ბასილაშვილი ზვერევთან თანაბარ თამაშში დამარცხდა [VIDEO]

დღეს, 28 ივლისს, 2020 წლის ტოკიოს ოლიმპიურ თამაშებზე ნიკოლოზ ბასილაშვილმა (41) მერვედფინალური შეხვედრა გამართა. ქართველის მოწინააღმდეგე კლასიფიკაციის მე-5 ნომერი, ნიკასთვის კარგად ნაცნობი ალექსანდრ ზვერევი გახლდათ. 

ჩოგბურთელებმა შეხვედრა აქტიურად დაიწყეს. სეტის მეორე ნახევარში, კერძოდ მე-6 და მე-8 გეიმში გერმანელი ნიკას მოწოდებაზე 15:30 დაწინაურდა, თუმცა ქართველმა რეაბილიტაცია და გათამაშებების თავის სასიკეთოდ დასრულება მოახერხა. აღსანიშნავია, რომ ზვერევი შესანიშნავად გამოიყურებოდა, საკუთარი 5 ჩაწოდება კი მშრალად მოიგო, რაც ნიკოლოზის მდგომარეობას ართულებდა, რადგან ქართველს ბრძოლა არა მეტოქის, არამედ საკუთარ ჩაწოდებაზე უწევდა, რამაც საბოლოოდ 1-ელ სეტზე ზეგავლენა იქონია… "ბასილას" მოწოდებაზე, კერძოდ მე-10 გეიმში, ქართველს ჩაწოდება არ გამოუვიდა და ზვერევმა ნიკას მოწოდების წართმევით პირველი სეტი 6:4 მოიგო.

მეორე სეტიც იმავე სცენარით დაიწყო, ჩოგბურთელები პრაქტიკულად უშეცდომოდ ასპარეზობდნენ. აღსანიშნავია, რომ გერმანელმა საკუთარ ჩაწოდებაზე პირველი ქულები მე-5 გეიმში წააგო.

ყველაფერი თითქოსდა მე-8 გეიმში გადაწყდა, როდესაც ნიკას გათამაშებაში გერმანელმა 15:40 უპირატესობა მოიპოვა, ორმაგი "ბრეიკ-პოინტი" გამოიყენა და თამაშის დაწყებიდან 1 საათისა და 6 წუთის თავზე მატჩზე ჩაწოდების უფლება მოიპოვა, მაგრამ "ბასილამ" ბრძოლისუნარიანობა გამოავლინა და 3 "მატჩ-ბოლის" მოგერიების შემდეგ მეტოქის მოწოდება მოიგო.