"შეგრძნება მქონდა, სადღაც დრაკონი ჰყავდათ დამწყვდეული და მისი სუნთქვა ისმოდა" - წარმატებული ქართველი არბიტრი ოლიმპიადის მოლოდინით

ნიკა ამაშუკელი ახალ ეტაპზე გადავიდა. "მსოფლიო რაგბიმ" ის 7-კაცას სერიებზე სამსაჯოდ მიიწვია.

ესაა პირველი შემთხვევა, როდესაც ქართველი რეფერი ამ დონის ტურნირზე იმსაჯებს. ამაშუკელი ოთხ ეტაპზეა მივლენილი – დუბაი, სამხრეთი აფრიკა, ლონდონი და პარიზი. აქამდე ნიკას 7-კაცა რაგბიში მხოლოდ შიდა ტურნირებზე უმსაჯია, ახალ გამოწვევას კი მოტივირებული ხვდება:

"სრულიად ახალ ეტაპზე გადავდივარ და სიხარულით ვიღებ ამ საინტერესო გამოწვევას. "მსოფლიო რაგბიმ" დააბრუნა ადრინდელი პრაქტიკა, რომლის თანახმად, ტოპ-მსაჯები 7-კაცას გზასაც გადიოდნენ. ეს 15-კაცასგან განსხვავებული სპორტია, ბევრად უფრო მაღალი ტემპით და სხვა დატვირთვებით. ჩემთვის პრიორიტეტული 15-კაცა რაგბია, რის შესახებ "მსოფლიო რაგბის" სამსაჯო კორპუსის მენეჯერ ჟოელ ჟუშსაც ვუთხარი, თუმცა მას სურს, რომ ნახოს, როგორ მოვერგები ახალ გამოწვევებს და ეს დანიშვნა ჩემს 15-კაცა რაგბიში მოღვაწეობას ხელს არ შეუშლის."

"7-კაცა რაგბიში თამაშის მიმდინარეობა განსხვავებულია, განსხვავებულად გაიცემა სანქციები და საჭიროა 15-კაცა რაგბიდან ტრანზაქცია უმტკივნეულოდ მოახერხო. განსხვავებული ფიზიკური მომზადება სჭირდება, რათა მოერგო 7-კაცა რაგბისთვის საჭირო კრიტერიუმებს და ეს კიდევ ერთი გამოწვევაა. ვეცდები, სათანადოდ ვუპასუხო ამ უპრეცედენტო დანიშვნას და ღირსეულად წარვადგინო ჩვენი ქვეყანა."

რადგან 7-კაცა რაგბი ზაფხულის ოლიმპიური თამაშების ნაწილია, ამაშუკელი იმედოვნებს, რომ მსოფლიო სერიებზე წარმატებული მსაჯობის შემდეგ მას ოთხწეულის უმნიშვნელოვანეს სპორტულ ღონისძიებაზეც მიიწვევენ:

"მსოფლიო სერიებში დეკემბრიდან ჩავერთვები. დუბაისა და სამხრეთ აფრიკის შემდეგ, გაზაფხულზე ლონდონისა და პარიზის ეტაპებზე ვიმსაჯებ. ტურნირები მსოფლიოს სხვადასხვა წერტილში, ცნობილ სტადიონებზე იმართება. გიწევს ბევრი მოგზაურობა, რაც დამატებითი სტრესია. მიუხედავად ყველაფრისა, მუდამ უნდა იყო კარგ ხასიათზე და იმ სამსაჯო ჯგუფის სასიამოვნო წევრი, ვისთანაც მოგიწევს მუშაობა."

"რაგბის ქომაგებმა კარგად იციან, რამხელა მასშტაბის ტურნირებია მსოფლიო რაგბის სერიები. 7-კაცა რაგბი ზაფხულის ოლიმპიური თამაშების ნაწილია, შეიძლება ითქვას, ერთ-ერთი ყველაზე პრესტიჟული შეჯიბრება გუნდურ სათამაშო სახეობებში და არის შანსი, რომ მომავალში იქაც მიმიწვიონ, რაც უდიდესი ბედნიერება იქნება“.

უელსი – კანადა

7-კაცას მსოფლიო რაგბის სერიებზე დანიშვნამდე ნიკა ამაშუკელმა ივნისში 20-წლამდელთა ექვსი ერის ორი თამაში, ხოლო 3 ივლისს კარდიფში უელსისა და კანადის მატჩი იმსაჯა. ეს იყო პირველი შემთხვევა, როდესაც ტიერ1-ის გუნდის შეხვედრას ქართველი და ზოგადად, ტიერ2 ქვეყნის მსაჯი მოემსახურა. სამწუხაროდ, კოვიდ-პანდემიამ მას 10 ივლისს, რუმინეთისა და შოტლანდიის ჯახის მსაჯობა არ დაანება:

"სამწუხაროა, რომ მეორე ტესტი ჩამეშალა და ტიერ1-ის გუნდებთან მსაჯობის მხოლოდ ერთი კეპი შემრჩა. უელსმა მეტოქეს იოლად მოუგო, თუმცა პირადად მე მოდუნების საშუალება წამითაც არ მქონდა. მსოფლიო რაგბი გაკვირდება, გადაღების ხარისხი ძალიან მაღალია და არ უნდა გამოგრჩეს არცერთი სამსაჯო დეტალი. სასიხარულოა, რომ თამაშის შემდეგ ჩემი გადაწყვეტილებების სიზუსტე 97% იყო, რაც ძალიან დიდი მაჩვენებელია. მსოფლიო რაგბიდან მოგვწერეს, რომ ეს იყო ის, რაც მათ სურთ საერთაშორისო, ტოპ-მსაჯებისგან.

რაც შეეხება გარემოს, „პრინციფალითი“ მსოფლიოს ერთ-ერთი საუკეთესო სტადიონია. ის უელსელების აუღებელი ციხესიმაგრეა. ისეთი გარემო იყო, რომ შეგრძნება მქონდა, სადღაც დრაკონი ჰყავდათ დამწყვდეული და მისი სუნთქვა ისმოდა. ამ სტადიონზე გამარჯვება ნებისმიერი სტუმარი გუნდისგან უდიდეს მენტალურ მომზადებას საჭიროებს."

წყარო: rugby.ge

მსოფლიო რაგბი - კვესელაძე მსოფლიოს ჩემპიონთან გამოწვევებზე

რაგბის კავშირის ვიცე-პრეზიდენტი სტუმრად "სპორტალში" [LIVE]