დათა ქაჯაია ახალ სერიაში იასპარეზებს

AutoSharing Option
ქართველმა მრბოლელმა დათა ქაჯაიამ შარშან კონტრაქტი გერმანულ გუნდ "ენგსტლერთან" გააფორმა, რომელთან ერთადაც ETCC-ს TC2T კლასის ჩემპიონი გახდა.

წინა სეზონში ჩვენებურმა 12-დან 9 რბოლა მოიგო. იგი ყველა შეჯიბრებაში ტოლ-სწორად ეპაექრებოდა "სეატის" მონო-სერიის მონაწილეებს, რომლებიც უფრო მძლავრი და მსუბუქი ავტომობილებით ასპარეზობდნენ. სწორედ ამიტომაც გუნდის მფლობელმა და წარსულში თავადაც სახელოვანმა მრბოლელმა ფრანც ენგსტლერმა დათას უყოყმანოდ შესთავაზა კონტრაქტი.

ახალი სეზონიდან ქაჯაია გაცილებით მაღალ დონეზე - TCR-ის ("ტურინგ ქარ რეისინგ") საერთაშორისო სერიაში იასპარეზებს, რომელიც ამავე კლასის მსოფლიოს ჩემპიონატის WTCC განაყოფია და ყველა კონტინენტს მოიცავს.

დიდი
ალბათობით, მისი თანაგუნდელი იქნება რუსი მიხაილ გრაჩოვი, რომელმაც შარშან TCR-ის სერიაში მერვე ადგილი დაიკავა, რაც კარგი შედეგია. გრაჩოვი გამოცდილი მრბოლელია და მისი პარტნიორობა ქაჯაიას ძალიან დაეხმარება.

TCR-ის საერთაშორისო სერიაში რამდენიმე საავტომობილო კომპანია მონაწილეობს, მათ შორის - "ფოლკსვაგენი", "სეატი", "ჰონდა", "ვოლვო", "ალფა რომეო", "ოპელი". ყველა მათგანს ტურინგის კლასში ასპარეზობის უზარმაზარი გამოცდილება აქვს და, რაც მთავარია, ისინი ახალი სეზონისთვის დიდი მონდომებით ემზადებიან.

ყოველდღიური სპორტული გაზეთი "ლელო"
მკითხველის კომენტარები / 0 /
კომენტარი ჯერ არ გაკეთებულა.

სიახლეები პოპულარული