ქართველი ჩოგბურთელი ალექსანდრე მეტრეველი გერმანიაში იმყოფება და ესენის საერთაშორისო ტურნირში (საპრიზო ფონდი 10.000 დოლარი) მონაწილეობს. პირველ ნომრად განთესილმა ჩვენებურმა პირველ წრეში პოლ ვოერნერი (გერმანია) დაამარცხა - 6:3, 6:4 და მერვედფინალში ასევე მასპინძელს - თანამემამულე იორდი ვალდერის მძლეველ (4:6, 6:1, 6:3) მატს როსენკრაცს უნდა შეხვედროდა, მაგრამ ამ უკანასკნელმა თამაშზე უარი თქვა და მეტრეველი მეოთხედფინალში უბრძოლველად გავიდა, სადაც რობერტო სუბერვისა (დომინიკა) და ბარტ სტევენსს (ჰოლანდია) შორის უძლიერესს დაელოდება.
* * *
3 აგვისტოს თელავში, ჩოგბურთელ ვაჟთა 10.000-იან საერთაშორისო ტურნირზე ერთეულებში დარჩენილი პირველი წრის შოთა მეფარიძემ უზბეკი შონიქმაჯონ შოფაიზიევი დაამარცხა - 6:4, 6:4 და მერვედფინალში ბრიტანელ დენ დოუსონთან გაარკვევს ურთიერთობას. ამ უკანასკნელმა ასპარეზობის რეიტინგფავორიტი ნიკოლას ალბერტო არეჩე (არგენტინა) ჩამოიშორა გზიდან - 6:3, 6:2.
წარმატებით ითამაშა ალექსანდრე ბაკშიმ - მეექვსე ნომრად განთესილ გაბორ ბორსოშს (უნგრეთი) აჯობა - 3:6, 7:5, 6:2. მეორე წრეში თბილისელი ჩოგბურთელი ილია ვასილიევს (რუსეთი) გაუწევს მეტოქეობას. ჩვენმა ჩრდილოელმა მეზობელმა ფრანგ ანტონ უალის მოუგო - 6:4, 6:3.
საგულისხმოა, რომ წყვილებში მეფარიძისა და ბაკშის დუეტი დღეს მეორე წრეში უკრაინელებს - ალექსანდრ ბიელინსკისა და ოლეგ პრიხოდკოს ეთამაშება.
რაც შეეხება საქართველოს ნაკრების წევრ გიორგი ცივაძეს, მერვედფინალში მას ავსტრალიელი თომას ფანკუტი ელის.
(იბეჭდება მცირე ცვლილებით)
ყოველდღიური სპორტული გაზეთი "ლელო"
