U20. მსოფლიოს ჩემპიონატი: ბილეთების გაყიდვა დაიწყო!

თბილისსა და ქუთაისში 31 მაისიდან 18 ივნისის ჩათვლით გასამართი 20 წლამდე მორაგბეთა მსოფლიოს ჩემპიონატის ბილეთების გაყიდვა დაიწყო.

რაგბის კავშირის პრესსამსახურის ცნობით, ბილეთები ორ ეტაპად გაიყიდება: 12 აპრილიდან ყველა სამატჩო დღეზე დასასწრები ბილეთების 60 პროცენტი გაიყიდება, ხოლო 12 მაისიდან - დანარჩენი 40 პროცენტი. ასევე შესაძლებელია ბილეთების ონლაინ შეძენაც (იხილეთ ბმული).

დღის ბილეთის ფასი სტადიონების მიხედვით:

ავჭალის სტადიონი - 20 ლარი
აია არენა - 5 და 10 ლარი
მიხეილ მესხის სახელობის სტადიონი - 5 და 15 ლარი.

მსოფლიოს 20-წლამდელთა ჩემპიონატზე პლანეტის 12 უძლიერესი ნაკრები, მათ შორის, საქართველოს ახალგაზრდული ნაკრები ითამაშებს. შეგახსენებთ, რომ "უმცროსმა ბორჯღალოსნებმა" არა მარტო მასპინძლის სტატუსით, არამედ სპორტული შედეგითაც დაიმსახურეს ტურნირში მონაწილეობის უფლება.

წლევანდელ ჩემპიონატში მონაწილეობენ: ინგლისი, ირლანდია, არგენტინა, სამხრეთი აფრიკა, ახალი ზელანდია, ავსტრალია, უელსი, შოტლანდია, საფრანგეთი, საქართველო, იტალია, სამოა (ჩაანაცვლა შარშან ბოლო ადგილზე გასული იაპონია).

ასპარეზობა 5 სამატჩო დღედ გაიმართება. ტურნირის ჯგუფური ეტაპი (31 მაისი, 4 ივნისი, 8 ივნისი) ორ ქალაქში ჩატარდება - თბილისში (ავჭალის სტადიონი) და ქუთაისში (აია არენა); პლეი ოფები და ფინალები (14 ივნისი და 18 ივნისი) თბილისში, ავჭალის და მიხეილ მესხის სახელობის სტადიონებზე გაიმართება.

მომზადებულია rugby.ge-ს მიხედვით