არ წახვიდე, ტეემუ!ამერიკის ნაკრების გამოსვლა სოჭის ოლიმპიადაზე კრახით დასრულდა. გუნდმა, რომელმაც ჯგუფურ ეტაპზე დაამარცხა რუსეთი და ტურნირის პირველ ოთხ მატჩში 20 შაიბა გაიტანა, ნახევარფინალსა და მესამე ადგილისთვის შეხვედრაში ვერც ერთხელ ვერ აიღო კანადისა და ფინეთის კარი და ორჯერ წააგო.
თუ ნახევარფინალში კანადასთან 0:1 მარცხი არავის გაჰკვირვებია, ბრინჯაოსთვის ფინეთთან განადგურებას არავინ ელოდა. ამერიკელები დაამარცხა იმ ჰოკეისტმა, რომელმაც ასევე უდიდესი წვლილი შეიტანა მეოთხედფინალში რუსეთის ძლევაში. ეს არის 43 წლის ფინელი ფორვარდი ტეემუ სელიანე, რომელიც ბოლო ოლიმპიადას თამაშობდა კარიერაში.
უბერებელმა თავდამსხმელმა დუბლი
აშშ-ს მანამდეც და შემდეგაც შეეძლო თავის გამოჩენა, მაგრამ გუნდი დააღალატა "ჩიკაგოს" ფორვარდმა პატრიკ კეინმა. მან ჯერ 0:0-ზე, შემდეგ კი 0:2-ზე მიიღო ბულიტის შესრულების უფლება და ორივე დუელი წააგო მეკარე ტუუკა რასკთან (ამ გოლკიპერმა გამოტოვა შვედეთთან 1:2-ით წაგებული ნახევარფინალი), რომელმაც 27 დარტყმა მოიგერია და შათაუტი შეასრულა.
კეინის უიღბლობამ საბოლოოდ გატეხა ამერიკა და მეორე ტაიმში მას არც დაცვაში თამაში ჰქონია და არც შეტევაში. შედეგად, ფინეთმა მესამე პერიოდში სამი უპასუხო შაიბა გაიტანა და ბრინჯაოს მედლით გაემგზავრა ოლიმპიადიდან.
დამსახურებული კანადა
სოჭის ოლიმპიური თამაშები ჰოკეის ტურნირის ფინალით დასრულდა. რუსების დიდი სურვილის მიუხედავად, მათი ნაკრები ამ მატჩში წარმოდგენილი არ ყოფილა. ოქრო უნდა გაეთამაშებინათ ოლიმპიადის ორ საუკეთესო გუნდს - კანადასა და შვედეთს.
შეხვედრის წინ უამრავი პროგნოზი კეთდებოდა, თუმცა დიდი ნაწილი უპირატესობას მაინც კანადის ნაკრებს ანიჭებდა, თუნდაც იმიტომ, რომ შვედეთის ნაკრების შემადგენლობას ოპტიმალური არ ეთქმოდა. სოჭში ვერ ჩავიდა ჰენრიკ სედინი, ჯგუფურ ტურნირზე მიიღო ტრავმა ჰენრიკ ზეტერბერგმა, ხოლო ფინალში მოულოდნელად ვერ ვიხილეთ მსოფლიოს ერთ-ერთი საუკეთესო გამთამაშებელი ნიკლას ბექსტრიომი. როგორც მოგვიანებით გაირკვა, მან თავის ტკივილის წამალი მიიღო, რომელიც აკრძალულ პრეპარატს შეიცავდა და მისი ფინალში თამაში შეუძლებელი გახდა.
კანადამ პირველივე წუთიდან არანორმალური ტემპი შესთავაზა მეტოქეს, მაგრამ პირველი საგოლე მომენტი შვედებმა შექმნეს, როცა გუსტავ ნიკუისტის დარტყმა ძელს მოხვდა. შაიბა კერი პრაისის კარის ხაზზე გაცურდა და მხოლოდ ამის შემდეგ დაიჭირა მეკარემ. ცოტა ხანში კი კანადელები ხუთეულის შეცვლისას შეცდნენ და პრაისთან პირისპირ გავიდა ნიკლას კრონვალი, მაგრამ პირდაპირ "მონრეალის" გოლკიპერს გაარტყა შაიბა.
კანადა თითქოს უფრო აქტიურობდა, მაგრამ სადღაც პერიოდის შუაში დარტყმების შეფარდება ექვსი ორთან იყო, შვედეთის სასარგებლოდ.
გარკვეული ხანი, ერთადერთი შეტევითი სამეული, რომელიც შვედეთს პრობლემებს უქმნიდა, სიდნი კროსბის ტრიო იყო. "პიტსბურგის" ვარსკვლავი და პატრის ბერჟერონი სასწაულებს სჩადიოდნენ, თუმცა ერთხელ ამ უკანასკნელსაც არ გაუმართლა, როცა ძელს გაარტყა შაიბა.
ამის შემდეგ კი ნამდვილი დეჟავუ ვიხილეთ: ოთხი წლის წინ კანადის ნაკრებმა აშშ-სთან ფინალში მე-12 წუთსა და 50-ე წამზე გახსნა ანგარიში. ეს გააკეთა "ჩიკაგოს" ფორვარდმა ჯონათან ტეივზმა და ახლაც მან გაიტანა ფინალში პირველი გოლი, როცა მე-12 წუთსა და 55-ე წამზე მიმართულება შეუცვალა ჯეფ კარტერის პასს. ეს ტეივზის პირველი შაიბა იყო ტურნირზე.
მეორე პერიოდი კანადის ნაკრების ბენეფისად იქცა. შვედეთის ნაქებ დაცვას თავბრუ დაეხვა და ერთ ეპიზოდში იძულებული გახდა, მოედნის გარეთ გადაეგდო შაიბა. რიკ ნეშს, მარტინ სან ლუის, კორი პერის და სხვებს უამრავი მომენტი ჰქონდათ, მაგრამ ბრწყინვალე ჰენრიკ ლუნდკვისტი ახერხებდა მათი შეტევების მოგერიებას.
და სწორედ ამ დროს საქმეში ჩაერია სიდნი კროსბი. მისი მისამართით ამ ოლიმპიადაზე უამრავი კრიტიკა გაისმა. კანადური ჰოკეის უპირველესი ვარსკვლავი, NHL-ის საუკეთესო ბომბარდირი, ნაკრების კაპიტანი, ვანკუვერის გადამწყვეტ მატჩში ოქროს გოლის ავტორი ფინალამდე ისე მივიდა, რომ ერთი შაიბაც არ ჰქონდა გატანილი.
როგორც გაირკვა, ტურნირზე თავისი ერთადერთი გოლი მან სწორედ გადამწყვეტი მატჩისთვის შემოინახა. თან როგორი გოლი! სიდმა საკუთარ ზონასთან მოპარა შაიბა ჯონათან ერიქსონს, ნახევარი მოედანი გაირბინა და მშვიდად მოატყუა ლუნდკვისტი.
ცხადი იყო, რომ იმ დღეს შვედეთს ვერაფერი უშველიდა. სკანდინავიელმა მცველებმა მესამე პერიოდის შუაში კიდევ ერთი შეცდომა დაუშვეს და კრის კუნიტცსაც პირველი შაიბა გაატანინეს ტურნირზე.
კანადის ნაკრებმა XXI საუკუნეში მესამე ოქრო მოიპოვა, თანაც გასულ საუკუნეში თავისი მთავარი მტრის - რუსეთის მოედანზე.
MVP სელიანეა
ჰოკეის ტურნირის დასრულების შემდეგ ჟურნალისტებმა საუკეთესო მოთამაშედ ტეემუ სელიანე დაასახელეს, რომელმაც ოთხი გოლითა და ორი საგოლე პასით დაამთავრა ტურნირი. 43 წლის ჰოკეისტი კარიერაში მეექვსე ოლიმპიადას თამაშობდა და მეოთხე მედლის (ერთი ვერცხლი, სამი ბრინჯაო) მოგებაში დაეხმარა ფინეთის ნაკრებს. სელიანე ოლიმპიადების ისტორიაში ყველაზე შედეგიანი ჰოკეისტია. სოჭში თავისი მონაგარი მან 43 ქულამდე აიყვანა.
გარდა ამისა, ჟურნალისტებმა სიმბოლური ნაკრებიც დაასახელეს: მეკარე - ჰენრიკ ლუნდკვისტი (შვედეთი); მცველები - დრიუ დაუტი (კანადა), ერიკ კარლსონი (შვედეთი); ფორვარდები - ტეემუ სელიანე (ფინეთი), ფილ კესელი (აშშ), მიკაელ გრანლუნდი (ფინეთი).
ტურნირის დირექტორატმა ამპლუების მიხედვით საუკეთესოები გამოარჩია: მეკარე - კერი პრაისი (კანადა), მცველი - ერიკ კარლსონი (შვედეთი), ფორვარდი - ფილ კესელი (აშშ).
ჰოკეი. კაცები
1/2-ფინალი
შვედეთი-ფინეთი 2:1
0:0, 2:1, 0:0
გოლები: 0:1 ო. იოკინენი-2 (ვატანენი-5), 1:1 ლ. ერიქსონი-2 (ჯ. ერიქსონი-1, ბექსტრიომი-4), 2:1 ე. კარლსონი-4 (სტინი-3, დ. სედინი-4).
კანადა-აშშ 1:0
0:0, 1:0, 0:0
გოლი: 1:0 ბენი-2 (ბოუმისტერი-1).
მე-3 ადგილისთვის
აშშ-ფინეთი 0:5
0:0, 0:2, 0:3
გოლები: 0:1 სელიანე-3 (გრანლუნდი-3, კორპიკოსკი-1), 0:2 ი. იოკინენი-2 (ლეჰტერია-2, კონტიოლა-4), 0:3 ჰიეტანენი-1 (ტ. რუუტუ-4, ლეპისტო-1), 0:4 სელიანე-4 (გრანლუნდი-4, კორპიკოსკი-2), 0:5 მაატა-3 (ლეჰტერია-3, ი. იოკინენი-3).
ფინალი
კანადა-შვედეთი 3:0
1:0, 1:0, 1:0
გოლები: 1:0 ტეივზი-1 (კარტერი-2, უებერი-3), 2:0 კროსბი-1, 3:0 კუნიტცი-1.
ბომბარდირები
1. კესელი (აშშ) 8
2. ე. კარლსონი (შვედ) 8
3. გრანლუნდი (ფინ) 7
4. გრაბნერი (ავსტრია) 6
5. რადულოვი (რუს) 6
6. დაციუკი (რუს) 6
7. დაუტი (კან) 6
8. სელიანე (ფინ) 6
9. უებერი (კან) 6
სნაიპერები
1. გრაბნერი (ავსტრია) 5
2. კესელი (აშშ) 5
3. დარძინში (ლატ) 4
4. დაუტი (კან) 4
5. ე. კარლსონი (შვედ) 4
6. სელიანე (ფინ) 4
ასისტენტები
1. ვატანენი (ფინ) 5
2. დაციუკი (რუს) 4
3. ბექსტრიომი (შვედ) 4
4. რუუტუ (ფინ) 4
5. ე. კარლსონი (შვედ) 4
6. კონტიოლა (ფინ) 4
7. ვან რიმსდიკი (აშშ) 4
8. დ. სედინი (შვედ) 4
9. პაველსკი (კან) 4
10. მარლო (კან) 4
11. კეინი (აშშ) 4
12. გრანლუნდი (ფინ) 4
ყოველდღიური სპორტული გაზეთი "ლელო"
