უბრალოდ საუკეთესო ფლოიდ მეივეზერი

წლის მთავარ საკრივო ორთაბრძოლაში 36 წლის ამერიკელმა ფლოიდ მეივეზერმა (44-0-0, 26KO) ქულებით დაამარცხა თავისი თაობის ერთ-ერთი უნიჭიერესი მოკრივე - მექსიკელი საულ ალვარესი (42-0-1, 30KO). ბრძოლა ლას ვეგასის ლეგენდარულ MGM Grand-ში გაიმართა.

პრაქტიკულად, მთელი ამერიკა ემზადებოდა ამ შეხვედრის სანახავად, ტრიბუნებზე კი სპორტისა და კინოს უდიდესი ვარსკვლავები ვიხილეთ - მაიკლ ფელპსი, მეჯიქ ჯონსონი, უეინ გრეტცკი, ჯეკ ნიკოლსონი, დენზელ ვაშინგტონი... ხოლო თინეიჯერების კერპმა ჯასტინ ბიბერმა რინგზე გაიყვანა მეივეზერი.

უნდა აღინიშნოს, რომ აწონვაზე ალვარესი მეივეზერზე ფუნტნახევრით (152 150.5-ის წინააღმდეგ) მძიმე აღმოჩნდა და სპეციალისტები ამ ფაქტორს მექსიკელის მთავარ უპირატესობად ასახელებდნენ. და მაინც, ფავორიტად ერთხმად აღიარებდნენ მეივეზერს და თუ ალვარესი იმ დღეს კრივის ახალი ისტორიის შექმნას აპირებდა, ამისთვის მას ნამდვილი გმირობის ჩადენა მართებდა.

ბრძოლა
მექსიკელი თავიდანვე თავქუდმოგლეჯილი არ წავიდა წინ და საწყის რაუნდებში ფრთხილ, მაგრამ აგრესიულ დაზვერვას ატარებდა. ამასთან, ერთ ადგილზე მყარად იდგა და უკან ერთი ნაბიჯითაც არ იხევდა. მეივეზერისგან კი დებიუტში საერთოდ არავინ ელოდა განსაკუთრებულ აქტიურობას: ხანგრძლივი დაზვერვა და ტემპის თანდათან მომატება - ამერიკის ჩვეულებრივი სტილია.

მხოლოდ მესამე რაუნდის შუა ნაწილიდან გაუშინაურდა მეივეზერი რინგსა და მეტოქეს. მართალია, ალვარესის მწვანე ხელთათმანებს პერიოდულად ვხედავდით ფლოიდის სახესთან ახლოს, მაგრამ ეს ამერიკელს არანაირ ზიანს არ აყენებდა. მექსიკელი მოწინააღმდეგეს, ძირითადად, მხრებსა და ბიცეპსებში ახვედრებდა და იშვიათად, ნიკაპში.

მეხუთე რაუნდში ალვარესის "ორმაგი" მიზანს აცდა, მეივეზერის საპასუხო დარტყმა კი ზუსტად ცხვირში მოხვდა მექსიკელს. მეშვიდე რაუნდში მაყურებელმა იხილა დარტყმების მოულოდნელი გაცვლა, მაგრამ უფრო ზუსტი და აქცენტირებული შეტევები ამერიკელს ჰქონდა. ფლოიდის ტაქტიკა ასეთი იყო - ორი-სამი ზუსტი დარტყმა და უკან დახევა.

რაღაც მომენტში ალვარესი ბაგირებთან დადგა და მეტოქის ახლო ბრძოლაში შეტყუება სცადა, მაგრამ ვერც ამ დროს მიაღწია წარმატებას. ფლოიდის უპირატესობა სისწრაფესა და ტექნიკაში ბრძოლის ნებისმიერ მონაკვეთში იგრძნობოდა. ცხადი გახდა, რომ მექსიკელს დამარცხებისგან მხოლოდ ერთი შემთხვევითი ნოკაუტის მომტანი დარტყმა გადაარჩენდა და ისიც რისკზე წავიდა.

ბოლო სამწუთეულის განმავლობაში ალვარესი ჯიუტად ცდილობდა დამაგვირგვინებელი დარტყმის შესრულებას, მაგრამ მას ძალები ეცლებოდა, მეივეზერს კი გამოცდილება ეხმარებოდა, თავიდან აეცილებინა ნებისმიერი სერიოზული საფრთხე. ფლოიდმა დაადასტურა თავისი ძველი სტატუსი - მსოფლიოს საუკეთესო მოკრივე ყველა წონით კატეგორიაში კვლავაც დაუმარცხებელია პროფესიულ რინგზე.

ორი მსაჯის გადაწყვეტილებით, მან დაამარცხა ალვარესი - 116:112, 117:111, მესამე არბიტრმა კი მოულოდნელად ფრე დააფიქსირა - 114:114.

ბრძოლის შემდეგ
ასე რომ, მეივეზერმა გააერთიანა პირველ საშუალო წონაში WBC-ისა და WBA-ს ტიტულები, ალვარესმა კი პირველი მარცხი იწვნია პროფესიულ რინგზე. ბრძოლის შემდეგ ინტერვიუში ფლოიდმა შეაქო მოწინააღმდეგე და მადლობა გადაუხადა თავის მამასა და მწვრთნელს, რომლის შეგირდი კვლავ გახდა გერეროსთან წინა ბრძოლის წინ.

"კანელო - ახალგაზრდა და ძლიერი ჩემპიონია. ქედს ვიხრი მის და მთელი მექსიკის წინაშე. ის ნამდვილი ჩემპიონია, რომელსაც დიდი გული აქვს. ალვარესი ახალგაზრდაა და ისევ დაბრუნდება. უკვე 17 წელია, რინგზე ვარ და კვლავაც ყველას ვჯობივარ.

მინდა მადლობა გადავუხადო მამაჩემს. მან მითხრა, რომ სასტარტო რაუნდებში შებოჭილი ვიყავი და ის მართალი იყო. ყურადღებით ვუსმენდი მას რაუნდებს შორის შესვენებისას. მამაჩემმა ბრძოლისთვის ბრწყინვალე გეგმა შეადგინა; მე, უბრალოდ, გავედი რინგზე და ჩემი სამუშაო შევასრულე", - განაცხადა ჩემპიონმა.

ალვარესმა კი აღიარა თავისი დამარცხება. მან აღნიშნა, რომ მთავარი პრობლემა მეტოქის უპირატესობა იყო სისწრაფეში. "ჩემი ჯიუტი მცდელობის მიუხედავად, მე, უბრალოდ, ვერ ვეწეოდი მას. ის მოუხელთებელი იყო. არ ვიცოდით, როგორ გამოგვეჭირა რინგზე. ყველაფერი მარტივია. ფლოიდი ბრწყინვალე მოკრივეა", - თქვა მექსიკელმა.

ახლა მეივეზერი, რომელმაც ამ ბრძოლისთვის 41.5 მილიონი დოლარი მიიღო, ახალ მოწინააღმდეგეს აირჩევს მორიგი ბრძოლისთვის. სავარაუდო მეტოქეებს შორის ფიგურირებენ პუერტორიკოელი დენი გარსია და მექსიკელი კარლოს მოლინა, რომლებმაც იმავე საღამოს მოიპოვეს თავიანთ ბრძოლებში გამარჯვებები. ასევე, სახელდებიან ბრიტანელი ამირ ჰანი, ამერიკელები - დევონ ალექსანდერი და ტიმოტი ბრედლი, მექსიკელი ხუან მანუელ მარკესი...

თუმცა კრივის მოყვარულთა უმრავლესობისთვის კვლავაც ყველაზე სასურველი ვარიანტია რინგზე ფლოიდ მეივეზერისა და ფილიპინელი მენი პაკიაოს დაპირისპირების ხილვა.

ყოველდღიური სპორტული გაზეთი "ლელო"

ასევე იხილეთ:
ფლოიდ მეივეზერმა მეტოქე დაასახელა