რაგბი ევროპა | "ბორჯღალოსნების" გაფართოებული შემადგენლობა ჯგუფური ეტაპისთვის

"ბორჯღალოსნების" სამწვრთნელო შტაბმა ის შემადგენლობა დაასახელა, რომლითაც 2023 წლის რაგბი ევროპის ჩემპიონატის პირველ, ჯგუფურ ეტაპზე ითამაშებს.

შეგახსენებთ, რაგბი ევროპის ჩემპიონატმა ტრანსფორმაცია განიცადა და მონაწილეთა რაოდენობა 6-იდან 8 გუნდამდე გაიზარდა, რომლებიც პირველ ეტაპზე ორ ჯგუფში გადანაწილდნენ. საქართველოსთან ერთად „ა“ ჯგუფში ესპანეთი, ნიდერლანდები და გერმანია ითამაშებენ, „ბ“ ჯგუფში კი რუმინეთი, პორტუგალია, ბელგია და პოლონეთი მოხვდნენ.

ჯგუფური ეტაპის შეხვედრები თებერვლის პირველ სამ კვირაში გაიმართება. "ბორჯღალოსნები" 5 თებერვალს გერმანიას „ავჭალაზე“ (13 საათი) მასპინძლობენ; 11 თებერვალს ნიდერლანდებს ამსტერდამში ეწვევიან (16:15 საქ. დრო), 18-ში კი ესპანეთს ტორელავეგაში ეთამაშებიან (22:00).

თითოეული ჯგუფის ორ-ორი მოწინავე თასის ნახევარფინალში გადის და „ა“ ჯგუფის გამარჯვებული „ბ“ ჯგუფის მეორეადგილოსანს მასპინძლობს, „ბ“ ჯგუფის გამარჯვებული კი - „ა“ ჯგუფის მეორეადგილოსანს. ჯგუფში მესამე-მეოთხეადგილოსნები V-VIII ადგილებისთვის აგრძელებენ ბრძოლას. ნახევარფინალები 4-5 მარტს, ხოლო ფინალები 18-19 მარტს შედგება და გუნდები საბოლოო ადგილებს გადაინაწილებენ.

რაგბი ევროპის ჯგუფური ეტაპის სამი შეხვედრისთვის ლევან მაისაშვილმა 36 მორაგბეს უხმო – 17-ს ხაზში და 19-ს შერკინებაში. მათ შორისაა გუნდის კაპიტანი მერაბ შარიქაძე, რომელიც პირველ ორ თამაშს დისკვალიფიკაციის გამო გამოტოვებს.

გაფართოებულ რაზმშია ლაშა მალაღურაძე, რომელსაც 99 სანაკრებო კეპი აქვს მოხვეჭილი და თუ რომელიმე თამაშში მიიღებს მონაწილეობას, მეხუთე ქართველი ცენტურიონი გახდება დავით კაჭარავას (122 კეპი), მერაბ კვირიკაშვილის (115), სანდრო თოდუას (103) და გიორგი ჩხაიძის (100) შემდეგ.

მალაღურაძემ "ბორჯღალოსნების" კვართით პირველად 2008 წელს, პორტუგალიის წინააღმდეგ ითამაშა, 99-ე შეხვედრა კი 2020 წლის მარტში ასევე პორტუგალიის წინააღმდეგ ჩაატარა. მალევე ის ცენტურიონი გახდებოდა, რომ არა კოვიდ-პანდემია, რომელმაც საერთაშორისო რაგბი 1,5 წლით დააპაუზა. მას შემდეგ 3 წელი გავიდა და ლაშას კვლავ უხმეს გაფართოებულ რაზმში.

გუნდში სამი დებიუტანტია – "სტად ფრანსეს" 19 წლის ბურჯი სერგო აბრამიშვილი, "შავი ლომის" კვაჭი თენგიზ ზამთარაძე და ფრთა ოთარ ლაშხი. აბრამიშვილი წელს პარიზული კლუბის პირველ გუნდში დაწინაურდა (2 თამაში ტოპ 14-ში, 3 ჩელენჯ თასზე) და ნაკრებშიც უხმეს, ზამთარაძე და ლაშხი კი ადრეც იყვნენ გაფართოებულ რაზმში, თუმცა ტრავმებისა თუ სხვა მიზეზების გამო, მათი დებიუტი ჯერ ვერ შედგა.

ტრავმით გამოწვეული 1-წლიანი პაუზის შემდეგ ნაკრებს უბრუნდება მესამეხაზელი გიორგი ცუცქირიძე, რომელიც ცოტა ხნის წინ "სტად ფრანსეს" შემადგენლობაშიც გამოჩნდა, ჩელენჯ თასზე სამ შეხვედრაში მიიღო მონაწილეობა და ლელოც გაიტანა.