"ბორჯღალოსნები" | უელსთან მატჩისწინა პრესკონფერენცია

„შარშან იტალიასთან და უელსთან გამარჯვებებით თამასა გაცილებით მაღლა ავწიეთ. გულშემატკივარმა ეს თამასა ორჯერ უფრო ასწია, რაც გასაგებია. ახლა უელსს სხვა მწვრთნელი ჰყავს, მან მსოფლიო თასისთვის მზადება ყველაზე ადრე დაიწყო და დაახლოებით 4-5 თვეა ერთად გაატარეს. ყველა მოთამაშეს კარგად ესმის სათამაშო გეგმა და ის შემთხვევით არ იკავებს ჯგუფში პირველ ადგილს“.

გუნდის კაპიტანმა მერაბ შარიქაძემ ნეკნის ტრავმა მოირჩინა და უელსთან 99-ე კეპს მოიხვეჭს:

„ხვალინდელი თამაშის მოსაგებად ძალიან ბევრი ვიმუშავეთ. ჩვენ ყველა თამაშზე მხოლოდ გამარჯვებისთვის გავდივართ, მაგრამ სადღაც არ გაგვიმართლა, სადღაც ცოტა ჩვენ დავაკელით. რაც მთავარია, თავი არსად დაგვიზოგავს და ეს ყველაზე ნათლად ფიჯისთან გამოჩნდა“.

„ფიჯისთან ბიჭებმა ისეთი ტრავმები მიიღეს, რომლებიც მხოლოდ თავგანწირვით მოდის. მირიან მოდებაძემ გატეხილი ყვრიმალით 10 წუთი ითამაშა, რაც პრაქტიკულად შეუძლებელი რამაა. რაც შეეხება ჩემს ტრავმას, ნეკნის ხრტილი მქონდა დაზიანებული, თუმცა ახლა ყველაფერი კარგადაა და სათამაშოდ მზად ვარ“.

„დაგვემატნენ ის მოთამაშეები, რომლებმაც მზადების ეტაპი ჩვენთან ერთად გაიარეს. დარწმუნებული ვარ, თითოეული მათგანი თამაშში დიდ ენერგიას და მოტივაციას ჩადებს“.

„შარშანდელთან შედარებით უელსი ბევრად სტრუქტურულ და დალაგებულ თამაშს აჩვენებს. ისინი თითქმის არ უშვებენ შეცდომას და ამის ხარჯზე შეძლეს სამივე თამაშის მოგება. ის ბევრად უფრო ძლიერია, ვიდრე ნოემბერში იყო, თუმცა მე მჯერა, რომ გამარჯვება შეგვიძლია!“.

დავით ნინიაშვილი: „ფიჯისთან ნაჩვენებმა თამაშმა თავდაჯერებულობა შეგვმატა. გავიაზრეთ, რომ ნებისმიერ მეტოქესთან შეგვიძლია მოსაგებად ბრძოლა. უელსთანაც მხოლოდ გამარჯვებისთვის ვიბრძოლებთ და მინდა ეს თამაში იმ ტრავმირებულ ბიჭებს მივუძღვნა, რომლებიც ჩვენს გვერდით აღარ არიან“.