დაიწყო ექვსი ერის გათამაშება და ისევ დაიწყო ლაპარაკი მისი გარდაქმნის, ტრანსფორმაციის, მისი ფორმატის შეცვლის თაობაზე. ამ თემაზე ისევ ბრიტანული მედია აქტიურობს. ახლახან BBC.COM-ზე გამოქვეყნდა სტატია, რომლის ერთ-ერთი მთავარი პერსონაჟი ინგლისურ "ვორსტერში" მოთამაშე საქართველოს ნაკრების შერკინების კვაჭი ჯაბა ბრეგვაძეა. გთავაზობთ ამონარიდს ამ პუბლიკაციიდან:
"ავტომაგისტრალის მიმდებარედ, სპეციალურად აშენებულ სავარჯიშო მოედანზე სხვადასხვა ქვეყნის რამდენიმე მორაგბე ვარჯიშობს. ახალზელანდიელ, სამხრეთაფრიკელ, წყნარი ოკეანის აუზის ქვეყნებისა და ინგლისელ მორაგბეებთან ერთად იქ ჯაბა ბრეგვაძეც იმყოფება.
ის ქართველი მორაგბეა. შერკინების კვაჭის პოზიციაზე მან ეროვნულ გუნდში 40 კეპი მოიხვეჭა. ინგლისურ
"ქართველები, ტრადიციულად, ფიზიკურად ძლიერები არიან. სამწუხაროდ, ჩვენი ისტორიის განმავლობაში ბევრი ომი გვქონდა. რაგბიც ისეა, როგორც ომი.
თქვენ ვინმეს წინააღმდეგ თამაშობთ, ის ვინმე შეიძლება მეგობარი იყოს, მაგრამ მოედანზე 80 წუთის განმავლობაში ის მტერია. თქვენ მას ტკივილი უნდა მიაყენოთ, ცხადია, არსებული წესების ფარგლებში, რომ არ დაჯარიმდეთ.
ვფიქრობ, სწორედ ამიტომ გამოგვდის უკეთესად თამაში შერკინებაში. მორკინალებით მძლავრი იერიშის განხორციელება ჩვენთვის უფრო მოსახერხებელია. ჩვენ ბოლომდე თავდადებით, მთელი გულით ვთამაშობთ. თუმცა, საყოველთაოდაა ცნობილი, რომ ჩვენი სარაგბო უნარ-ჩვევები უმაღლეს დონეზე განვითარებული არ არის", - თქვა მან.
ლელო ძველი ქართული თამაშია, საიდანაც გუნდის მეტსახელი წარმოდგება (Lelos - მსოფლიოში ამ თიკუნითაა ცნობილი საქართველოს ნაკრები). ეს არის თამაში, რომელშიც სოფელი სოფელს ებრძვის ბურთის მოსაპოვებლად ტრიალ მინდორში. საქართველოს რაგბის ისტორიის უნიკალური ვერსია აქვს.
თუმცა, პრობლემა სხვაა. ეს მომავალია. როგორ უნდა მოხერხდეს, რომ ქართველი მორაგბეების უნარ-ჩვევები უმაღლეს დონეზე განვითარდეს?
საქართველოს ნაკრებს მისი სტატუსი აღარ აკმაყოფილებს. მათ ერთა თასი, რომელსაც ახლა "რაგბი ევროპის ჩემპიონატი" დაარქვეს, ზედიზედ ექვსჯერ მოიგეს. 2015 წლის მსოფლიოს თასზე ქართველებმა ორ მატჩში გაიმარჯვეს და შესანიშნავი ბრძოლა გაუმართეს ვებ ელისის თასის მომავალ მფლობელ ახალი ზელანდიის ნაკრებს.
წლევანდელი ექვსი ერის გათამაშების დაწყების წინ საქართველო მსოფლიოს რეიტინგში მე-12 იყო. იტალია მას ერთი საფეხურით ჩამორჩება.
ექვსი ერის გათამაშებიდან ბოლოადგილოსნის დაქვეითების იდეა კატეგორიულად გამორიცხა ტურნირის აღმასრულებელმა დირექტორმა ჯონ ფიენმა. ყოველ შემთხვევაში, უახლოეს მომავალში ეს არ იგეგმება. ამის თაობაზე ქართველებისთვის კარგადაა ცნობილი და აქვთ საკმაოდ საინტერესო იდეა.
BBC-სთან საუბარში საქართველოს რაგბის კავშირის ოპერაციების ხელმძღვანელმა თქვა, რომ კარგი იქნებოდა, თუ ნეიტრალურ მოედანზე გაიმართებოდა უბრალოდ საჩვენებელი, "შოუ მატჩი" ექვსი ერის ბოლოადგილოსანსა და "რაგბი ევროპის ჩემპიონატის" გამარჯვებულს შორის. ასეთი გუნდი, თითქმის ბოლო ათწლეულის განმავლობაში საქართველოს ნაკრებია.
ქართველები ამბობენ, რომ კი ბატონო, არ იყოს ეს თამაში ექვს ერში გადასასვლელი. მიუხედავად ამისა, ის მაინც ძალიან საინტერესო იქნებაო.
ამ წინადადებით ჩვენ ჯონ ფიენს მივმართეთ.
"დარწმუნებული ვარ, რომ ეს შეხვედრა მართლაც საინტერესო იქნება, თუმცა, მას მაინც ჩვენი ტურნირის კონტექსტში შეხედავენ. ის, რაც საქართველოსთვის კარგია, აუცილებელი არ არის, კარგი იყოს ჩვენთვისაც", - გვიპასუხა მან.
იტალიის ნაკრები ექვსი ერის გათამაშებაში 2000 წელს ჩაერთო და ბოლო ადგილზე თერთმეტჯერ გავიდა. ცალკეულ მატჩებში იტალიელებმა ექვსი ერის ყველა გუნდის დამარცხება შეძლეს, ინგლისის ნაკრების გარდა. ცხადია, იტალიელთა ამ მაჩვენებლებით ექვსი ერის პატრონებიც უკმაყოფილონი არიან.
"იტალიის ნაკრებს ისეთი პროგრესი აქვს, როგორიც სასურველია?" - კითხვა დასვა ჯონ ფიენმა. "რა თქმა უნდა, არა. თუმცა, ისინი ყველანაირად ცდილობენ, რომ სხვა გუნდებს დაეწიონ და ეს ჩვენ უნდა წავახალისოთ", - დაასკვნა მან.
წლეულს, მოგვიანებით, საქართველოში მსოფლიოს ახალგაზრდული ჩემპიონატი ჩატარდება. ჯაბა ბრეგვაძეს მიაჩნია, რომ რაგბის მიმართ ინტერესი ძალიან გაიზარდა. ახლა 50 ათასზე მეტი მაყურებელი მხოლოდ რუსეთთან თამაშზე არ დადის, არამედ სხვა ნაკრებებთან მატჩებიც დიდ ინტერესს იწვევს.
უქმეებზე საქართველოში ბევრი არაფერი ხდება. როცა იციან, რომ მათ გუნდს მოგება შეუძლია, მაყურებელი მრავლად მოდის და პოზიტიურ ატმოსფეროს ქმნიან. საქართველოს ნაკრები 20 ქულით მოიგებს, 40 ქულით თუ ხუთით, მნიშვნელობა არ აქვს. ისინი ამაყობენ თავიანთი გუნდით და ბედნიერნი არიან. ეს დიდი ამბავია მთელი ჩვენი ქვეყნისთვის.
"ნოემბრის ტესტებზე შოტლანდიაში მარცხის მიუხედავად, მაინც მგონია, რომ რაც შეიძლება მეტი უნდა ვითამაშოთ ჩვენზე ძლიერ გუნდებთან. მხოლოდ ამ გზით შევძლებთ განვითარებას და წინსვლას", - თქვა ჯაბა ბრეგვაძემ.
(იბეჭდება მცირე ცვლილებით)
ყოველდღიური სპორტული გაზეთი "ლელო"
