დიდი 10 | ლელო 19:16 არესი

თბილისის "ლელო სარასენსმა" ქუთაისის "არესთან" პირველ ტაიმში მოპოვებული 10-ქულიანი უპირატესობა შეინარჩუნა და დაძაბულ მატჩში 19:16 გაიმარჯვა.

დიდ დიღომში, „ლელო არენაზე“, ანგარიშის გახსნის შესაძლებლობა თავიდან სტუმრებმა მიიღეს, მაგრამ ჯარიმა არაზუსტი იყო. საწყის 26 წუთში გუნდები ხშირად ჯარიმდებოდნენ და ირაკლი ყიასაშვილმა სამი ზუსტი დარტყმა შეასრულა, რაზეც "არესმა" გიორგი თევდორაძის ერთი ჯარიმით უპასუხა.

თევდორაძემ 29-ე წუთზე არეკნით ჩამორჩენა 3 ქულამდე შეამცირა, თუმცა მალევე გაგა ქევხიშვილმა ხაზი გაჭრა, ლელო ძელებშუა გაიტანა, ყიასაშვილმა კი გარდასახა და ტაიმი 16:6 დასრულდა.

"არესმა" საპასუხო ლელო 56-ე წუთზე გაიტანა. ცოტნე კვესელავამ ბურთი საკუთარ 22-თან ჩაჭრა და ლელომდე 80 მეტრი ირბინა. თევდორაძემ გარდასახვის შემდეგ ჯარიმა გაიტანა და 63-ე წუთზე წონასწორობა აღადგინა, მაგრამ მატჩის საუკეთესო მოთამაშე ყიასაშვილს საპასუხო ჯარიმის გასატანად სულ 3 წუთი დასჭირდა და მასპინძლები კვლავ წინ გაიყვანა. ორივე გუნდის მცდელობის მიუხედავად დარჩენილ დროში ანგარიში აღარ შეცვლილა და "ლელომ" 19:16 გაიმარჯვა.

დიდდიღმელებს 44 ქულა მოუგროვდათ, ქუთაისის "აიას" ურთიერთშეხვედრებით გადაასწრეს და პირველ ადგილზე აღზევდნენ. "არესმა" ნუგეშის ქულა აიღო, 26-ით "ხვამლს" გაუტოლდა, მას ურთიერთშეხვედრებით გადაასწრო და მე-6 პოზიციაზეა.

წყარო: Rugby.ge