მარტინა ჰინგისის მესამედ მოსვლა

ხუთწლინახევრიანი პაუზის შემდეგ მარტინა ჰინგისმა მეორედ გადაწყვიტა პროფესიულ დონეზე კარიერის განახლება. უკვე არაერთხელ დავწერეთ იმის შესახებ, რომ შვეიცარიელის პირველი ტურნირი იქნება კარლსბადი, სადაც ის წყვილებში დანიელა ჰანტუხოვასთან ერთად ითამაშებს. დღეს ჩვენ გავიხსენებთ ჰინგისის კარიერის საინტერესო მომენტებს...

მარტინა ჰინგისი არის მოთამაშე, რომელსაც გამოარჩევს უდიდესი ნიჭი და ტაქტიკური ოსტატობა. ბურთის ბრწყინვალე გრძნობამ გადაფარა მისი მოკრძალებული ფიზიკური შესაძლებლობები და ლეგენდარული ჩოგბურთელი გახდა. სანამ 1994 წელს პროფესიულ კარიერას დაიწყებდა, მარტინას ITF-ის ერთი ტიტული ჰქონდა მოგებული. პროფესიონალებში თავისი პირველი სეზონი მან რეიტინგის პირველ ასეულში დაასრულა. მომდევნო წელს WTA-ს კლასიფიკაციის ოცეულში შევიდა, კიდევ ერთი წლის შემდეგ - ათეულში.

1997 წლის სეზონი მარტინას დომინირების წელი იყო ქალთა ტურში. მან ერთეულებს შორის მოიგო "დიდი სლემის" სამი ტურნირი, გახდა მსოფლიოს პირველი ჩოგანი და მიიღო "წლის საუკეთესო ჩოგბურთელის" პრიზი. მომდევნო ოთხი სეზონი მარტინა აგრძელებდა უმაღლეს დონეზე თამაშს, სანამ 2001 წლის ბოლოს მის კარიერაში გარდამტეხი მომენტი არ დადგა: ფილდერშტადტის ტურნირზე მან კოჭის ტრავმა მიიღო და ოპერაციის გადატანა მოუწია.

ამის გამო ნაადრევად დაასრულა სეზონი და სწორედ ეს დაზიანება გახდა მოგვიანებით მისი დიდი სპორტიდან პირველად წასვლის მიზეზი.

ორივე ფეხზე ტრავმებისა და ოპერაციების მიუხედავად, მარტინამ ხასიათის სიმტკიცე გამოავლინა და შესვენების დროს, რომელიც ორი წელი გრძელდებოდა, ჩოგბურთი არ დაივიწყა და ტელეკომენტატორად მუშაობდა. 2005 წელს კი ინდონეზიის ქალაქ პატაიას ტურნირში მიიღო მონაწილეობა. მართალია, პირველ წრეში შვეიცარიელმა გერმანელ მარლენ ვაინგარტნერთან წააგო, მაგრამ ფარ-ხმალი არ დაყარა და ოფიციალურად გამოაცხადა, რომ ბრუნდება დიდ ჩოგბურთში.

სეზონის დარჩენილი ნაწილი მან ვარჯიშებს მიუძღვნა, 2006 წელს კი საჩოგბურთო სამყარომ კვლავ იხილა ჰინგისი კორტზე.

* * *
დაბრუნება ტრიუმფალური გამოდგა: "დიდი სლემის" პირველივე ტურნირზე - ავსტრალიის ღია პირველობაზე მარტინამ მოიგო ტიტული მიქსტში, ერთეულებში კი მეოთხედფინალამდე მიაღწია. გზად მან დაამარცხა რუსი ვერა ზვონარევა და დაძაბულ ბრძოლაში წააგო კიმ კლაისტერსთან. ამ წარმატების ტალღაზე დაიწყო მარტინას აღმასვლა WTA-ს რეიტინგში. ის ფორმის პიკზე გრუნტის სეზონისთვის ავიდა.

ვარშავას ტურნირზე მას უკვე მეორე წრეში ერგო მეტოქედ ვენუს უილიამსი. მარტინამ მასთან ძალიან დაძაბულ ბრძოლაში წააგო. შემდეგ, ბელგრადის ტურნირის მეოთხედფინალში ის სამსეტიან შეხვედრაში დამარცხდა მსოფლიოს პირველ ჩოგანთან, ამელი მორესმოსთან. რომში კი ჰინგისმა დაბრუნების შემდეგ, როგორც იქნა, თავისი პირველი ტიტული აიღო. მთელ დისტანციაზე ერთადერთი სეტი მან უკვე ნახსენებ ვენუს უილიამსთან წააგო.

როლან გაროსზე შვეიცარიელი მეოთხედფინალში გავიდა და ისევ გადაულახავი აღმოჩნდა კიმ კლაისტერსის ბარიერი. სეზონის დარჩენილ ნაწილში მარტინა მონრეალის პირველი კატეგორიის ტურნირის ფინალში გავიდა, მოიგო კალკუტაში და დაბრუნდა რეიტინგის საუკეთესო ათეულში. შვეიცარიელმა წელი მეშვიდე ჩოგანის რანგში დაასრულა. ასეთი წარმატებული სეზონი WTA-ს შეუმჩნეველი არ დარჩენია და მარტინამ მიიღო პრიზი ნომინაციაში "წლის დაბრუნება".

შემდეგი და ჯერჯერობით ბოლო სეზონი მარტინამ გოლდ-კოუსტში დაიწყო, სადაც ფინალი წააგო დინარა საფინასთან. ავსტრალიის ღია პირველობაზე ისევ გავიდა მეოთხედფინალში და ისევ კლაისტერსთან წააგო. ტოკიოს ტურნირზე მთავარი პრიზი მოიპოვა, თანაც არც ერთი სეტი არ დაუთმო მეტოქეებს, მაგრამ თანდათან ჩავარდნა დაიწყო და უიმბლდონისთვის მარტინა აღარ ირიცხებოდა რეიტინგის TOP 10-ში.

შემდეგ კი მოხდა ცნობილი დოპინგ-სკანდალი: შვეიცარიელის სისხლში აღმოაჩინეს კოკაინის კვალი და მან მეორედ გადაწყვიტა კარიერის დასრულება.

* * *
ამა წლის ივლისში, დიდების საერთაშორისო დარბაზში შეყვანის შემდეგ, სახელოვანმა ჩოგბურთელმა განაცხადა, რომ აპირებს კარლსბადისა და ნიუ ჰევენის ტურნირებზე გამოსვლას. ერთეულთა თანრიგს მან წყვილები ამჯობინა და პარტნიორად დანიელა ჰანტუხოვა აირჩია, რომელთანაც მარტინას ერთად გამოსვლის გამოცდილება გააჩნია.

გაურკვეველია, რას უკავშირდება ასეთი მოულოდნელი გადაწყვეტილება. სავარაუდოა, რომ თავისი როლი ითამაშა მარტინას ჩოგბურთისადმი სიყვარულმა. და აქ წარმოიშვება ასოციაცია მეორე მარტინასთან - ნავრატილოვასთან, რომლის პატივსაცემადაც დაარქვეს სახელი ჰინგისს. თავის დროზე ლეგენდარულმა ამერიკელმაც ჩოგბურთის სიყვარულით განაახლა კარიერა, სხვათა შორის, წყვილთა თანრიგში.

თავად მარტინამ განაცხადა, რომ კარგ თამაშს აჩვენებს და მოუთმენლად ელის კარიერის განახლებას. მართალია, საჩვენებელი ტურნირები, რომლებშიც მარტინა გამოდის, საზომად არ გამოდგება, მაგრამ შვეიცარიელი იქ მართლაც კარგად გამოიყურება.

"მოუთმენლად ველოდები პროფესიულ ჩოგბურთში დაბრუნებას. მახსოვს, როგორ მოვიგე კარლსბადში 1997 წელს ერთეულთა და წყვილთა თანრიგები. 1999 წელს ისევ გავიმარჯვე ერთეულებში. ეს ტურნირი ყოველთვის ერთ-ერთი საყვარელი იყო ჩემთვის. მიმაჩნია, რომ კარგ ფორმაში ვარ. ძველებურად მიყვარს კონკურენცია და თამაში. ეს შეჯიბრი იდეალურია იმისთვის, რომ ისევ დავიწყო WTA-ს ტურში გამოსვლა", - ამბობს შვეიცარიელი.

გაბედავს თუ არა ჰინგისი კიდევ ერთხელ ერთეულებში გამოსვლას? ჯერ ამაზე ზუსტი პასუხი არ არსებობს, მაგრამ მაგალითად შეიძლება იაპონელი კიმიკო დატეს მოყვანა. შესაძლოა, წყვილებში რამდენიმე გამარჯვების შემდეგ მარტინამ მოგების გემო გაიხსენოს და ერთეულებში გამოსვლა მოინდომოს.

მარტინა ჰინგისი
დაიბადა: 1980 წლის 30 აპრილს
ადგილი: კოშიცე, ჩეხოსლოვაკია
სიმაღლე: 170 სმ. წონა: 59 კგ.
პროფესიული კარიერის დასაწყისი: 1994
დასასრული: 2003
დაბრუნება: 2006
მეორე დასასრული: 2007
ჰონორარი კარიერაში: $20 130 657
ერთეულებში: 548 მოგება-133 წაგება
საუკეთესო ადგილი რეიტინგში: 1 (1997, 31 მარტი)
ტიტულების რაოდენობა: 43
დიდი სლემი
ავსტრალიის ღია - ტიტული (1997, 1998, 1999)
როლან გაროსი - ფინალი (1997, 1999)
უიმბლდონი - ტიტული (1997)
აშშ-ის ღია - ტიტული (1997)
შემაჯამებელი - ტიტული (1998, 2000)

* * *
წყვილებში: 286 მოგება-54 წაგება
საუკეთესო ადგილი რეიტინგში: 1 (1998, 8 ივნისი)
დიდი სლემი
ავსტრალიის ღია - ტიტული (1997, 1998, 1999, 2002)
როლან გაროსი - ტიტული (1998, 2000)
უიმბლდონი - ტიტული (1996, 1998)
აშშ-ის ღია - ტიტული (1998)
მიქსტი: ტიტული - ავსტრალიის ღია (2006)

ყოველდღიური სპორტული გაზეთი "ლელო"

ასევე იხილეთ:
მარტინა ჰინგისს აშშ-ის ღია პირველობაზეც ვნახავთ