სტეფი დაბრუნდა, ზაზა არა - "გოლდენ სტეიტმა" "პელიკანსს" მეორეც მოუგო [VIDEO]

2 მაისს, გამთენიისას, ზაზა ფაჩულიას "გოლდენ სტეიტმა" შინ პლეი-ოფის სერიის მეორე მატჩში "ნიუ ორლეანი" ანგარიშით 121:116 დაამარცხა.

სამწუხაროდ, პარკეტზე კვლავ ვერ ვიხილეთ ქართველი ცენტრი, თუმცა "უორიორსს" დაუბრუნდა გუნდის ლიდერი სტეფ კარი, რომელმაც 28 ქულა ჩააგდო.

ერთით მეტი მიითვალა კევინ დურანტმა. აღსანიშნავია დრეიმონდ გრინის გარჯა, რომელსაც სამმაგ დუბლამდე ერთი მოხსნა დააკლდა. გრინმა 20 ქულა, 12 პასი და 9 მოხსნა ჩაიწერა აქტივში.

კლეი ტომპსონმა 10 ქულა ჩააგდო. ცენტრებიდან "გოლდენ სტეიტში" პარკეტზე მხოლოდ დევიდ უესტი გამოჩნდა, რომელმაც 10 წუთში 4 ქულა მიითვალა.

"პელიკანსიდან" ენტონი დევისი და რეიჯონ რონდო გამოირჩნენ. დევისმა 25 ქულა, 15 მოხსნა და 5 პასი მოაგროვა, ხოლო რონდომ - 20 ქულა, 12 პასი და 7 მოხსნა.


ამ მოგების შემდეგ ოკლენდელები სერიაში 2:0 დაწინაურდნენ. ზაზა ფაჩულიას გუნდი მომდევნო მატჩს სტუმრად 5 მაისს, ჩვენი დროით 04:00 საათზე გამართავს.

დღის მეორე შეხვედრაში "კლივლენდმა" სტუმრად "ტორონტო" ოვერტაიმში 113:112 დაამარცხა და სერიაში დაწინაურდა 1:0. "კავალიერსს" ლებრონ ჯეიმსმა ულიდერა, რომელმაც სამმაგი დუბლი შეასრულა. ლებრონმა 26 ქულა, 13 პასი და 11 მოხსნა ჩაიწერა აქტივში.