23 იანვარს ილია თოფურია კანადელ შარლ ჟურდენს დაუპირისპირდება. ქართველმა მებრძოლმა El Espanol-თან ინტერვიუში სხვადასხვა თემაზე ისაუბრა:
- 2022 წლის ბრძოლამდე სულ უფრო ცოტა დრო რჩება. რა გიტრიალებს თავში, როცა ამ ყველაფერზე ფიქრს იწყებ?
- თავში კმაყოფილების განცდა მაქვს, რამდენიმეწლიანმა ვარჯიშმა შედეგი გამოიღო. ყველაფერი ნულიდან დავიწყე და მალე UFC-ის ერთ-ერთ ღონისძიებაზე რიგით მეოთხე ორთაბრძოლას გავმართავ. ეს ყველაფერი სიამაყით მავსებს.
- 2021 წელი შენი კარიერისთვის მნიშვნელოვანი გამოდგა, მოახერხე და 15 საუკეთესო მებრძოლში შეხვედი. ახლა ახალი წელი დაიწყო, მზად ხარ, რომ ყველაფერს ჩაეჭიდო და მიიღო, რასაც 2022 წელი მოგცემს?
- რა თქმა უნდა. სიმართლე გითხრათ, გასულ წელს მხოლოდ 1 შეხვედრა ჩავატარე. ჩემი სურვილია ამ წელს უფრო ხშირად გავიდე რვაკუთხედში. დარწმუნებით გეტყვით, წელს მეტი ჩხუბი მექნება, გამოცდილება უკვე მივიღე.
- სულ მალე 2022 წლის პირველი ბრძოლა გელის. შენ ყოველთვის ამბობ, რომ პირველსავე რაუნდში გაიმარჯვებ. მაგალითისთვის, რაიან ჰოლთან 1-ლი რაუნდის დასრულებამდე 13 წამით ადრე მოიგე...
- ეს ერთგვარი სტრატეგია იყო, რომ რაუნდის დასრულებამდე 30 წამით ადრე უნდა შემეტია, რადგან ცდილობდა, რამენაირად პარტერში ჩავეყვანე. ამიტომ რაუნდის დასრულებამდე ნახევარი წუთით ადრე შევუტიე. რომც დავეჭირე, 30 წამი ყველაფერს გავუძლებ, მებრძოლი ვარ და თავის დაცვაც ვიცი. ეს იყო ორთაბრძოლა, სადაც მშვიდად უნდა ვყოფილიყავი, თუმცა, როგორც კი ნიშანი მომცეს, მაშინვე ლამის თავი წავაცალე.
- როგორ ემზადებით ბრძოლის წინ?
- ბევრი ამბობს, რომ საკუთარ თავში ძალიან დარწმუნებული ვარ, მაგრამ სინამდვილეში ორთაბრძოლის წინ საკუთარ გუნდთან ერთად ვჯდები და ვაანალიზებ ყველაფერს, ვწერთ, ვსაუბრობთ... ახლა ვიცი, რომ 23 იანვარს ორთაბრძოლა მელოდება და ყველაფერი იდეალურად მაქვს გაანალიზებული, ეს ყველაფერი კი სიმშვიდის საშუალებას მაძლევს.
- თქვენ თქვით, რომ ბრძოლების სწრაფად დამთავრება შემთხვევითობა არაა...
- რა თქმა უნდა, ყველაფერი მძიმე შრომის შედეგია, ეს ყველაფერი ბევრ ვარჯიშს მოითხოვს. უამრავ ადამიანს შეხვდები, რომლებიც ნიჭიერები არიან. ჩემი ყველაზე კარგი თვისება შეუპოვრობაა.
- როგორ აპირებთ პირველ რაუნდში გამარჯვებას, რათა თქვათ "ეს მე ვარ, ილია"?
- როგორც უკვე აღვნიშნე, რაიან ჰოლთან ჭადრაკისებური დაპირისპირება მექნებოდა. როგორც წესი, ვინც სტრატეგიულად იბრძვის, ჩემპიონიც ხდება. შემდეგ ბრძოლაშიც ოქტაგონზე ჩემი გეგმით გავალ, რათა მეტოქე მენტალურად გავანადგურო.
- შეიძლება ითქვას, რომ ილია თოფურია მსოფლიოს ჩემპიონი გახდება?
- ეჭვიც არ მეპარება, ყოველდღე ამისთვის ვწვალობ. არ ვიცი, როდის იქნება, დღეს, ხვალ თუ რამდენიმე დღეში, მაგრამ ერთ დღესაც მე მსოფლიოს ჩემპიონი გავხდები. 23 იანვარს ჩემს კარიერაში ერთ-ერთი მნიშვნელოვანი ბრძოლა მექნება და მე ის უნდა დავძლიო. ესაა, რაც შემიძლია გითხრათ. საკუთარი გამოცდილებიდან გეუბნებით, რომ შრომით ყველაფრის მიღწევაა შესაძლებელი.- საინტერესოა, თუ როგორ ცდილობთ ყველაფრის გაკონტროლებას ბრძოლამდე, აძლევთ თუ არა MMA-ს გარეთ არსებულ სისუსტეებს თავის გამოჩენის შესაძლებლობას?
- რა თქმა უნდა, ისევე, როგორც ყველას, მეც მაქვს საკუთარი ეჭვები და მეც მეშინია, რომ ჩემს ოცნებებს ვერ ავიხდენ. ეს ყველაფერი მაშინებს, თუმცა, იცი, რა სხვაობაა ლაჩარსა და გმირს შორის? ორივეს აქვს სისუსტე, თუმცა ერთ-ერთი ამ ყველაფერს არ ნებდება. მე გმირი ვარ და არა ლაჩარი, ჩემს გრძნობებს ვაკონტროლებ და წინსვლასაც ვაგრძელებ. შეცვალეთ სისუსტეები პოზიტივისკენ.
!["ვინ მოიყვანა ეს აქ, ვინ ხარ ბიჭო შენ" - თოფურიას რეაქცია რუსი ჟურნალისტის პროვოკაციულ კითხვაზე [VIDEO]](/pictures/image7/5f0a0ec20e58d285660c97278686a4fc.jpg "\"ვინ მოიყვანა ეს აქ, ვინ ხარ ბიჭო შენ\" - თოფურიას რეაქცია რუსი ჟურნალისტის პროვოკაციულ კითხვაზე [VIDEO]")
