ფორმულა 1: ბრძოლა მექსიკაში გრძელდება

უახლოეს უქმეებზე ფორმულა 1 მექსიკაში ბრუნდება. ოსტინში ლუის ჰემილტონის გამარჯვების შემდეგ, ეპიცენტრი მეხიკოში ძმები როდრიგესების სახელობის ავტოდრომზე გადაინაცვლებს.

ერთი წლის წინ, ეს ტრასა კალენდარში დაბრუნდა და პრომოუტერებს სეზონის საუკეთესო გრანპრის თასი მოუტანა - რბოლამ წარმატებით ჩაიარა, ტრიბუნებზე კი 135 ათასი მაყურებელი შეიკრიბა.

გასულ წელს, მექსიკაში დამაჯერებლად მოიგო ნიკო როსბერგმა. იმ მომენტისთვის, ლუის ჰემილტონს უკვე განაღდებული ჰქონდა ჩემპიონობა და ტრასაზე დიდად თავს არ იკლავდა. ამჯერად, ყველაფერი სხვანაირად არის: უკვე ჰემილტონია მდევრის როლში. მან მხოლოდ შეტევაზე უნდა იფიქროს, თან იმის იმედად უნდა იყოს, რომ როსბერგი სადღაც წაიფორხილებს.

ასე რომ, ლუისი ისევ წნეხის ქვეშ არის, იმ დროს, როცა როსბერგი რბოლებს უშეცდომოდ ატარებს და საკმარის ქულებს აგროვებს, რათა უშუალოდ ტრასაზე არ იბრძოლოს ჰემილტონთან. მაგრამ არ უნდა დავივიწყოთ, რომ გერმანელიც პრესინგის ქვეშ იმყოფება და ერთმა უმცირესმა შეცდომამ, შესაძლოა, ყველანაირი უპირატესობა გამოაცალოს ხელიდან.

უახლოეს უქმეებზე, პრესინგი კიდევ უფრო გაიზრდება: მოვლენათა წარმატებული განვითარების შემთხვევაში, როსბერგმა, შესაძლოა, უკვე კვირას გაიფორმოს ჩემპიონობა. ეს იმ შემთხვევაში მოხდება, თუ ნიკო რბოლას მოიგებს, ხოლო ჰემილტონი მეათე ადგილზე ზემოთ ვერ ავა.

მეხიკოს ტრასა
სიგრძე: 4304 მეტრი
წრეების რიცხვი: 71
რბოლის დისტანცია: 305,584 კილომეტრი
ტრასის რეკორდი: 1:20.521 (როსბერგი, "მერსედესი", 2015)

უქმეების განრიგი
28 ოქტომბერი, 19:00 - I პრაქტიკა
28 ოქტომბერი, 23:00 - II პრაქტიკა
29 ოქტომბერი, 19:00 - III პრაქტიკა
29 ოქტომბერი, 22:00 - კვალიფიკაცია
30 ოქტომბერი, 23:00 - რბოლა

საერთო ჩათვლა
1. ნიკო როსბერგი 331 (9)
2. ლუის ჰემილტონი 305 (7)
3. დანიელ რიკარდო 227 (1)
4. სებასტიან ფეტელი 177
5. კიმი რაიკონენი 170
6. მაქს ფერსტაპენი 165 (1)
7. სერხიო პერესი 84
8. ვალტერი ბოტასი 81

მსოფლიოს ჩემპიონატის მე-18 ეტაპის შემდეგ, ცნობილმა ექსპერტმა მიკელე მერლინომ რამდენიმე საინტერესო სტატისტიკური მონაცემი გამოაქვეყნა...

კვალიფიკაცია
- ოსტინში აღებული პოული 58-ე იყო ლუის ჰემილტონის კარიერაში. ყველა მოპოვებულია "მერსედესის" ძრავებით. ამდენივე პოული ჰქონდა მიხაელ შუმახერს "ფერარის" ძრავებით.

- ოსტინის ტრასა 23-ეა ჰემილტონის კარიერაში, სადაც მან კვალიფიკაცია მოიგო. ბრიტანელი აბსოლუტური ლიდერია ფორმულა 1-ის ისტორიაში ამ მაჩვენებლით. ალენ პროსტს 22 სხვადასხვა ტრასაზე აქვს აღებული პოული, აირტონ სენას - ოცზე.

- ჰემილტონმა გაათანაბრა ანგარიში საკვალიფიკაციო დაპირისპირებებში თანაგუნდელთან - 18 ეტაპის შემდეგ, მასსა და ნიკო როსბერგს შორის 9:9 არის ანგარიში.

- კიმი რაიკონენის მეხუთე ადგილი სტარტზე - საუკეთესო შედეგია კვალიფიკაციაში "ფერარისთვის" ამ ტრასაზე.

რბოლა
- ოსტინში რბოლის მოგებით, ლუის ჰემილტონი მესამე პილოტი გახდა ფორმულა 1-ის ისტორიაში, ვისაც კარიერაში მინიმუმ 50 ეტაპი აქვს მოგებული. მასზე წინ არიან მიხაელ შუმახერი (91 მოგება) და ალენ პროსტი (51 მოგება).

- ჰემილტონს ოსტინში ჩატარებული ხუთი რბოლიდან ოთხი აქვს მოგებული.

- ჰემილტონმა კარიერაში 29-ე რბოლა მოიგო პოულიდან სტარტის შემდეგ. ასეთივე შედეგი ჰქონდა აირტონ სენას.

- "მერსედესმა" მეხუთე დუბლი შეასრულა ამ სეზონში და 33-ე ისტორიაში. ამით, გერმანული საჯინიბო გაუთანაბრდა "უილიამსს". ზედიზედ სამი წელია, "მერსედესი" ოსტინში დუბლს ასრულებს.

- კარიერაში პოდიუმზე 54-ედ ასვლის შემდეგ, ნიკო როსბერგი დაეწია ნიკი ლაუდას და მასთან მე-12 ადგილს იკავებს საერთო რეიტინგში.

- დანიელ რიკარდომ კარიერაში მე-17 პოდიუმი მოიპოვა და გაუთანაბრდა ალბერტო ასკარისა და კეკე როსბერგს.

- სებასტიან ფეტელმა მეოთხე ადგილი დაიკავა და ხუთამდე გააგრძელა უპოდიუმო რბოლების სერია. ბოლო 10 გრანპრიში გერმანელს მხოლოდ ერთ პოდიუმი აქვს მოპოვებული - ეს მისი ყველაზე ცუდი სტატისტიკაა 2008 წლის შემდეგ, როცა დებიუტი ჰქონდა ფორმულა 1-ში.

- მეხუთე ადგილზე გასვლით, ფერნანდო ალონსომ გაიმეორა თავისი საუკეთესო შედეგი ამ სეზონში, რომელიც მონაკოში ჰქონდა.

ყოველდღიური სპორტული გაზეთი "ლელო"