მერაბ შარიქაძე: პასუხისმგებლობას ვგრძნობთ და უკეთეს თამაშს გპირდებით

"ბორჯღალოსანთა" კაპიტანი მერაბ შარიქაძე მუხლის ტრავმით გამოწვეული 1-წლიანი და 12-დღიანი იძულებითი შესვენების შემდეგ მოედანზე პირველად გავიდა.

23 ოქტომბერს, მან „მარიფილდზე“ შოტლანდიის წინააღმდეგ პირველიდან 58-ე წუთამდე ითამაშა.

„ნაკრებთან ერთად რთული, მაგრამ ეფექტური რეაბილიტაცია გავიარე. არაფერს შევუწუხებივარ და ფიზიკურად თავს კარგად ვგრძნობდი. მოედანზე რაც უფრო მეტ დროს გავატარებ, სათამაშო რეფლექსები მით უფრო გაშალაშინდება“ – თქვა შარიქაძემ.

ხანგრძლივი, 8-თვიანი შესვენების შემდეგ, პირველად ითამაშა საქართველოს ნაკრებმა და მორაგბეების დიდმა ნაწილმა, რაც შოტლანდიასთან მატჩის ანგარიშზეც აისახა და მასპინძლებმა 48:7 მოიგეს.

„ხანგრძლივი შესვენების შემდეგ მარტივი თამაში რომ არ იყო, ანგარიშიდანაც ჩანს. თავს არ ვიმართლებთ, ვიცით ჩვენი შეცდომები და პასუხისმგებლობასაც სრულად ვიღებთ, თუმცა ფაქტია, ვარჯიშზე თამაშის სიმულირებას ვერ მოახდენ“.

„შოტლანდიელები კარგად იყვნენ მომზადებულნი და ეფექტურად ითამაშეს. მათ მორაგბეებს არ ჰქონდათ სათამაშო პრაქტიკის ნაკლებობა, რადგან პრო-14 დიდი ხნის წინ განახლდა. სამწუხაროდ, დავთმეთ ყველა კომპონენტი. გვქონდა ტექნიკური წუნი და დავუშვით შეცდომები, თორემ ბრძოლით ყველამ ბოლომდე იბრძოლა. მე ამ ბიჭებთან ერთად ვიყავი მოედანზე და გასახდელში და თითოეული მათგანის თვალებში ჩანდა, რომ თამაშში შესაძლებლობის მაქსიმუმი ჩადო. თუ ვინმემ შეცდომები დაუშვა, ეს იყო ტექნიკური წუნი და არა ბრძოლისუნარიანობის ნაკლებობა“ – ამბობს გუნდის კაპიტანი.

ედინბურგიდან შინ დაბრუნებული "ბორჯღალოსნები" „შევარდენზე“ „შემოდგომის ერთა თასისთვის“ ემზადებიან, რომლის ფარგლებში პირველ მატჩს 14 ნოემბერს, ლეგენდარულ „თვიქენჰემზე“ 2019 წლის მსოფლიო თასის ფინალისტს და 6 ერის ჩემპიონ ინგლისთან გამართავენ.