდები: კარმელო ენტონი, ანდრე იგუოდალა, ლებრონ ჯეიმსი, კაილ კორვერი, კავაი ლეონარდი, კევინ დურანტი, პოლ ჯორჯი, ბლეიკ გრიფინი, კევინ ლავი.

ცენტრები: დამარკუს ოლდრიჯი, ტაისონ ჩენდლერი, დემარკუს კაზინსი, ენტონი დევისი, დუაიტ ჰოვარდი, დევიდ ლი, ანდრე დრამონდი, კენეტ ფარიდი.

Yahoo!Sports-ის მიმომხილველის, ედრიან ვოინაროვსკის ინფორმაციით, კრის პოლი, კარმელო ენტონი და ლებრონ ჯეიმსი გამოტოვებენ მსოფლიოს ჩემპიონატს ესპანეთში, მაგრამ ითამაშებენ 2016 წელს, ზაფხულის ოლიმპიადაზე. ნაკრებში აღარ იქნება კობი ბრაიანტი. როგორც უკვე ვწერდით, "ლეიკერსის" ლიდერმა დაასრულა სანაკრებო კარიერა.

გარდა ამისა, ვოინაროვსკიმ ახსნა ამ სიაში დუაიტ ჰოვარდის გამოჩენა, რომელსაც 2008 წლის შემდეგ არ უთამაშია ეროვნულ გუნდში. როგორც ირკვევა, "ჰიუსტონის" ცენტრმა თავად გამოთქვა მსოფლიოს ჩემპიონატზე გამოსვლის სურვილი.

აღვნიშნავთ, რომ აშშ-ის ნაკრებს ესპანეთშიც და რიო-დე-ჟანეიროშიც ტიტულის დაცვა მოუწევს.

* * *
იტალიური გაზეთის, "კორიერე დელო სპორტის" ინფორმაციით, ჩინეთი, ბრაზილია და საბერძნეთი მიიღებენ ოთხიდან სამ "უაილდ-ქარდს" მსოფლიოს 2014 წლის ჩემპიონატში მონაწილეობისთვის. მეოთხე საგზურზე პრეტენზიას რუსეთი, იტალია და თურქეთი აცხადებენ.

გამოცემის ცნობით, საბერძნეთმა კალათბურთის საერთაშორისო ფედერაციას მილიონი ევრო შესთავაზა "უაილდ-ქარდის" სანაცვლოდ. რაც შეეხება დარჩენილ ერთ ვაკანსიას, მისი მიღების ფავორიტია თურქეთი, რადგან მას ზურგს უმაგრებენ მძლავრი სპონსორები - Turkish Airlines-ი და BEKO.

ყოველდღიური სპორტული გაზეთი "ლელო"