დიდი 10: "ჯიქის" ბონუსი და "ხარების" უმნიშვნელოვანესი გამარჯვება

AutoSharing Option
© ანი რეხვიაშვილი

დიდი 10-ის განახლებული სეზონის დღევანდელ მატჩებში, გორის ‘ჯიქმა’ და რუსთავის ‘ხარებმა’ უშუალო კონკურენტები დაამარცხეს. პირველმა ‘აკადემიასთან’ ბონუსიც აიღო და ექვსეულში შესვლის კარგი შანსი შეინარჩუნა, ხოლო მეორემ ლიდერ ‘ბათუმს’ მიმდინარე სეზონში მეორე მარცხი აწვნია.

„შევარდენზე“ გორელებმა აქტიურად, მაღალ ტემპში დაიწყეს თამაში და 5 წუთში ორი ლელო გაიტანეს. დებიუტში მათ კარგი შეტევა საკუთარი ნახევრიდან წამოიწყეს, მარცხენა ფრთაზე ბურთი სწრაფად ჩაათამაშეს და ცენტრალური ხაზი გადაკვეთეს. მერე ის ფეხით საპირისპირო ფრთაზე გადაკიდეს, სადაც რიცხობრივი უპირატესობა ჰქონდათ, თუმცა მისი გამოყენება ვერ შეძლეს.
საქმეში მორკინალები ჩაერთვნენ, რამდენიმე დარტყმის შემდეგ, დიტო კიკნაძემ ბურთი ძელებსშუა ფეხით შეაცურა და მას ნიკა სამხარაძე მიყვა.

ორიოდე წუთში დავით მოძღვრიშვილს 22-იდან ფეხით მოგერიებისას ნიკა სუხაშვილმა დაუფარა და ლელო თავადვე გაიტანა. კიკნაძემ ორივე ლელო გარდასახა - 14:0. ამის შემდეგ თამაში გათანაბრდა და ჯერ მოძღვრიშვილს, მერე კი კიკნაძეს გაუცუდდათ ჯარიმები. ‘ჯიქმა’ მესამე ლელო 34-ე წუთზე გაიტანა, სუხაშვილმა მეტოქის 22-ში დანიშნული შერკინებიდან შეუტია, ერთი მცველი კონტაქტით ჩამოიშორა, კიდევ ორი აიყვანა და ოფლოუდით ლელოში გიორგი მჭედლიშვილი შეუშვა. ამჯერად გარდასახვა არაზუსტი იყო.

სტუმრებმა მეოთხე ლელო მეორე ტაიმის დასაწყისში გაიტანეს. დერეფნიდან აგორებულ მოლს ლევან დათუნაშვილი მოწყდა და მისი შემჩერებელი აღარავინ დარჩა - 24:0. 62-ე წუთზე ‘ჯიქმა’ კვლავ დერეფნიდან შეუტია, დავით ხიდეშელმა ბურთი 5-მეტრიან წყვეტილთან მიიღო, შეუტია და დათუნაშვილის დახმარებით ლელოს ხაზი გადაკვეთა. ამჯერად კიკნაძემ გარდასახვა ზუსტად შეასრულა - 31:0.

მატჩის მიწურულს ‘აკადემიამ’ ერთი საპასუხო ლელოს გატანა მოახერხა, საბა ილურიძე ფეხით შეცურებულ ბურთს მიყვა, თუმცა ამან ‘ჯიქს’ ხასიათი ვარ წაუხდინა და მათ სეზონი ბონუსით მოგებით გახსნეს - 31:5. შედეგად, გორელები ექვსეულის ზონის მახლობლად რჩებიან და ფლეი ოფის საგზურისთვის ბრძოლას განაგრძობენ.

ტურის ცენტრალურ შეხვედრაში ‘ხარებმა’ ლიდერს, ‘ბათუმს’ რუსთავში უმასპინძლა და 13:8 დაამარცხა. აღსანიშნავია, რომ ‘ბათუმმა’ მიმდინარე სეზონში სულ ორი თამაში წააგო და ორივე ‘ხარებთან’. შედეგად, ის და ‘ლოკომოტივი’, რომელმაც თავისი თამაში გუშინ ბონუსით მოიგო, ზღვისპირელებს მიუახლოვდნენ.

მასპინძლებმა დაძაბულ მატჩში მნიშვნელოვანი უპირატესობა დებიუტშივე მოიპოვეს. მათ ჯერ საჯარიმო ლელო გამოიმუშავეს, მერე კი კობა ბუჯიაშვილმა ჯარიმა გაიტანა და 10:0 მე-10 წუთზე და შესვენებამდე ანგარიში აღარ შეცვლილა.

‘ბათუმი’ თამაშში მეორე ტაიმში დაბრუნდა: 53-ე წუთზე მამუკა ნინიძემ ლელო გაიტანა, თუმცა გარდასახვა არაზუსტი იყო. სამაგიეროდ, მან 72-ე წუთზე ჯარიმიდან კიდევ 3 ქულა აიღო, მაგრამ ‘ხარებმა’ ძალები მოიკრიბა, ქულა აღარ მიიღო, ხოლო წერტილი გიორგი ბასილაიამ არეკნით დასვა და ‘ხარებმა’ მნიშვნელოვან მატჩში 13:8 იმარჯვა.

მომზადებულია rugby.ge-ს მიხედვით
ტეგები:
მკითხველის კომენტარები / 0 /
კომენტარი ჯერ არ გაკეთებულა.

სიახლეები პოპულარული