დაკარი 2017: "პეჟოს" ზეიმი, "ტოიოტას" კრახი ნასერ ალ-ატიიასთვის

მთელი რიგი ფავორიტებისთვის წარუმატებელი გამოდგა "დაკარი 2017"-ის მესამე ეტაპი, რომლის სიგრძეც 364 კილომეტრს შეადგენდა.

ავტომობილების კლასში, თავდაპირველად, ყველაფერი კარგად მიდიოდა ყატარელი ნასერ ალ-ატიიასთვის. ის სწრაფად დაეწია წინა ეტაპის ტრიუმფატორ სებასტიან ლოებს, რითაც საერთო ჩათვლის ვირტუალური ლიდერი გახდა. მაგრამ ეტაპის მეორე ნაწილზე ალ-ატიიას სხვადასხვა მიზეზის გამო, ორჯერ მოუწია გაჩერება. ამან ფინიშზე ორსაათიანი ჩამორჩენა გამოიწვია და ახლა, ყატარელი უნდა ჩამოვწეროთ საერთო გამარჯვებაზე პრეტენდენტთა სიიდან.

ეს არ ყოფილა "ტოიოტას" ერთადერთი კრახი. პრობლემები შეექმნათ გუნდის სხვა ლიდერებსაც: ტრასაზე გაჩერდნენ ნანი რომა, ჟინიელ დე ვილიერსი და ერიკ ვან ლონი. ყველაზე ცოტა - 13 წუთი დაკარგა რომამ, ასე რომ, ახლა, სწორედ ის არის "ტოიოტას" მთავარი იმედი.

სამაგიეროდ, ნამდვილი ტრიუმფი ჰქონდა "პეჟოს": ფრანგული გუნდის ლიდერებმა ეტაპი შესანიშნავად წარმართეს. ყველაზე სწრაფი მოქმედი ჩემპიონი სტეფან პეტერანსელი იყო, კარლოს საინსმა მასთან ორ წუთზე ნაკლები წააგო, ხოლო სებასტიან ლოებმა, რომელსაც თავიდან გზა აებნა და ერთხელ საბურავიც გაუსკდა - სამ წუთზე ოდნავ მეტი. ასე რომ, "პეჟომ" ჰეთ-თრიკი შეასრულა! საერთო ჩათვლაში ლოებმა შეინარჩუნა ლიდერობა, მაგრამ საინსი მას წუთზე ნაკლებით ჩამორჩება, პეტერანსელი - დაახლოებით ოთხი წუთით. ჯერ ადრეა ამაზე ლაპარაკი, მაგრამ, როგორც ჩანს, გამარჯვებისთვის ბრძოლა "პეჟოს" პილოტების პირადი საქმე გახდება.

* * *
მოტოციკლების კლასში ლიდერი შეიცვალა. წინა ეტაპის ტრიუმფატორი, ავსტრალიელი ტობი პრაისი პირველი წავიდა ტრასაზე და გზა აებნა, რამაც დაახლოებით 22 წუთი დააკარგვინა. ყველაზე კარგად ორიენტირება ხოან ბარედა ბორტმა შეძლო: ესპანელმა დისტანცია ჩავარდნის გარეშე გაიარა და იმავე პრაისს 22 წუთი მოუგო, უახლოეს მდევარს სემ სანდერლენდს კი 11 წუთზე მეტი!

ასე რომ, საერთო ჩათვლის ლიდერი სწორედ ბარედა ბორტი გახდა, რომელსაც ძალიან დიდი უპირატესობა აქვს კონკურენტებზე.

ავტო. საერთო ჩათვლა
1. სებასტიან ლოები (პეჟო) - 06:54:56
2. კარლოს საინსი (პეჟო) - +0:42
3. სტეფან პეტერანსელი (პეჟო) - +4:18
4. მიკო ჰირვონენი (მინი) - +9:38
5. ნანი რომა (ტოიოტა) - +13:04

მოტო. საერთო ჩათვლა
1. ხოან ბარედა ბორტი (ჰონდა) - 07:35:30
2. სემ სანდერლენდი (KTM) - +11:20
3. პაულუ გონკალვეში (ჰონდა) - +14:42
4. პაბლო კინტალია (ჰუსკვარნა) - +15:56
5. ტობი პრაისი (KTM) - +17:19

ყოველდღიური სპორტული გაზეთი "ლელო"