25-ე ტურის მორიგ მატჩში უიმედო აუტსაიდერი "სოხუმი" "მგზავრებს" შეხვდა და 17 ქულის სხვაობით - 83:100 დამარცხდა. ოფიციალურად ჯერ არ გადაწყვეტილა, თუმცა, ფაქტობრივად, სოხუმელები რეგულარულ ჩემპიონატში ბოლო ადგილს დაიკავებენ. გუნდმა 1 ლეგიონერის გარდა ყველა გაუშვა და დარჩენილ თამაშებში, ძირითადად, ახალგაზრდებს დაეყრდნობა.ასეთ ვითარებაში სოხუმელებს ნებისმიერი მეტოქის დამარცხების ძალიან მიზერული შანსი აქვთ. შესაბამისად, გია კაზანჯიანის გაწვრთნილმა გუნდმა მორიგ მეტოქე "მგზავრებთანაც" ვერაფერი გააწყო. მართალია, სოხუმელებმა იბრძოლეს, მაგრამ ეს მხოლოდ მატჩისთვის ინტრიგის შენარჩუნებას გასწვდა. დასკვნით ათწუთეულში "მგზავრების" ლიდერობამ 30 ქულას მიაღწია და ყველაფერი გაირკვა.
ბუბა ბერიშვილი, "მგზავრების" მთავარი მწვრთნელი: "მოხარული ვარ, რომ ზედიზედ მე-4 თამაში მოვიგეთ. რეალურად გუნდი კარგ ფორმაშია, მაგრამ ეს არ კმარა იმისთვის, რა მიზნებიც გვაქვს. გვინდა ოთხეულში შესვლა და ვემზადებით, რათა დავხვეწოთ ყველა კომპონენტი და შესაბამისად, პლეი-ოფისთვის მოვემზადოთ".
გია კაზანჯიანი, "სოხუმის" მთავარი მწვრთნელი: "გუნდის მიზანი ახლა სეზონის ჩამთავრებაა. ფაქტობრივად, გადაწყვეტილია, რომ პლეი-ოფში ვერ გავალთ. ლეგიონერები გავუშვით. მხოლოდ ახალგაზრდა უკრაინელი, სერგეი პრიმარკი დარჩა და ახალგაზრდები დარჩენილ თამაშებში გამოცდილებას იღებენ".
მომზადებულია Gbf.ge-ს მიხედვით
