"ბორჯღალოსნების" ღია ვარჯიში აშშ-სთან შეხვედრამდე

"ბორჯღალოსნებმა" წლის დამაგვირგვინებელი მატჩის წინ ‘შევარდენის" სანაკრებო ბაზაზე ღია ვარჯიში გამართეს. თიბისი რაგბის სერიების მეორე შეხვედრაში ჩვენი გუნდი აშშ-ს (არწივებს) 25 ნოემბერს, "მიხეილ მესხზე" ერკინება.

თამაში 18 საათზე იწყება და ბილეთების შეძენა შესაძლებელია ‘მიხეილ მესხის’ სალაროებში 11-იდან 19 საათამადე და ონლაინ TKT.GE/TBCRugbySereis

საქართველოს რაგბის კავშირის პრეზიდენტი გოჩა სვანიძე, გასულ შაბათს უელსთან გამართული მატჩის შედეგით კმაყოფილი არაა, ხოლო მომავალ თამაშზე ფიქრობს, რომ ბორჯღალოსნებმა მაქსიმალური მობილიზებით უნდა ითამაშონ:

"არც მე,მწვრთნელები და მოთამაშეები ამ შედეგით ბედნიერები არ ვართ. ეს იყო თამაში, რომლისგანაც შესაბამისი დასკვნები უნდა გამოვიტანოთ.

რაც შეეხება აშშ-ს ნაკრებს, ესაა გუნდი, რომელიც წამიერ მოდუნებასაც არ გაპატიებს და თუნდაც 25 ქულას იგებდე, არ დანებდება და საკუთარ შანსს აუცილებლად გამოიყენებს. სწორედ ამიტომ, 25-ში განსაკუთრებულად დიდი ყურადღება გვმართებს, რათა იმ უპირატესობამ, რომელიც გვაქვს, დათვური სამსახური არ გაგვიწიოს და ეს გუნდშიც კარგად იციან“.

შემადგენლობა ჯერ არ გაცხადებულა, თუმცა ბორჯღალოსანთა დაცვის მწვრთნელი ლევან მაისაშვილი ამბობს, რომ წინა ორი შეხვედრისგან განსხვავებით, შემადგენლობაში ტაქტიკური ცვლილებები იქნება:

"ამერიკასთან მატჩს მომზადებული ვხვდებით. უელსიდან დაბრუნების შემდეგ გავიარეთ რეაბილიტაცია და შევუდექით მზადებას. გვყავს რამდენიმე ტრავმირებული მოთამაშე, შემადგენლობაში გვექნება ტაქტიკური ცვლილებებიც. ვცდილობთ დავხვეწოთ ჩვენი თამაში, როგორც შეტევაში, ასევე დაცვაში და თუ ხარისხი გვექნება, შედეგიც შესაბამისი დადგება.

უელსთან ასეთ შედეგს არავინ ელოდა. ანგარიში შესაძლოა დამაკმაყოფილებლად ჩაითვალოს, თუმცა შედეგით კმაყოფილები ნამდვილად არ ვართ. რეალურად გვქონდა შანსი, რომ მატჩი ფრედ დაგვესრულებინა, თუმცა შანსი ხელიდან გავუშვითდა ვეცდებით აშშ-სთან უკეთ ვითამაშოთ“.

ლაშა ლომიძეს "არწივებთან" ოთხი წლის წინ რუსთავში გამართული ტესტი კარგად ახსოვს და ახლაც დაძაბული ბრძოლის მოლოდინშია:

"ამერიკა იოლად დასამარცხებელი გუნდი არაა, რაშიც წლების წინ რუსთავში გამართულ მატჩშიც დავრწმუნდით. მათ ძალიან კარგი ხაზის მოთამაშეები ყავთ. უელსთან ვერ დავიჯერეთ, რომ მოგება შეგვეძლო და მნიშვნელოვანია, რომ ახლა ჩვენი ძალების გვწამდეს და ვაჩვენოთ ის თამაში, რასაც ვგეგმავთ“.

კვაჭი შალვა მამუკაშვილი ფიქრობს, რომ ამ თამაშის შედეგზე მთელი წლის შეფასება იქნება დამოკიდებული:

"2017 წლის ბოლო მატჩია და სეზონის შეფასებაც მისი შედეგის მიხედვით მოხდება. ამიტომ, მოედანზე მაქსიმალურად მობილიზებული უნდა გავიდეთ. მართალია უელსში მგზავრობამ და მძიმე თამაშმა ცოტა დაგვღალა, მაგრამ ოპტიმალურ ფორმაში ვიმყოფებით და სათამაშოდ მზად ვართ“.

გიორგი ჩხაიძე შაბათს მეასე სანაკრებო კეპს მოიხვეჭს და მესამე ბორჯღალოსანი ცენტურიონი გახდება:

"ბედნიერი ვარ, რადან მეასედ დავდგები საქართველოს ჰიმნზე. ასევე ბედნიერი ვარ, რადგან იმ ბიჭების გვერდითაც მითამაშია, რომლებიც ახლა გუნდში აღარ არიან. არასდროს ყოფილა ჩემი მიზანი, რომ ნაკრებში მაინცდამაინც 100 თამაში ჩამეტარებინა და ამ შეხვედრისთვისაც ჩვეულებრივად ვემზადები. ისევე, როგორც სხვა შემთხვევებში, გავალთ მოედანზე და ბოლომდე ვიბრძოლებთ. ვფიქრობ, კარგად მოვემზადეთ და იმედია გამარჯვებას მოვიპოვებთ.

აშშ-ს ნაკრები ისევე ვითარდება, როგორც ჩვენ. სწრაფი და ღონიერი ბიჭები ყავთ, მოედანზე კარგად გადაადგილდებიან და ვფიქრობ, იოლი თამაში არ გვექნება“.

rugby.ge