სპორტული წელი 2013: 10 ყველაზე წარმატებული

სერენა უილიამსი (ჩოგბურთი)
უმცროსმა უილიამსმა წელს WTA-ს 11 ტიტული მოიგო, გაიმარჯვა “დიდი სლემის” ორ ჩემპიონატში - როლან გაროსსა და აშშ-ის ღიაზე და მთავარი პრიზი აიღო წლის შემაჯამებელ ტურნირზე. მან მოიგო 78 მატჩი და სულ ოთხ შეხვედრაში დატოვა კორტი დამარცხებულმა. პირველად 2009 წლის შემდეგ, უმცროსმა უილიამსმა პირველი ჩოგანის რანგში დაასრულა სეზონი. ამან ამერიკელს მორიგი ფინანსური წარმატებაც მოუტანა - მის მიერ კორტზე გამომუშავებული 12 მილიონი ყველა დროის ახალი რეკორდია ქალთა ჩოგბურთში სეზონში მოპოვებული ჰონორარის ოდენობით.

შელი-ენ ფრეზერ-პრაისი (მძლეოსნობა)
მსოფლიოს ჩემპიონატზე ფრეიზერ-პრაისი არანაკლებ წარმატებული იყო, ვიდრე მისი თანამემამულე უსაინ ბოლტი - მან ასევე მოიგო სამი ოქრო 100 და 200 მეტრ დისტანციებზე და 4x100 მეტრზე ესტაფეტაში. და ბოლტთან ერთად, ის გახდა 2013 წლის საუკეთესო მძლეოსანი.

მისი ფრანკლინი (ცურვა)
ბარსელონაში გამართულ მსოფლიოს ჩემპიონატზე 18 წლის ამერიკელმა “რაკეტამ” ქალთა ცურვის ისტორია გადაწერა, როცა ერთ ტურნირზე ექვსი ოქროს მედალი მოიპოვა - 100 და 200 მეტრზე გულაღმა ცურვაში, 200 მეტრზე თავისუფალი სტილით ცურვაში და აგრეთვე, სამ ესტაფეტაში. მას შემთხვევით არ უწოდებენ “ფელპსს კაბაში”. ან შეიძლება უფრო მეტიცაა. ოთხი ოქრო 2012 წელს ლონდონის ოლიმპიადაზე - ეს მხოლოდ დასაწყისია.

რუტა მეილუტიტე (ცურვა)
მთელი წლის განმავლობაში, 16 წლის ოლიმპიურმა ჩემპიონმა ლიტვიდან უამრავი გამარჯვება მოიპოვა და მსოფლიოს რეკორდები დაამყარა. მას შესანიშნავი დუელი ჰქონდა რუს იულია ეფიმოვასთან და ამ დაპირისპირებაში საბოლოოდ გამარჯვებული გამოვიდა.

ტურა ბერგერი (ბიატლონი)
ბიატლონის მთელი სეზონი სწორედ ამ სპორტსმენის წარმატებების ფონზე წარიმართა. ბერგერი დომინირებდა როგორც მსოფლიოს თასზე, ასევე მსოფლიოს ჩემპიონატზე. პლანეტის პირველობაზე ტურას მონაგარი იყო ოთხი ოქრო და ორი ვერცხლი. ბუნებრივია, ის სოჭის ოლიმპიადის მთავარი ფავორიტი იქნება.

მარიტ ბიორგენი (თხილამურებით რბოლა)
მსოფლიოსა და ოლიმპიური თამაშების მრავალგზის ჩემპიონმა, მსოფლიოს თასზე გამარჯვებების რაოდენობით მსოფლიოს რეკორდსმენმა ისევ დაამტკიცა თავისი მაღალი კლასი, როცა იტალიის ვალ დ’იზერში გამართულ მსოფლიოს ჩემპიონატზე ოთხი გამარჯვება მოიპოვა. ახლა სკანდინავიელისგან სოჭში ელოდებიან ტრიუმფს, თუმცა პოლონელი იუსტინა კოვალჩიკის სახით სერიოზული კონკურენტი ეყოლება.

იუ ნა კიმი (ფიგურული სრიალი)
ჩრდილოკორეელი მოციგურავისთვისაც 2013 წელი ძალიან წარმატებული იყო. გარდა იმისა, რომ კიმი მსოფლიოს ჩემპიონი გახდა, ის ჟურნალ “ფორბსის” ვერსიით, ათ ყველაზე მაღალანაზღაურებად ქალ სპორტსმენს შორის მოხვდა.

ლინდსი ვონი (სამთო თხილამურები)
ერთი მხრივ, ეს წელი ამერიკელი სპორტსმენისთვის არც ისე პოზიტიური აღმოჩნდა - მძიმე ტრავმის გამო, რომელიც მან თებერვალში, ავსტრიის შლადმინგში გამართული მსოფლიოს ჩემპიონატის პირველ დღეს მიიღო. ამის გამო ვონს თითქმის მთელი სეზონის გამოტოვება მოუწია.

მიუხედავად ამისა, მან უკვე მოასწრო სრულად გამოჯანმრთელება და ემზადება სოჭის ოლიმპიადაზე გამოსასვლელად. ეს უკვე წარმატებაა. გარდა ამისა, წელს ამერიკელმა რომანი გააბა ლეგენდარულ გოლფისტთან, ტაიგერ ვუდსთან. ეს კი იმიჯის მხრივ არის სერიოზული წარმატება.

იანა კუდრიავცევა (მხატვრული ტანვარჯიში)
წელს რუსი სპორტსმენი მსოფლიოს აბსოლუტური ჩემპიონი გახდა, სულ კი პლანეტის პირველობაზე ხუთი მედალი (სამი ოქრო და ორი ვერცხლი) აიღო. უკრაინის დედაქალაქში კუდრიავცევა გახდა მხატვრული ტანვარჯიშის ისტორიაში ყველაზე ახალგაზრდა აბსოლუტური ჩემპიონი. პლანეტის პირველობის დებიუტანტმა აღიარებას 15 წლის ასაკში მიაღწია. რეკორდი ეკუთვნოდათ ალინა კაბაევასა და ელენა კარპუხინას, რომლებმაც პრესტიჟული ტიტული 16 წლის ასაკში მოიპოვეს.

ვენაში გამართულ ევროპის ჩემპიონატზე იანამ მოიგო სამი ოქრო, მსოფლიოს თასის ფინალში - ერთი ოქრო, ორი ვერცხლი და ერთი ბრინჯაო.

მარია შარაპოვა (ჩოგბურთი)
რუს ჩოგბურთელს არ გამოუვიდა სეზონის ბოლო ნაწილი მხრის ტრავმის გამო. ამ მიზეზით შარაპოვა აგვისტოს შემდეგ არ გასულა კორტზე, მაგრამ მისთვის 2013 წელი მაინც წარმატებული გამოვიდა. მარიამ რამდენიმე დიდი ტურნირი მოიგო, აქტიურ რეკლამას უწევდა ტკბილეულის საკუთარ ბრენდს და გარდა ამისა, ჟურნალმა “ფორბსმა” ის ყველაზე მაღალანაზღაურებად ქალ სპორტსმენად დაასახელა (რუსის შემოსავალმა 29 მილიონ დოლარს მიაღწია, საიდანაც ლომის წილი ეკუთვნის სარეკლამო და სასპონსორო კონტრაქტებიდან შემოსავალს).

ყოველდღიური სპორტული გაზეთი "ლელო"