სუპერთასი | "შავი ლომი" ნახევარფინალისთვის დაირაზმა

ერთთვიანი შესვენების შემდეგ, "შავი ლომი" რაგბი ევროპის სუპერთასის დაცვას განაგრძობს და ერთრაუნდიან ნახევარფინალში ხვალ, 4 დეკემბერს (16 საათი) ესპანურ "იბერიანსს" "ავჭალაზე" მასპინძლობს.

ჯგუფური ეტაპი ოქტომბრის ბოლოს დასრულდა და "შავმა ლომმა" 23 ქულით აღმოსავლეთ კონფერენცია მოიგო, რითაც ნახევარფინალში მასპინძლობის უფლება მოიპოვა. "იბერიანსმა" დასავლეთ კონფერენციაში ექვსიდან 5 თამაში მოიგო და "ლუზიტანუშის" მსგავსად 24 ქულა მოაგროვა, მაგრამ მეტოქეს დამატებითი მაჩვენებლებით ჩამორჩა.

აღსანიშნავია, რომ სუპერთასის პირველი გათამაშების ნახევარფინალში, "შავმა ლომმა" "იბერიანსს" ასევე "ავჭალაზე" უმასპინძლა და უხვქულიან მატჩში 43:40 დაამარცხა.

მომავალ თამაშში "შავ ლომს" ტრავმებისა და ჯანმრთელობის მდგომარეობის გამო ლაშა ხმალაძე, სანდრო თოდუა, გრიგორ ქერდიყოშვილი, თემო ჭიჭინაძე, თორნიკე აქუბარდია და გიორგი კერვალიშვილი დააკლდება. ამის გათვალისწინებით, სამწვრთნელო შტაბმა ოპტიმალური სათამაშო შემადგენლობა შეარჩია.

შერკინების პირველ ხაზში თამაშს ნიკა აბულაძე, შალვა მამუკაშვილი და ნიკა პატარაია იწყებენ; მეორე ხაზში ნოდარ ჭეიშვილი მიხეილ ბაბუნაშვილს შეუწყვილდება; გამოცდილი და შეთამაშებულია მესამე ხაზიც – სანდრო მამამთავრიშვილი, მიხეილ გაჩეჩილაძე და ლუკა ივანიშვილი.

ღერძზე თენგიზ პერანიძე ტრადიციულად ლუკა მატკავას შეუწყვილდება, ცენტრში კი მერაბ შარიქაძისა და დემე თაფლაძის დუეტს ვიხილავს. ფულბეკის პოზიციაზე მირიან მოდებაძე ბრუნდება, ხოლო ფრთებზე აკა ტაბუცაძე და ოთარ ლაშხი დადგებიან.

მარქაფიდან პირველ ხაზს ჯაბა ბრეგვაძე, ნიკა ხატიაშვილი და გიორგი ჩხარტიშვილი გააძლიერებენ, მეორე ხაზს პაატა გალდავა, ხოლო მესამეს ნიკო აფციაური. ხაზის მარქაფაში არიან გიორგი მარგალიტაძე და ლაშა ლომიძე, ასევე სოსო მათიაშვილი, რომელმაც ტრავმა მოიშუშა, დიდ 10-ში ითამაშა და ხანგრძლივი შესვენების შემდეგ "შავ ლომს" უბრუნდება.