ევრობასკეტი 2017. 1/4 ფინალი: გასოლის გასროლა [VIDEO]

გერმანიის ნაკრებმა მერვედფინალურ სტადიაზე საფრანგეთი ჩამოიშორა. გერმანელი გულშემატკივრები იმედოვნებდნენ, რომ მათი კარგად "დაზეთილი" მექანიზმი ევრობასკეტის პირველ ფავორიტ ესპანეთსაც ღირსეულად ეთამაშებოდა. ასეც მოხდა, მაგრამ საფინალო სირენამ ლოგიკური ანგარიში დააფიქსირა. დენის შრიოდერის კლასი გასოლებისამ გადაფარა...

გადამწყვეტი: თამაში ესპანელთათვის არასასიამოვნოდ დაიწყო - გერმანია 9:2 გაიქცა. თუმცა ფავორიტები სერხიო სკარიოლოს ტაიმ-აუტის შემდეგ გონს მოეგნენ და ნელ-ნელა მათაც გაიკვლიეს გზა გერმანელთა კალათისკენ. ამ საქმეში, დიდი წვლილი პაუ გასოლს მიუძღვის. საბოლოოდ პირველი ტაიმი საკმაოდ დაბალშედეგიანი გამოდგა და ესპანელების მინიმალური გამარჯვებით დასრულდა - 34:33.

არც მეორე ტაიმი დაუწყიათ ცუდად გერმანელებს და მესამე მეოთხედის ბოლომდე ქულა-ქულაშიც კი მიდიოდა თამაში, მანამ სანამ მარკ გასოლმა პერიმეტრზე არ გაილაღა. მესამე სამიანის შემდეგ, მესამე რაუნდის დასრულებამდე 4 წამით ადრე ესპანეთი 12 ქულით დაწნაურდა (65:53). ასეთი უპირატესობის გაფლანგვა კი სკარიოლოს გამოცდილ ნაკრებს არ ეკადრებოდა და არც იკადრა. გერმანელთაგან თამაში ვისაც უნდა შემოეტრიალებინა, დენის შრიოდერი, ესპანელ რიკი რუბიოს უყურადღებოდ არ დაუტოვებია. საბოლოოდ დენისმა მატჩი 27 ქულითა და 7 შეცდომით დაასრულა.

სტატისტიკა არ ტყუის: ძირითად სათამაშო კომპონენტებში სხვაობა მეტ-ნაკლებად თანაბარი იყო. ასეთ მატჩებში ბევრს წყვეტს თუნდაც ერთით მეტი სამქულიანი. ესპანეთს კი 4-ით მეტი სამიანი ჰქონდა და 12-ქულის სხვაობითაც გაიმარჯვა.
გმირი: გერმანიის ნაკრებს წინა მატჩებში დაცვაში ყელაფერი კარგად გამოსდიოდა. ესპანეთთან კი გეგმები აურია ცენტრმა მარკ გასოლმა, რომელიც პერიმეტრზე ხშირად ადიოდა და 6-დან 4 სამქულიანიც გამოიყენა. ამას 6 ორქულიანი მიაყოლა (9-დან) და 28 ქულას უწია.

ნამატჩევს. მარკ გასოლმა NBA გაიხსენა:

- ამერიკაში მქონდა რამდენიმე მატჩი მოკლე დროში ქულებს უხვად რომ ვაგროვებდი. 2 წუთში 12 ქულაც ჩამიგდია. ასეთივე შემთხვევა იყო გერმანიასთან. თითქოს, კალათი რეალურზე განიერი იყო და ბურთი იოლად ჩადიოდა. მიხარია, რომ ამან გამარჯვება მოგვაპოვებინა და გავახარეთ ჩვენი გულშემატკივარი.

12 სექტემბერი
გერმანია-ესპანეთი 72:84
19:16, 14:18, 20:31, 19:19
გერმანია: შრიოდერი (27 + 8 პასი + 7 შეცდომა), ბარტელი (6), ბენზინგი (4), ვოიგტმანი (2 + 7 მოხსნა), ტადა – სასტარტო; ტაისი (15), ლო (9), ტიმანი (8), შტაიგერი (1), აკპინარი, ჰარტენშტაინი.
ესპანეთი: მ. გასოლი (28 + 10 მოხსნა), პ. გასოლი (19), სან-ემეტერიო (3), რუბიო (2 + 8 პასი + 5 შეცდომა), ნავარო – სასტარტო; როდრიგესი (11 + 7 პასი), სასტრე (8), ვ. ერნანგომესი (7), ორიოლა (4), ხ. ერნანგომესი (2), ვივესი.


***
ჩვენს ძველ ნაცნობებს - იგორ კოკოშკოვსა და აინარს ბაგაცკისს ამ ევრობასკეტზე ერთმანეთზე უკეთესი გუნდები ჰყავთ. ბაგაცკისის ლატვია ლაღ კალათბურთს თამაშობს (უფრო სწორად, თამაშობდა), ჩახლართულ კომბინაციებს სწრაფ შეტევებს ამჯობინებს. ამიტომაც იყო, ყოველ მატჩში 90-ქულას რომ სცილდებოდა. კოკოშკოვის სლოვენიაც სწრაფი და შემტევი გუნდია. ჰოდა, წინასწარ შეგვეძლო გვევარაუდა, რომ უხვქულიანი მატჩი გამოვიდოდა, თუმცა ჯამში 200 ქულა რომ ჩავარდებოდა, ალბათ, ვერავინ იწინასწარმეტყველებდა.

გადამწყვეტი: გადახედეთ მეოთხედების ანგარიშებს. ხან ერთი გუნდი გაიბრწყინებდა შეტევაში, ხან მეორე. ასეთ დროს კი გამარჯვება მას რჩება, ვინც გადამწყვეტ მომენტში გაიქცევა.

სლოვენიამ ლატვიას მესამე პერიოდში პრიმეტრი კარგად გადაუკეტა. ბალტიისპირელები მაიც სტყორცნიდნენ შორი მანძილიდან, მაგრამ მაინცდამაინც მესამეში მიზანს ვერ აღწევდნენ. მათ ფარქვეშ ერთადერთ იარაღი ჰქონდათ - კრისტაპს პორზინგისი. სოლიდური იარაღია, მაგრამ სლოვენიელებს იმდენად კარგად ჰქონდათ გადაკეტილი ფარის მისადგომები, რომ პორზინგისი ძირითადად საშუალო და შორი მანძილიდან ცდილობდა ქულების მოგროვებას. ბევრი იმუშავა სლავების ცენტრმა გასპარ ვიდმარმა, რომელმაც ბოლოს ხუთი ჯარიმის გამო დატოვა მოედანი.

სლოვენიელები პერიმეტრიდანაც არ ჩამორჩნენ მეტოქეს, ფარქვეშ შესვლებიც გაომსდიოდათ და საშუალო დისტანციიდანაც აგდებდნენ - შედარებით მრავალფეროვანი შეტევითი იარაღი აღმოაჩნდათ. მესამე პერიოდში 12-ქულიანი უპირატესობის მოპოვების შემდეგ სლოვენიელთა დაცვას სერიოზული ჩავარდნა აღარ მოსვლია და გამარჯვებაც დამსახურებულად მოიპოვა.

სტატისტიკა არ ტყუის: როგორც აღვნიშნეთ, სლოვენიის ნაკრები ფარქვეშ ძალიან მჭიდროდ თამაშობდა, პორზინგისს გასაქანს არ აძლევდა. შედეგად, ფარიდან ასხლეტილ ბურთებს თეთრები უფრო ხშირად ეუფლებოდნენ: სლოვენიამ მოხსნებში 41:28 იმარჯვა. სამქულიანები კი ორივემ უხვად ჩააგდო - 12:11 ლატვიის სასარგებლოდ.

გმირი: ლუკა დონჩიჩი და გორან დრაგიჩი შეუჩერებლები იყვნენ. პირველმა 27 ქულა ჩააგდო, ხოლო დრაგიჩმა - 26. გორანის 26-ე ქულას გუნდისთვის ოქროს ფასი ჰქონდა: საფინალო სირენამდე 30 წამით ადრე თანაგუნდელები 97:92 დააწინაურა, რის შემდეგაც ლატვიელები განზრახ ფოლებზე გადავიდნენ, მაგრამ - უშედეგოდ.

ასე და ამგვარად, ნახევარფინალში სლოვენია ესპანეთს შეხვდება. მანამდე კი ორი მეოთხედფინალია.


სლოვენია-ლატვია 103:97
34:23, 17:32, 25:11, 27:31
სლოვენია: დრაგიჩი (26 + 8 პასი + 6 შეცდომა), დონჩიჩი (27 + 9 მოხსნა), რენდოლფი (16 + 9 მოხსნა), ვიდმარი (9), ჩანჩარი (3) – სასტარტო; პრეპელიჩი (17), მურიჩი (4), ბლაჟიჩი (1), ნიკოლიჩი, ზაგორაცი, დიმეცი.
ლატვია: პორზინგისი (34), დაირის ბერტანსი (12 + 6 პასი), შმიტსი (10), ტიმა (9), შტრელნიეკსი (4 + 9 პასი) – სასტარტო; დავის ბერტანსი (23), ბლუმსი (3), პეინერსი (2), გრაჟულისი.

1/4 ფინალი
13 სექტემბერი
19:45 საბერძნეთი-რუსეთი
22:30 იტალია-სერბეთი

1/2 ფინალი
14 სექტემბერი
22:30 ესპანეთი-სლოვენია

ყოველდღიური სპორტული გაზეთი "ლელო"