ბითაძის კარიერის საუკეთესო მატჩი და პირველი ორმაგი დუბლი პლეი-ინში [VIDEO]

გოგა ბითაძემ ნბა-ს კარიერის განმავლობაში ყველაზე შედეგიანი მატჩი ჩაატარა და ამისთვის მას მხოლოდ 18:42 წუთი დასჭირდა. "ინდიანა პეისერსის" ქართველმა ცენტრმა ახალი ფორმატის ეგიდით ჩატარებულ მატჩში გამოიჩინა თავი, რომელში წაგებაც "ინდიანასთვის" სეზონის დასრულებას ნიშნავდა.

NBA-ს პლეი-ოფში პირდაპირი გზით თითო კონფერენციის 6-6 საუკეთესო გუნდი გავიდა. კონფერენციებში VII, VIII, IX და X ადგილებზე გასული გუნდები კი საკვალიფიკაციო რაუნდს თამაშობენ პლეი-ოფში დარჩენილი 2 ადგილის შესავსებად. ახალი ფორმატის თანახმად, VII და VIII ადგილებზე გასულ გუნდებს შორის გამარჯვებული პლეი-ოფში პირდაპირ გადის, ხოლო წაგებული პლეი-ოფის ბოლო საგზურისთვის IX და X ადგილებზე გასულებს შორის გამარჯვებულს შეხვდება.

"ინდიანამ" აღმოსავლეთ კონფერენციაში მე-9 ადგილი დაიკავა, პირველ საკვალიფიკაციო მატჩში მე-10-ზე გასულ "შარლოტ ჰორნეტსს" შეხვდა და 144:117 გაანადგურა. სწორედ ამ შეხვედრაში დააფიქსირა ბითაძემ ნბა-ს კარიერის საუკეთესო შედეგი. ქართველმა ცენტრმა 14 ქულა, 10 მოხსნა, 3 დაფარება, 1 პასი და 1 ჩაჭრა ისე მიითვალა, ბურთი არ დაუკარგავს.

14 ქულა ბითაძის პირადი რეკორდის გამეორებაა NBA-ში. პირველად მან 14 ქულა გასულ აპრილს, "მინესოტასთან" მოგებულ მატჩში მიითვალა. რაც შეეხება ორმაგ დუბლს, ქართველმა ცენტრმა ამერიკულ კარიერაში მეორედ გამოსახა 2 სტატისტიკური მაჩვენებელი ორნიშნა ციფრით. პირველად ეს მან თავის მე-3 საკარიერო მატჩში, 2019 წლის 2 ნოემბერს, "კლივლენდთან" 102:95 მოგებულ მატჩში მოახერხა, როცა 25 წუთში 10 ქულა და 10 მოხსნა მიითვალა.

აღსანიშნავია, რომ მიმდინარე სეზონში გოგამ პირველად მიაღწია 10-მოხსნიან ბარიერს. კარიერაში კი მან ეს სტატისტიკური მაჩვენებელი ორნიშნა ციფრით მესამედ გამოსახა. დღევანდელ მატჩში ბითაძემ მეორე პერიოდში არასრული 7 წუთი ითამაშა, ხოლო ბოლო პერიოდში მთელი 12 წუთი იმყოფებოდა მოედანზე. ქართველმა ცენტრმა 8-დან 4 ორქულიანი და 8-დან 6 საჯარიმო ჩააგდო. მან მეორე პერიოდში ლამელო ბოლსა და მალიქ მანკს დაუფარა, ხოლო მეოთხეში – ნიკ რიჩარდსს.

"ინდიანაში" საუკეთესო შედეგი დომანტას საბონისმა დააფიქსირა, რომელმაც ბითაძის მსგავსად, 14 ქულა, თუმცა 21 მოხსნა და 9 პასი მიითვალა. ბომბარდირი 23 ქულით ოში ბრისე გახდა, 21 ქულა დაგ მაკდერმოტმა მოაგროვა. მიუხედავად იმისა, რომ ინდიანელთა ძირითადი ცენტრი მაილს ტერნერი ტრავმირებულია, ბითაძე სასტარტო ხუთეულში არ ყოფილა.

"ინდიანას" პლეი-ოფამდე 1 ნაბიჯი დარჩა. ხვალ ბითაძის გუნდი "ვაშინგტონს" ხვდება, რომელმაც საკვალიფიკაციო მატჩი "ბოსტონთან" წააგო. "ბოსტონი" პლეი-ოფში გავიდა, ხოლო "ვაშინგტონი" პლეი-ოფში გასასვლელად "ინდიანას" 20 მაისს დაუპირისპირდება.

GBF

გოგამ ლებრონს მეორედ დაუფარა! ბითაძემ ჩემპიონებთან კარიერის ერთერთი საუკეთესო მატჩი ჩაატარა [VIDEO]