"კარდიფ ბლუზის" აკადემიის 16-წლამდელთა გუნდმა, საქართველოში გატარებული 1 კვირის განმავლობაში ჩვენს ქვეყანაზე საუკეთესო შთაბეჭდილება შეიქმნა და არაა გამორიცხული, რომ ზაფხულში წინასასეზონო შეკრებაზე "კარდიფის" პირველი გუნდი გვეწვიოს.უელსელები მოიხიბლნენ ქართველი თანატოლების ფიზიკური მონაცემებით, თამაშის ხარისხით, მარტყოფის სარაგბო ბაზით და ქართული სტუმართმოყვარეობით. აკადემიების ოთხთა ტურნირის დასრულების შემდეგ, მათ ერთი თავისუფალი დღე ჰქონდათ და საქართველოს რაგბის კავშირმა სტუმრებს კახეთში საინტერესო ტური მოუწყო.
სტუმრებთან ერთად კახეთში გაემგზავრა ინგლისური ენის მცოდნე რამდენიმე ქართველი მოთამაშეც, რათა მეგობრული ურთიერთობები დაემყარებინათ უელსელ თანატოლებთან.
ჯგუფი, რომელიც 50 კაცისგან შედგებოდა
გიდს სტუმრებისთვის იმის შეხსენება დაჭირდა, რომ გზა უნდა გაეგრძელებინათ, თუმცა მეორე აღფრთოვანებამდე დიდი დრო არ გასულა. ამჯერად სტუმრები სიღნაღის გალავანით და თავდაცვითი კოშკებით მოიხიბლნენ, რომლის ნაწილიც ფეხით გაიარეს.
სიღნაღის შემდეგ სტუმრები ტიბაანში, ამერიკელი ჯონი უედერმანის ვენახებს და მარანს - „ხოხბის ცრემლებს“ ეწვივნენ. აქ მათ შეიტყეს, რომ საქართველო ღვინის სამშობლოა, დაათვალიერეს ლამაზად ჩამწკრივებული ვენახები, ნახეს ქვევრები და მოისმინეს მათი ისტორია, ასევე საწნახელი და გაეცნენ ღვინის დაყენების ტექნოლოგიას.
ვიზიტის ფარგლებში ღვინის დეგუსტაციაც შედგა. „ხოხბის ცრემლებში“ უელსელებმა ოთხი სახეობის ღვინო - ორი თეთრი და ორი შავი დააგემოვნეს. სტუმრებს წინ კიდევ ერთი გამოცდილება ელოდათ - მათ პირველად მიირთვეს ჭაჭა და იმდენად მოიხიბლნენ, რომ მისი გამოხდის მეთოდებით დაინტერესდნენ. სტუმრებს გაუმართლათ, სწორედ ამ ვიზიტის დროს მიმდინარეობდა ჭაჭის გამოხდა და მწვრთნელთა სრული შემადგენლობა ამ პროცესის სანახავად გაემართა. მასპიძლებმა ბრიტანელებს ახალი გამოხდილი ჭაჭაც დააგემოვნებინეს.
ღვინისა და ჭაჭის დეგუსტაციის დროს, ანსამბლმა „ზედაშემ“ შეასრულა ქართული ხალხური სიმღერები, მათ შორის ფანდურის, ჩონგურისა და გუდასტვირის გამოყენებით, იყო ქართული ცეკვებიც.
პარალელურად, ‘კარდიფის’ მწვრთნელებმა და მოთამაშეებმა სამახსოვრო საჩუქრები მიიღეს. 34-ივე უცხოელ სტუმარს სვანური ქუდი და ქართული ორნამეტებით გაფორმებული, ხელით ნაქსოვი სამაჯური შეხვდა; მწვრთნელებმა დამატებით საქართველოს რაგბის კავშირის მაისურები და ინგლისურ-ქართული წიგნები მიიღეს, სადაც საქართველოს კუთხეების ღირშესანიშნაობებია აღწერილი.
სტუმრება მადლობის ნიშნად უელსის ჰიმნი და ერთიც უელსური სიმღერა შეასრულეს. ეს იყო პირველი შემთხვევა, როდესაც უელსის ჰიმნის დროს უკლებლივ ყველა შემსრულებელს სვანური ქუდი ეხურა.
საქართველოში სტუმრებით და კახეთში გატარებული ერთი დღით კმაყოფილი იყო გუნდის კაპიტანი რის ანსტი:
„ქართველები უზომოდ სტუმართმოყვარე ხალხი ხართ და საინტერესო კულტურა გაქვთ. განსაკუთრებით მოვიხიბლე ალაზნის ველის ხედით და ვენახებით, რომლებსაც ახლა ვუყურებთ. არ ველოდი აქ ასეთი ლამაზი ბუნება და პეიზაჟი თუ დამხვდებოდა. საქართველო ძალიან განსხვავდება ჩვენი ქვეყნისგან და აქ გატარებული დღეები არასდროს დამავიწყდება“.
მარტყოფის ბაზაზე დაბრუნებამდე ‘კარდიფი’ ხირსას მონასტერს ეწვია, რომელიც მე-6 საუკუნეშია აშენებული და მწვრთნელებმა გამოთქვეს იმედი, რომ საქართველოში აუცილებლად დაბრუნდებიან.
მომზადებულია rugby.ge-ს მიხედვით
