"შავი ლომი" - "იბერიანზის" წინააღმდეგ გულშემატკივრებთან ერთად

რაგბი ევროპის სუპერთასის ნახევარფინალური მატჩის წინ "შავმა ლომმა" "შევარდენის" სანაკრებო ბაზაზე გულშემატკივრისთვის ღია ვარჯიში გამართა.

ერთმატჩიან ნახევარფინალში აღმოსავლეთ კონფერენციის გამარჯვებული "შავი ლომი" დასავლეთ კონფერენციის მეორეადგილოსან ესპანურ "იბერიანზს" 17 აპრილს, "ავჭალაზე", 18:00 საათზე დაუხვდება. საგულისხმოა, რომ კოვიდ-რეგულაციების მოხსნის შემდეგ მატჩზე დასწრება სრულადაა დაშვებული, ტრიბუნებზე კი 3500 მაყურებელი ეტევა.

სამხრეთ აფრიკიდან, ქარის თასიდან დაბრუნების შემდეგ, გუნდს შეუერთდნენ მერაბ შარიქაძე, აკაკი ტაბუცაძე, სანდრო თოდუა, შალვა მამუკაშვილი და ნიკა ხატიაშვილი.

"მოწინააღმდეგის ორი თამაში ვნახეთ და საკმაოდ კარგი, სწრაფი გუნდია. ტრავმირებულები არ გვყავს და მოსამზადებელი პროცესი კარგად მიდის. სამხრეთ აფრიკის ტურნეს შემდეგ ერთადერთი კოკი თხილაიშვილი გამოგვაკლდა, რომელმაც ტვინის შერყევა მიიღო", - განაცხადა გუნდის მწვრთნელმა ლადო კილასონიამ.

"აქტიური მზადების პროცესში ვართ. გავიარეთ მეტოქის სუსტი და ძლიერი მხარეები. წინ კიდევ ორი ვარჯიში გვაქვს და თამაშს მზადყოფნაში შევხვდებით", - ამბობს სანდრო თოდუა.

გულშემატკივრის მხარდაჭერის იმედი აქვს ლუკა ივანიშვილს:

"აფრიკიდან დაბრუნების შემდეგ ორი დღე დავისვენეთ და ორშაბათიდან შეკრებაზე შევედით. მაქსიმალური მონდომებით ვემზადებით ნახევარფინალური შეხვედრისთვის. ჩვენთვის მნიშვნელოვანია გულშემატკივრის მხარდაჭერა და ვიმედოვნებ, ტრიბუნები 100%-ით შეივსება".

პირველი ხაზი: მიხეილ ორაგველიძე, გოგა ქადარია, ნიკა ხატიაშვილი; შალვა მამუკაშვილი, თენგიზ ზამთარაძე; გიორგი პერტაია, ნიკა პატარაია, ნიკა აბულაძე, მიხეილ წიკლაური;

მეორე ხაზი: ნოდარ ჭეიშვილი, ლაშა ჯაიანი, მიხეილ ბაბუნაშვილი, იოსებ გუშარაშვილი;

მესამე ხაზი: გიორგი თხილაიშვილი, ნიკო აფციაური, ლუკა ივანიშვილი, სანდრო მამამთავრიშვილი, თორნიკე აქუბარდია;

9-10: თენგიზ პერანიძე, გიორგი ბეგაძე; გიორგი ბაბუნაშვილი, დავით მოძღვრიშვილი, ლუკა მატკავა;

12-13: მერაბ შარიქაძე, დემურ თაფლაძე, ლაშა ლომიძე, გურამ ქანდაურაშვილი;

11-14: აკაკი ტაბუცაძე, სანდრო სვანიძე, სანდრო თოდუა, ოთარ ლაშხი, მირიან მოდებაძე;

15: ლაშა ხმალაძე.

16 აპრილი. ლისაბონი. 19:00

ლუზიტანუში (პორტუგალია) – თელავივ ჰითი (ისრაელი)

17 აპრილი. თბილისი. 18:00