რა ხდება გაბალაში "დინამოსთან" მატჩამდე: ზოგ ადგილობრივს გამარჯვების იმედიც არ აქვს

"გაბალამდე" თბილისურმა კლუბმა ანდორული "ენგორდანის" ბარიერი ძალიან მარტივად დაძლია, მეტოქეს ორი მატჩის ჯამში 7:0 აჯობა და შემდეგ ეტაპზე სრულიად დამსახურებულად გავიდა.

მისი მეტოქე კი ტურნირში ამ ეტაპიდან ერთვება და ბოლო ოფიციალური შეხვედრა 19 მაისს, აზერბაიჯანის თასის ფინალში გამართა.

სანამ უშუალოდ მატჩის შესახებ ვისაუბრებ, რამდენიმე სიტყვას ქალაქსა და გარემოზეც ვიტყვი. გაბალა ამ ქვეყანაში საკუთარი ბუნებით გამოირჩევა, მთიანი რეგიონი კურორტად ითვლება.

ხალხი კეთილგანწყობილი და მზრუნველია, თუმცა, გასაკვირია, რომ ბევრმა მათგანმა რუსული ენა არ იცის.

ქალაქში საფეხბურთო განწყობა არ შეიმჩნევა. არსად შეგვხვედრია ბანერი, რომელიც დაგეგმილი მატჩის შესახებ გვაუწყებდა, თუმცა ამ მხრივ, უნდა ვაღიაროთ, არც თბილისი გამოირჩევა ხოლმე.

საზღვრიდან გაბალაში ჩამოსასვლელად დაახლოებით 5 საათი დაგვჭირდა და ამ დროის განმავლობაში ერთსა და იმავე პეიზაჟს ვხედავდით: ხრიოკ ტერიტორიას, სადაც ხეებიც კი ადამიანის სიმაღლეზე უფრო მეტად არ გაზრდილა; ეს მცირე ქალაქი კი ამ ყველაფერთან შედარებით ნამდვილად გამორჩეულად მოგვეჩვენა.

"გაბალას" პატარა და ლამაზი სტადიონი აქვს, "გაბალა სითი სთედიუმი" 4 500 ადამიანს იტევს. ბალახი კი შესანიშნავ მდგომარეობაში იყო და თუ განსაკუთრებით მაღალი ტემპერატურა არ იქნება, წესით, კარგი საფეხბურთო გარემო უნდა შეიქმნას.

აღსანიშნავია, რომ მატჩისწინა პრესკონფერენციაზე აზერბაიჯანელი ჟურნალისტები ფაქტობრივად, არ იყვნენ, ქართული დელეგაცია კი საკმაოდ დიდი კონტინგენტითაა წარმოდგენილი.

"გაბალამ" ბოლო პერიოდში რამდენიმე ახალი მოთამაშე დაიმატა, თუმცა მათგან, ალბათ, მაინც მერაბ გიგაური უნდა გამოვარჩიოთ, რომელიც კლუბს ქუთაისის "ტორპედოდან" 1 თვის წინ შეუერთდა და მომავალ მეტოქეს ყველაზე კარგად იცნობს.

"გაბალაში" ასპარეზობს კიდევ ერთი ქართველი, დავით ვოლკოვი, რომელიც კლუბს 2018 წელს "საბურთალოდან" შეუერთდა, მანამდე კი სწორედ "დინამოს" ღირსებას იცავდა.

აზერბაიჯანული კლუბი გასული სეზონის დასრულების შემდეგ რამდენიმე ლიდერმა დატოვა და კლუბი, ფაქტობრივად, გამორჩეული მოთამაშეების გარეშე დარჩა.

რამდენიმე ადგილობრივმა ჩემთან საუბარში ისიც თქვა, რომ გამარჯვების იმედი არ აქვთ და კარგად მომზადებულ "დინამოსთან" მარცხსაც ელოდებიან.

ქართულ კლუბს რევანში სჭირდება 2015 წელს განცდილი მარცხის გამო. მაშინ "გაბალამ" ორი მატჩის ჯამში 3:2 გაიმარჯვა და არა მარტო შემდეგ რაუნდში გავიდა, არამედ ჯგუფურ ეტაპზეც იასპარეზა.

ფაქტები