ესპანეთმა უკრაინას მოუგო – საქართველოს მომდევნო მეტოქეები ნიდერლანდები და იტალიაა

AutoSharing Option
კალათბურთში მსოფლიოს 2023 წლის ჩემპიონატის საკვალიფიკაციო ტურნირის პირველი ჯგუფური ეტაპი დასრულდა. 8-დან 7 ჯგუფში ყველაფერი 4 ივლისს დალაგდა, მხოლოდ ჩვენს ჯგუფში იყო დარჩენილი ერთი მატჩი, რომელიც 3 თვის წინ უნდა ჩატარებულიყო და უკრაინაში დაწყებული ომის გამო გადაიდო. უკრაინელებმა, საქართველოს მსგავსად, ლატვიის დედაქალაქ რიგაში უმასპინძლეს ესპანელებს და დაძაბულ ბრძოლაში – 76:77 დამარცხდნენ, რაც საქართველოს ნაკრებისთვის კარგი შედეგი გახლდათ და აი, რატომ:

უკრაინას რომ მოეგო, ჩვენი ჯგუფის 3 ნაკრებს – ესპანეთს, უკრაინას და საქართველოს, თანაბარი ქულები – 4 გამარჯვება და 2 მარცხი
უგროვდებოდა. ამ გუნდებს შორის ბურთების შეფარდებით კი პირველზე ესპანეთი, მეორეზე უკრაინა და მესამეზე საქართველო გავიდოდა. თუმცა დაკავებულ ადგილებს ამ შემთხვევაში არანაირი მნიშვნელობა არ ჰქონდა. აქ საქართველოსთვის ცუდი ის იყო, რომ მეორე ჯგუფურ ეტაპზე უკრაინას დამატებით ესპანეთთან გამარჯვება გაჰყვებოდა – ანუ ჩვენც და უკრაინასაც მომდევნო ეტაპზე თანაბარი: 2-2 მოგება გვექნებოდა. თუ იმასაც გავითვალისწინებთ, რომ უკრაინას ჩვენთან ნათამაშებ პირველი ჯგუფური ეტაპის მატჩებში ბურთების შეფარდების წყალობით უპირატესობა აქვს (5 ქულით წააგო და 13-ით მოგვიგო), ეს მომენტი, რა თქმა უნდა, სლავებს მნიშვნელოვან უპირატესობას ანიჭებდა.

ახლა კი რა ხდება? მეორე ჯგუფურ ეტაპზე ჩვენ წინ ესპანეთი, იტალია და ისლანდიაა (სამივეს 3 მოგება), საქართველო კი მე-4 ადგილზეა 2 მოგებით. შემდეგ მოდიან 1 მოგების მქონე უკრაინა და გამარჯვების გარეშე მყოფი ნიდერლანდები. მეორე ჯგუფურ ეტაპზე საქართველო (ისევე, როგორც უკრაინა და ესპანეთი) 3 მეტოქესთან (იტალია, ისლანდია, ნიდერლანდები) 6 მატჩს (შინ და სტუმრად) გამართავს. 6 ტურის შემდეგ საუკეთესო 3 გუნდი მსოფლიოს ჩემპიონატის საგზურს მოიპოვებს.

მე-2 ჯგუფური ეტაპის ცხრილი
1. ესპანეთი 7 ქულა
2. იტალია 7 ქულა
3. ისლანდია 7 ქულა
4. საქართველო 6 ქულა
5. უკრაინა 5 ქულა
6. ნიდერლანდები 4 ქულა

6 ტურის მატჩი 3 ფანჯრის ფარგლებში გაიმართება. პირველი ფანჯრის 2 შეხვედრას საქართველო აგვისტოში გამართავს – 24-ში თბილისში ჰოლანდიას უმასპინძლებს, ხოლო 27 აგვისტოს სტუმრად იტალიას ეთამაშება. შემდეგი ორ მატჩს საქართველო ნოემბერში გამართავს, ხოლო ბოლო 2 ტური 2023 წლის თებერვალში დანიშნული ფანჯრის ფარგლებში ჩატარდება.

2022 წელი
24 აგვისტო,   საქართველო – ნიდერლანდები
27 აგვისტო,   იტალია – საქართველო

2022 წელი
11 ნოემბერი,   ისლანდია – საქართველო
14 ნოემბერი,   საქართველო – იტალია

2023 წელი
23 თებერვალი,   ნიდერლანდები – საქართველო
26 თებერვალი,   საქართველო – ისლანდია

GBF.GE

მკითხველის კომენტარები / 28 /
გაცილებით კარგი იქნებოდა პირველ ფანჯარაში,იტალია მიგვეღო და ნიდერლანდებთან სტუმრად გვეთამაშა.იტალიის უძლიერეს შემადგენლობიან ნაკრებს,ჩვენი უძლიერესი ნაკრები იტალიაში სავარაუდოდ ვერ მოუგებს და აქ,მეტი შანსი გვექნებოდა.ნიდერლანდებთან პირიქით,გასვლა გვერჩია,რადგან ჩვენი უძლიერესი შემადგენლობა სავარაუდოდ იქაც დაამარცხებს ,მერე,უკვე დასუსტებული შემადგენლობით კი,თბილისში მეტი შანსი გვექნებოდა მათ დასამარცხებლად.ახლა უკვე შენგელიაც ვეღარ დაგვეხმარება და თუ შერმადინიც გამოგვაკლდა,საქართველოს ჩემპიონატის ბიჭებით,ვისთან გვექნება რაიმე შანსი,ძალიან მეძნელება.
სოსო
01:30 09-07-2022
1
ცუდია , რომ ბიჭები არ გვეყოლება. საქართველოში მოთამაშე ბიჭებით წარმატებას ვერ მივაღწევთ. რა უაზრობაა. ნაკრები არაა პრიორიტეტი? რატომ არ უნდა გამოუშვან
ლევან მაღლაკელიძე
15:08 08-07-2022
1

ასევე დაგაინტერესებთ
სიახლეები პოპულარული