ფოტო: rugby.ge/გოგიტა ბუხაიძე
"ბორჯღალოსნები" 2019 წლის რაგბი ევროპის ჩემპიონატის დასკვნითი მატჩისთვის "შევარდენზე" ემზადებიან და დღეს ჟურნალისტებისა და ქომაგებისთვის ღია ვარჯიში გამართეს.
შეგახსენებთ, მილტონ ჰეიგის შეგირდებმა გერმანიის 52:3 ძლევით ტიტული მე-11-ედ მოიპოვეს. ჩვენი გუნდი 17 მარტს სტუმრად კრასნოდარში, საქართველოს დროით 16:00 საათზე ტრადიციულ მეტოქეს, რუსეთის ნაკრებს ეთამაშება და მისი ძლევით მერვე სლემის (ყველა თამაშის მოგება) შესრულებას ეცდება.
წვრთნა ორ საათზე მეტხანს გაგრძელდა. ხაზი და შერკინება ცალ-ცალკე გახურდა, მერე კი ბიჭები ორ გუნდად გაიყვნენ და სხვადასხვა სტატიკური ფაზიდან შეტევასა და დაცვაში ივარჯიშეს.
მილტონ ჰეიგი: "დღეს ძალიან კარგი ვარჯიში გვქონდა. ხვალ ბიჭებს დავასვენებთ და ზეგ, კრასნოდარში გაფრენამდე კიდევ ერთი ვარჯიში გვექნება. რამდენიმე მცირე ტრავმა გვაქვს, სერიოზული არაფერია, თუმცა პარასკევს მათ მდგომარეობას კიდევ ერთხელ გადავხედავთ და შემადგენლობასაც ამის შემდეგ დავასახელებთ.
ქართველებისთვის რაგბი ევროპის ჩემპიონატში რუსეთთან თამაში ყოველთვის ყველაზე მნიშვნელოვანია. ეს მხოლოდ სპორტული დაპირისპირება არაა და ვფიქრობთ, გულშემატკივარს კვირას კარგ წარმოდგენას ვაჩვენებთ. რუსეთის ნაკრები უწინდელთან შედარებით უფრო სწრაფი და ათლეტური გუნდია. მათ ყველა კომპონენტში ეტყობათ გაუმჯობესება და ბურთსაც სწრაფად ათამაშებენ. ახლა რუსეთის ნაკრებს უფრო ბევრი იარაღი აქვს, თუმცა ჩვენ მზად ვართ და მხოლოდ გამარჯვებისთვის ვიბრძოლებთ".
ზურაბ ჟვანია: "მართალია, რაგბი ევროპის დასრულებამდე ერთი კვირით ადრე ჩემპიონობა გავინაღდეთ, მაგრამ რუსეთთან თამაში, მათი სტუმრად დამარცხება, ჩვენი ქვეყნისთვის უმნიშვნელოვანესია. მე მჯერა ჩემი ნაკრების, ჩვენი ბიჭების და საქართველოში აუცილებლად გახარებულები დავბრუნდებით. ჩვენ ამ გამარჯვებას ქართველ ხალხს მივუძღვნით!"
ლაშა ხმალაძე: "მეტოქე ნამდვილად გაზრდილია. რუსული კლუბები, მათი ნაკრების მოთამაშეები, რეგულარულად თამაშობენ ჩელენჯ ქაფზე და ეს მათ გაზრდაში დაეხმარა. ფიზიკურად და ტექნიკურად ახლა ისინი უკეთ გამოიყურებიან, თუმცა ჩვენც გავიზარდეთ, ახალგაზრდული ნაკრებებიდან ძალიან კარგი, ტექნიკური და სხარტი ბიჭები ამოდიან.
როგორც ყოველთვის, ეს თამაში ახლაც მნიშვნელოვანია. არა აქვს მნიშვნელობა, ჩემპიონები გავხდით თუ არა, რუსეთთან მატჩი ყოველთვის პრინციპული იქნება და ასეა ახლაც. მეტოქეს რის საშუალებასაც მისცემ, იმას მოიმოქმედებს. ვეცდებით, რომ რუსებს პირველივე წუთებიდან გავუქროთ მოგებაზე ფიქრის საშუალება".
![alt](/pictures/image50/1451e7f33218eaf93f78c17e3dfd047c.png "ეს მხოლოდ სპორტული დაპირისპირება არაა - "ბორჯღალოსნები" რუსეთთან მატჩისთვის ემზადებიან")
"ბორჯღალოსნების" საჩუქარი პატარა ქომაგს და სიმღერა - მილტონ ჰეიგი ვიდეოს ავრცელებს [VIDEO]
მომზადებულია rugby.ge-ს მიხედვით
