როგორც ყოველთვის, ოლიმპიური გუნდის მთავარ ექიმ ზურაბ კახაბრიშვილთან ინტერვიუში პრობლემებზე საუბარმა იძალა. სხვანაირად არ გამოდის - რიო დე ჟანეიროს ოლიმპიადაზე ჩვენი გუნდი წარმატებით კი გამოვიდა (ყოველ შემთხვევაში, ჩავარდნაც არ გვქონია), თუმცა პრობლემებიც უამრავი გამოჩნდა. ძალიან კი გვინდოდა, კახაბრიშვილთან ჩვენს ცალკეულ ოლიმპიელებზე უფრო მეტად გვესაუბრა, მაგრამ დღევანდელი მსოფლიოს სპორტის მოურჩენელმა ჭირმა - დოპინგმა ყველაფერი გადაფარა...
დასასრული.
იხილეთ დასაწყისი
- არტურ ტაიმაზოვთან დაკავშირებით თუ გაქვთ დამატებით რაიმე ინფორმაცია? ან თქვენ როგორ ფიქრობთ - პეკინის ოლიმპიადაზე ჰქონდა დოპინგი და ლონდონში სუფთა იყო?
-
შეიძლება, პეკინში რაღაც ვერ გათვალა და ვერ დაიცვა იმ დონეზე. მოგეხსენებათ, მაშინ სულ სხვა ჭიდაობა იყო და დავიდ მუსულბესთანაც ბოლომდე მოუწია ბრძოლამ. შედეგად, იქ ბოლომდე დაიხარჯა, ლონდონში - არა და არც "დაიწვა" სრულყოფილად. არ ვიცი, სხვა ახსნა ვერ მომიძებნია. რიოში დოპინგის ჩამბარებელი ხალხი იყო სულ ვადა-ს კადრები - კანადიდან და შვეიცარიიდან, რომლებსაც აყვანილი ჰყავდათ სხვადასხვა ქვეყნების წარმომადგენლები. მათ ხშირად შევხვედრივარ პირველხარისხოვან ტურნირებზე, ზოგთან ვმეგობრობ კიდეც, თუმცა ამჯერად იმდენად მკაცრად ამოწმებდნენ, ჩხუბიც კი მომივიდა.
მაგალითად, ჭრიკიშვილი და ლიპარტელიანი ვარჯიშიდან წამომაყვანინეს. კი შევეწინააღმდეგე, მაგრამ უარი მითხრეს. ვუთხარი, მოვიყვანთ, ოღონდ ვარჯიშის დამთავრება გვაცალეთ-მეთქი, თუმცა იმდენად ეშინოდათ, იმ დროში რამე მაქინაციები არ გვეწარმოებინა, არაფრით არ ქნეს.
ისიც ვუთხარი, ამით თქვენ ადამიანის უფლებებს არღვევთ, რადგან ჭრიკიშვილმა ამ ვარჯიშზე ზედმეტი ორი კილოგრამიც უნდა დაიკლოს, ახლა რომ წყალი დაალევინოთ, ზედმეტ სითხეს მიიღებს-მეთქი, მაგრამ მომიბოდიშეს და მაინც უარი მითხრეს. მათ სისხლის ანალიზიც აუღეს. მეორე დღეს ხინჩეგაშვილის გაყვანა მომთხოვეს, რომელიც წონას იკლებდა, თუმცა მას აწონა რამდენიმე დღის შემდეგ უწევდა, დათუნაშვილი რამდენიმე საათით ადრე გაგვაყვანინეს. თან ეს ღამის 11-ის ნახევარზე ხდებოდა.
არადა, დოპინგის აღება ღამის 11 საათზე წყდება, რადგან 11-დან დილის 6 საათამდე სპორტსმენს უნდა ეძინოს - ეს პუნქტი 2003 წელს შევატანინეთ წესდებაში. როგორც ექიმი, ვუმტკიცებდი მათ, რომ წონის დამკლები სპორტსმენისთვის ზედმეტი წყლის დალევა არ შეიძლება. ხინჩეგაშვილმა ღამის 12 საათზე ჩააბარა სინჯი, მანამ კი ანალიზის ჩასაბარებლად ხან იმოძრავა, ხან კი რაღაც ისეთს აკეთებდა, რაც იმ შუაღამეზე არ უნდა ეკეთებინა.
დათუნაშვილი ღამის 3 საათამდე მეჯდა ოლიმპიური სოფლის დოპინგის ლაბორატორიაში, როცა მეორე დღეს დილითვე უნდა ეჭიდავა და ეს ეტყობოდა კიდეც მის გამოსვლას. ვეუბნებოდი, ცივა, პლედი მაინც მოაფარეთ-მეთქი. არანაირი კომფორტი იქ არ ჰქონდათ, კონდიციონერიც კი ვერ გავათიშვინე. 19 გრადუსამდე იყო ტემპერატურა, როცა 25 უნდა ყოფილიყო. დათუნაშვილს დერეფანში გაუშალეს საწოლი, აქ დაიძინოსო. პირდაპირ მითხრეს - წაიყვან ლაბორატორიიდან და ხვალ შეჯიბრებაზე ვერ გაიყვანო.
თუ ასეთი სიმკაცრეა, მაშინ ყველა თანაბარ პირობებში უნდა ჩააყენო და სხვებიც უნდა გაიყვანო დოპინგზე, თორემ დათუნაშვილმა ღამის 3 საათზე დაიძინა, ვიღაცამ კი - 11-ზე. არადა, ხუთი საათის ძილი ძალიან კარგი აღმდგენია და იმიტომაც ვერ იყო ზურა მეორე დღეს ფორმაში.
დოპინგზე შემოწმება აუცილებელია, მაგრამ წონის დამკლები სპორტსმენების პრობლემები გათვალისწინებული უნდა იყოს.
- რიო დე ჟანეიროში ჩვენი გუნდის სხვა წევრებზე ხომ არ შექმნილა პრობლემები?
- გაგეცინებათ და ჩვენგან დოპინგი პირველად მოცურავე გოგოს ჩააბარებინეს. პრობლემა მეტი არაფერი ყოფილა, ზემოთ დასახელებულ მაგალითებს თუ არ მივიღებთ მხედველობაში და მაშინაც რუსუდან აფციაურს ვარეკვინებდი. იყო ხალხი, ვისაც 2-2-ჯერ ჩააბარებინეს სინჯები.
კიდევ ვიმეორებ - ამაზე არ მაქვს პრეტენზია, რადგან დოპინგზე შემოწმებას მივესალმები და ეს აუცილებელიც მგონია, მაგრამ სათანადო პირობებიც უნდა შეუქმნან. კონდიციონერები ვერ ჩავართვევინე საჭირო ტემპერატურაზე, ერთ სისტემაში იყო ჩართული, შედარებით დაბალ ტემპერატურაზე და ხალხს კუნთები უცივდებოდა.
- ვადა-ს არ აქვს ნორმატივები დაწესებული, რომელიც უნდა დაიცვან შემოწმებისას?
- ეტყობა, მსგავს დეტალებს ვიღაცამ არ მიაქცია ყურადღება, თორემ ასეთი შემთხვევები იშვიათია, მაგრამ ეს გამონაკლისები მოქმედებს შედეგზე. ვადა-ს სერიოზულ წერილს მივწერ, რომ ასეთი შეცდომები არ იყოს დაშვებული.
- დაბოლოს, ძველი სინჯების გადამოწმებისას ხომ არაა საფრთხის ქვეშ ჩვენი რომელიმე სპორტსმენი?
- არა, არც ერთს არანაირი საფრთხე არ ემუქრება. მაშინ ფინანსურად არ გვქონდა ამდენი შესაძლებლობა, მაგრამ არც ინფორმაციის მოწოდების ამხელა ბუმი იყო იმის შესახებ, ვინ რას იღებდა და რას იკეთებდა. ჩვენს სპორტსმენებს უცხოელებისგან ამდენი ინფორმაცია არ ჰქონდათ, თუმცა ჩვენც ყველაფერს ვაკეთებდით. შედეგად, იმდენად მოწესრიგებული გვქონდა ყველაფერი, არაფრის შიში არა მაქვს.
თან, კიდევ ვიმეორებთ, რომ ფინანსურად ამხელა შესაძლებლობები არ გვქონდა, რასაც ახლა ვხარჯავთ საკვებ დანამატებზე. დღეს მართლაც ბუმია ამ დანამატებისა და მასთან ბრძოლა ძნელია, რადგან ბევრი უცხოეთიდან იწერს. თავის სახელზე გამოწერას თუ დაუშლი, მეგობრის, ახლობლის სახელზე გამოიწერს. ამას მაშინ ეშველება, როცა ადამიანებს სწორად მივცემთ ინფორმაციას და არა ბუმის მიხედვით, ან ქსეროქსზე გადაღებულ სიას, კახაბრიშვილმა რა მისცა ტალახაძეს, შავდათუაშვილს ან სხვას. შეიძლება, ის იმას მოერგო, მაგრამ შენ სხვა რაღაც გჭირდება. ვიდრე გამოკვლევის დონეზე არ იქნება, მანამ ყოველთვის წავაწყდებით ამ პრობლემას.
თუმცა, დღეს ამ ბიზნესს სერიოზულად ეპატრონება რამდენიმე ჯგუფი, რათა ეს ყველაფერი ორგანიზებულად, მარკეტინგულ დონეზე შემოიტანოს. თან ყველაფერს აუცილებლად მოჰყვება სერტიფიკატი.
განსაკუთრებით მეშინია რეგიონების და ახალგაზრდა სპორტსმენების, რომლებსაც უნდათ, რაც შეიძლება, მალე მოხვდნენ ნაკრებში და მიაღწიონ შედეგებს. თან იქ ეს პროცესი კიდევ უფრო გაუკონტროლებელია. ასევე მინდა ვთხოვო დამწყებ მწვრთნელებს, რომლებმაც ეს-ესაა დაიწყეს მწვრთნელობა - ხომ ტარდება დოპინგის, წონის კლების შესახებ საგანმანათლებლო მუშაობა ყველა შეკრებაზე, ჩემს სტუდენტებთან ერთად წავუკითხავ ლექციებს; ოლიმპიური კომიტეტიც წელიწადში ორჯერ ვატარებთ ანალოგიურ სემინარს, რომელსაც უნდა დაესწრონ.
არადა, მახსენდება ასეთი სემინარი, რომელსაც ასანიძე, გახოკიძე და ძალოსნობის სხვა მწვრთნელები ბოლომდე დაესწრნენ, მაგრამ ჭიდაობიდან ვერავინ მოვიყვანეთ, ჩვენ ვიცით ესო. ექიმების ნახევარიც გამექცა იმავე მიზეზით, მაგრამ სწავლა ყველას სჭირდება. განა ასანიძეზე მეტი იცის ვინმემ? და დაამტკიცა კიდეც ამ კაცმა თავისი შედეგებით.
მინდა, რომ ყველა ფედერაციაში ისეთივე ურთიერთობა იყოს ექიმს, მწვრთნელსა და ფედერაციას შორის, როგორიც ამ ფედერაციაშია, რომ ერთმანეთის მოსმენა იცოდეს ყველამ.
ყოველდღიური სპორტული გაზეთი "ლელო"
