ბაქოს "დიდი მუზარადი": ბრინჯაოსთვის პაპინაშვილი და ჩხვიმიანი იბრძოლებენ

8 მაისს, აზერბაიჯანის დედაქალაქში დაწყებულ ბაქოს "დიდი მუზარადის" პირველ საშეჯიბრო დღეს საქართველოს ვაჟ ძიუდოისტთა ნაკრებმა ბრინჯაოს მედალი გაინაღდა - 60 კგ-მდე წონით კატეგორიაში მედლისთვის ერთმანეთს ამირან პაპინაშვილი და ლუხუმ ჩხვიმიანი დაუპირისპირდებიან.

ევროპის ჩემპიონი, მსოფლიოს პრიზიორი პაპინაშვილი, რომელმაც ტურნირზე გამოსვლა მეორე წრიდან დაიწყო, უკრაინელ დენის ბილიჩენკოს კი გაუმკლავდა, თუმცა გერმანელ ტობიას ენგლმაიერთან დამარცხდა. სანუგეშოში ამირანმა მასპინძელთა მსოფლიოს პრიზიორ ორხან საფაროვს აჯობა. 

ჩხვიმიანმა ჯერ მონაკოელი იან სიკარდი ჩამოიცილა გზიდან, შემდეგ კი რუსი ალბერტ ოგუზოვი და მონღოლი მსოფლიოს ფინალისტი ამარტუვშინ დაშდავაა. ლუხუმს ფინალისკენ გზა ფრანგმა ვინსენტ ლიმარემ გადაუჭრა.

ტურნირის პირველ საშეჯიბრო დღეს უმედლოდ დაასრულეს გამოსვლა 66 კგ-მდე წონაში ჩვენმა ძიუდოისტებმა მინდია ლილუაშვილმა და ვაჟა მარგველაშვილმა.

მინდიამ პირველივე ორთაბრძოლა დათმო ებრაელ ბარუხ შმაილოვთან, ვაჟამ კი მართალია, ესპანელ დავიდ რამირეს რამოსსა და ფრანგ დავიდ ლაროსეს აჯობა, მაგრამ აზერბაიჯანელ  ევროპისა და მსოფლიოს მედალოსან ნიჯატ შიხალიზადას ვეღარ გაუმკლავდა.

სამწუხაროდ, ვაჟამ ვერც სანუგეშო ტურნირში იხეირა - იქაც მასპინძელთა ძიუდოისტთან, ამჯერად ჰიდაიათ ჰეიდაროვთან წააგო.

ტურნირზე სხვა წონებში მედლები შაბათ-კვირას გათამაშდება.

ასევე იხილეთ:
ბაქოს "დიდი მუზარადი": ქართველები მძიმე ბრძოლების მოლოდინში