შტეფი გრაფი vs სერენა უილიამსი

ამერიკულ ვებგვერდს ESPN-ს საინტერესო რუბრიკა აქვს - ის ჩოგბურთის ისტორიაში საუკეთესო მოთამაშეებს შორის ვირტუალურ მატჩებს აწყობს. ვებგვერდის ექსპერტები აანალიზებენ მოთამაშეთა უპირატესობებსა და ნაკლოვანებებს მათი სპორტული ფორმის პიკის პერიოდში და ამ ხერხით ვირტუალური გამარჯვებულის გამოვლენას ცდილობენ. საბოლოო სიტყვა ყოფილ ამერიკელ ჩოგბურთელს, ამჟამად მწვრთნელსა და ექსპერტს ბრედ გილბერტს ეკუთვნის.

ამჯერად, ESPN-მა ორი ლეგენდარული ჩოგბურთელი დააპირისპირა - გერმანელი შტეფი გრაფი და ამერიკელი მოქმედი სპორტსმენი სერენა უილიამსი. ვირტუალური მატჩის ჩატარების ადგილად ავსტრალიის ღია პირველობა დასახელდა.

ფაქტორები შტეფი გრაფის სასარგებლოდ
ალბათ, ყველაზე რთული სწორედ ამ მატჩის გამარჯვებულის განსაზღვრა უნდა იყოს. ბევრი რამ პირად სიმპატიებს ეფუძნება, ეს კი იმას ნიშნავს, რომ არასოდეს გახდება ცხადი, ვინ არის ამ ორ შორის საუკეთესო.

გრაფი ყველა დროის სამ უდიადეს ჩოგბურთელს შორის იკავებს ადგილს - ამაზე არავინ კამათობს. უფრო მეტიც, კარიერული მონაცემებით, ჩოგბურთის ისტორიაში შტეფის პირველ ადგილზე დაყენება შეიძლება. თავად განსაჯეთ: მან მოიგო "დიდი სლემის" 22 ტიტული, გაიმარჯვა WTA-ის 107 ტურნირში და 377 კვირის განმავლობაში სათავეში ედგა კლასიფიკაციას. სხვათა შორის, 107 ტიტული ორჯერ მეტია სერენას ამჟამინდელ მაჩვენებელზე.

თუმცა ავსტრალიის ღია პირველობაზე მათი მაჩვენებლები პრაქტიკულად იდენტურია: გრაფმა აქ მოიპოვა ოთხი ტიტული, მატჩების სტატისტიკა კი ასე გამოიყურება: 47 მოგება-6 წაგება. უილიამსს მელბურნში ხუთჯერ გაუმარჯვია, ხოლო მოგება/წაგების სტატისტიკა ასეთი აქვს: 54-7.

იმის მიუხედავად, რომ გრაფი ყველას ანადგურებდა თავისი ფორჰენდით, მას გაუჭირდებოდა სერენას ძალასთან გამკლავება. თუმცა ავსტრალიის ღია პირველობის თანამედროვე ნელი საფარი, გარკვეულწილად, გაანეიტრალებდა სერენას ტემპს. ამას ასევე ხელს შეუწყობდა გერმანელის ათლეტიზმი, რომელიც დიდ როლს თამაშობდა ბევრი მოწინააღმდეგის დამარცხებაში. ავსტრალიაში მათი შეხვედრა ნამდვილი ტესტი იქნებოდა ამტანობაზე, ამაში კი გრაფი ყოველთვის ძლიერი იყო.

1988-90 წლებში, სამი სეზონის განმავლობაში, შტეფიმ ავსტრალიის ღია პირველობაზე მხოლოდ ერთი სეტი წააგო. ეს არის ჩოგბურთის ისტორიაში ერთი ჩოგბურთელის დომინირების ერთ-ერთი უდიადესი პერიოდი, როცა გრაფმა "დიდი სლემის" ცხრა ტიტულიდან რვა მოიგო. 1988 წელს, მან კალენდარული "დიდი სლემი" შეასრულა, რასაც სეულის ოლიმპიადაზე მოპოვებული ოქროს მედალი დაუმატა. ეს იყო გამარჯებათა დაუჯერებელი სერია, სადაც გერმანელის ძალა კარგად ეხამებოდა ნებისმიერ საფართან ბრწყინვალე ადაპტაციის უნარს.

კორტზე გრაფი თითქმის არ ავლენდა ემოციებს, მას არ ჰქონდა ისეთი ჩავარდნები, როგორსაც, ხანდახან სერენას მოქმედებაში ვხედავთ. გერმანელი ჩოგბურთელი მოედანზე გადიოდა ისე, რომ მხოლოდ ერთ მიზანს იყო დამორჩილებული - მოგება.

ფაქტორები სერენა უილიამსის სასარგებლოდ
ამ სეზონში ჩოგბურთის მოყვარულმა ბევრი სენსაცია იხილა, მაგრამ გულშემატკივრებს შორის ყველაზე დიდი გაოცება გამოიწვია სერენას მარცხმა ავსტრალიის ღია პირველობასა და უიმბლდონის მეოთხე რაუნდში.

ამ სეზონში ამერიკული ფანტასტიკურად თამაშობდა. მან მოიგო ზედიზედ 34 შეხვედრა, რაც საუკეთესო სერიაა მის კარიერაში. ის პრაქტიკულად ყველა ტურნირზე იმარჯვებდა. რამდენიმე კვირაში სტარტს აიღებს ამერიკის ღია პირველობა და ვინ არის დღეს ისეთ ფორმაში, რომ უმცროსი უილიამსის შეჩერება შეძლოს? რა თქმა უნდა, არავინ ამტკიცებს იმას, რომ ამერიკელი დაუმარცხებელია, მაგრამ მაინც, უმრავლესობა ვერ გარისკავს ფსონის ჩამოსვლას სერენას წაგებაზე.

დიახ, უილიამსმა წააგო სლოუნ სტივენსთან ავსტრალიის ღიას მეოთხედფინალი, მაგრამ მას მელბურნში ხუთი ტიტული აქვს მოპოვებული. თანამედროვე ჩოგბურთში მას არ ჰყავს ისეთი მეტოქე, როგორიც შეიძლებოდა შტეფი გრაფი ყოფილიყო.

ვერავინ დაიკვეხნის სერენაზე რეგულარული გამარჯვებებით. ეს ეხება ფიზიკურად ისეთ ძლიერ ჩოგბურთელებს, როგორიც ვინუს უილიამსია, რომელიც დაახლოებით ათი წლის წინ დომინირებდა საკუთარ დაზე. ეხება ასევე ჭკვიან და ტექნიკურ მოთამაშეებს. ასეთი იყო ჟუსტინ ანენი, რომელსაც ექვსჯერ დაუმარცხებია სერენა, მაგრამ აქედან ოთხჯერ გრუნტზე, თანაც ამერიკელისთვის არც ისე წარმატებულ სეზონებში.

ნებისმიერ ლეგენდარულ სპორტსმენს აქვს ნაკლი. ეს შეიძლება იყოს უხერხული მეტოქე, რომელთანაც ის რეგულარულად აგებს, ან უხერხული საფარი. თუ გავიხსენებთ ახლო წარსულში სერენა უილიამსის წაგებებს, გონებაში ამოტივტივდება ბალახზე საბინ ლისიცკისთან, ჰარდზე ვიქტორია აზარენკასთან და გრუნტზე ვირჟინ რაზანოსთან მარცხი. საერთო ჯამში, ეს ერთეული შემთხვევები შეგვიძლია მივაწეროთ იმ კონკრეტულ მომენტში დიადი ამერიკელის ცუდ ფორმას.

დღეისთვის, სერენას თაობის პრაქტიკულად ნებისმიერი ჩოგბურთელი ვერ ახერხებს დიდი თამაშის ჩვენებას. ამ დროს კი სერენას 2011 წლიდან მოყოლებული, 80 მატჩი აქვს მოგებული და მხოლოდ 7 წაგებული. ეს დაუჯერებელი ციფრებია. სპორტული ფორმის პიკზე მყოფი შტეფი გრაფისთვისაც კი ძალიან რთული იქნებოდა ამ "ქარიშხალის" მოგერიება, მით უმეტეს, რომ სერენას ქალთა ჩოგბურთის ისტორიაში საუკეთესო მოწოდება გააჩნია.

ბრედ გილბერტის ვერდიქტი
ისტორიას არ ახსოვს უფრო დიადი მოთამაშეები. ამ დაპირისპირებაში ერთმანეთს შეხვდებოდნენ XX საუკუნის უდიადესი ჩოგბურთელი და XXI ასწლეულის საუკეთესო სპორტსმენი.

მიუხედავად იმისა, რომ თავის დროზე შტეფი დომინირებდა ჰარდის საფარზე, მას სერენას დამარცხების ყველაზე კარგი შანსი გრუნტზე ექნებოდა. უფრო სწრაფ კორტზე ჩვენ ვიხილავდით შეტევისა და ტემპის ბრწყინვალე ნაზავს, ხოლო სერენას ძალა და მისი ბრწყინვალე მოწოდება, ამერიკელს ამ მატჩებში ფავორიტად აქცევდა.

და მაინც, გილბერტის აზრით, შტეფი გრაფისა და სერენა უილიამსის ათ ურთიერთდაპირისპირებაში ანგარიში - 5:5 იქნებოდა.

ყოველდღიური სპორტული გაზეთი "ლელო"

ასევე იხილეთ:
ESPN-მა პრიზები დაარიგა