ევრო 2016. C ჯგუფი. უკრაინა-ჩრდ. ირლანდია: უგულო და უგოლო უკრაინა [VIDEO]

* ჩრდილოეთ ირლანდიის ნაკრების 64 წლის ფანი გულის შეტევით ტრიბუნაზე გარდაიცვალა.
* გარეთ მაკოლიმ ჩრდილოეთ ირლანდიის ისტორიული, ევროპის ჩემპიონატებზე პირველი გოლი გაიტანა.
* ჩრდილოეთ ირლანდიის ნაკრები უკრაინას მეხუთედ შეხვდა და პირველად მოუგო.
* მატჩი სეტყვის გამო რამდენიმე წუთით შეწყდა.
* ნილ მაკგინი გახდა მე-9 ფეხბურთელი ევრო 2016-ზე, ვინც შეცვლაზე შევიდა და გოლი გაიტანა.

ევროპის მიმდინარე ჩემპიონატზე კიდევ ერთი მოულოდნელი შედეგი დაფიქსირდა: ჩრდილოეთ ირლანდიასთან შეხვედრაში ფავორიტად უკრაინა იყო მიჩნეული, მაგრამ გამარჯვება ბრიტანელებს დარჩათ. აღსანიშნავია, რომ მატჩი საშინელ კლიმატურ პირობებში წარიმართა - თავსხმა წვიმა სეტყვამ შეცვალა, რის გამოც მსაჯს 5 წუთით თამაშის შეწყვეტაც კი მოუხდა.

ბუნებრივია, რომ ასეთ ამინდში ფეხბურთელებს გაუჭირდათ შესაძლებლობების დემონსტრირება და სანახაობრივი თვალსაზრისით, ტურნირზე ერთ-ერთი ყველაზე ცუდი შეხვედრა ვიხილეთ. მოკლედ, მატჩი ბრიტანულ ამინდში ჩატარდა და შესაძლოა, ეს წაეხმარა კიდეც ჩრდილოეთ ირლანდიის გუნდს.

ჩრდილოეთ ირლანდიის ნაკრებმა ფრთხილი სტრატეგია აირჩია და მეტოქეს 4-5-1 სქემა დაუპირისპირა. ბრიტანელებმა პერსონალური მეურვეობა დაუწესეს უკრაინის ნაკრების წამყვან ფეხბურთელებს, თავისუფალი ზონები საგულდაგულოდ გადაკეტეს და კონტრშეტევებზე ცდილობდნენ ხეირის ნახვას. სტატისტიკური მონაცემებიდან ნათლად ჩანს, რომ ტერიტორიულ უპირატესობას უკრაინელები ფლობდნენ, მაგრამ ეს უპირატესობა სათამაშოში ვერაფრით გადაზარდეს.

თვითონ უკრაინა 4-2-3-1 ტაქტიკით გაისარჯა - შეტევის წინა ხაზზე სელეზნიოვი მოქმედებდა, სიღრმიდან კი მას კონოპლიანკა, კოვალენკო და იარმოლენკო ეხმარებოდნენ. საინტერესო და სახიფათო კვარტეტია, მაგრამ ამ კონკრეტულ შეხვედრაში, პრაქტიკულად, არაფერი გამოუვიდათ. უკრაინელთა მწვრთნელმა ცვლილებებით სცადა თამაშის გადარჩენა და შეტევა გააძლიერა, მაგრამ წახდენილ საქმეს აღარაფერი ეშველა.

0:1 - მეორე ტაიმი ახალი დაწყებული იყო, როდესაც ჩრდილოირლანდიელებმა ჯარიმის შესრულების უფლება მოიპოვეს, საჯარიმოში ბურთის ჩაკიდვას კი გარეთ მაკოლის ზუსტი თავური მოჰყვა. გოლი წმინდა ბრიტანულ სტილში გავიდა და საკმაოდ ეფექტური გამოვიდა.

0:2 - უკვე არაერთ შეხვედრაში მოხდა, როდესაც ანგარიშის გასათანაბრებლად დიდი ძალებით წინ წასულმა გუნდმა კონტრშეტევა მიიღო და ბოლო წუთებზე მეორე გოლი გაუშვა. ასე მოუვიდა ბელგიას, ავსტრიას და აგერ, უკრაინასაც. მსაჯის მიერ კომპენსირებული მეექვსე წუთი მიმდინარეობდა, როდესაც ნილ მაკგინი მეკარის მიერ მოგერიებულ ბურთს დაუხვდა და კარში შეაგდო.


მიხაილ ფომენკო (უკრაინა): "ბურთს, ძირითადად, ჩვენ ვფლობდით და ძალიან გვსურდა სამი ქულის მოპოვება, მაგრამ სამწუხაროდ, დავმარცხდით. წარუმატებლობას ბევრი მიზეზი აქვს, მთავარი კი ის გახლავთ, რომ ერთი მხრივ, დავაკელით მონდომება და მეორე მხრივ, გუნდურ თამაშში გვქონდა პრობლემები. მარცხი ჩვენი ბრალია, ჩრდილოეთ ირლანდიამ კი ითამაშა ის ფეხბურთი, რასაც ველოდით. ბრიტანელებმა შესარჩევ ეტაპზე 16 გოლი შეაგდეს და აქედან 9 სტანდარტულს მოჰყვა. აქაც გოლი ჯარიმიდან გაგვიტანეს, ჩვენ კი თავი ვერ დავიცავით".

ჩრდილოეთ ირლანდიამ გუნდური თამაშით სძლია მეტოქეს და ერთი კონკრეტული ფეხბურთელის გამორჩევა არაა იოლი საქმე. თუმცა, გარეთ მაკოლის გამორჩევა მაინც შეიძლება, რომელიც დაცვის ცენტრში თამაშობდა და უშუალო მოვალეობას თავი იდეალურად გაართვა. მაკოლიმ არაერთხელ გამოიტანა ბურთი სახიფათო ზონიდან და ყველა საჰაერო ორთაბრძოლა მოიგო. ერთ-ერთ ასეთ ორთაბრძოლას უკრაინელთა კარში გოლი მოჰყვა და შესაბამისად, ეს ფეხბურთელი იმსახურებს საუკეთესოდ აღიარებას.

მატჩს ჩეხი არბიტრების ბრიგადა ემსახურებოდა, მთავარი მსაჯი კი პაველ კრალოვეცი გახლდათ. რთული მისია დაეკისრა, რადგან თითქმის მთელი თამაში თავსხმა წვიმაში წარიმართა, ერთი ხანობა კი სწორედ მისი გადაწყვეტილებით, თამაში შეჩერებული იყო. მთლიანობაში, არბიტრმა კარგად გაართვა დაკისრებულ მოვალეობას თავი და მისი მისამართით სასაყვედურო და მოსადავებელი ნამდვილად არაფერია...

ჩრდილოირლანდიელებმა წმინდა ბრიტანული ფეხბურთი ითამაშეს და გოლიც შესაბამისი გაიტანეს. იბრძოდნენ მოედნის ნებისმიერ მონაკვეთზე და ერჩივნათ, რომ ბურთი მუდამ ჰაერში ყოფილიყო. უფრო კარგად აუღეს ალღო წვიმიან ამინდს და ამაში გასაკვირი არაფერია. იარმოლენკოს და კონოპლიანკას სველ მინდორზე უჭირდათ ტექნიკური არსენალის დემონსტრირება, საჰაერო ორთაბრძოლები კი მათი ძლიერი მხარე არაა.

თუმცა, კლიმატური პირობებით უკრაინელთა გამართლება არაფრით არ შეიძლება. მიხაილ ფომენკომ და მისმა შეგირდებმა აშკარად გააწბილეს გულშემატკივარი. თუ გერმანიასთან მარცხი საპატიო იყო, ჩრდილოეთ ირლანდიასთან უქულოდ დარჩენას არავინ ელოდა. უკრაინელები უტევდნენ სწორხაზოვნად და შესაბამისად, მათ იერიშებს ირლანდიელები იოლად უმკლავდებოდნენ. რაც ყველაზე უცნაურია, უკრაინელებს თითქოს, აკლდათ ბრძოლისუნარიანობა და ის თავდადება, რაც ასეთი რანგის ტურნირებზე წარმატების მისაღწევად, უბრალოდ, აუცილებელია.

ვის-ვის და, უკრაინელ ფეხბურთელებს დღეს საკმარისზე მეტი საბაბი აქვთ იმისთვის, რომ მოედანზე თავი დადონ და სისხლის ბოლო წვეთამდე იბრძოლონ. ფომენკოს შეგირდების თამაშში ეს თავდადება არ ჩანდა - რაღაც ძალიან იოლად წააგეს უკრაინელებმა მეორე მატჩიც და დიდი ნაბიჯი გადადგეს ჯგუფში ჩასარჩენად.

როგორც ერთ-ერთმა ყველაზე მსხვილმა უკრაინულმა პორტალმა, football.ua-მ აღნიშნა, უკრაინამ ჩრდილოეთ ირლანდიასთან უგულო თამაშით, პრაქტიკულად, უბრძოლველად წააგო. მართლაც ასეა - მოიგო იმან, ვისაც უფრო მეტად უნდოდა მოგება. მოიგო ჩრდილოეთ ირლანდიამ, რომელიც გერმანიასთან ჭიდილში შეეცდება მერვედფინალში გასვლას...

გარეთ მაკოლი ჩ. ირ. 8,3
მაიკლ მაკგოვერნი ჩ. ირ. 7,7
ოლივერ ნორვუდი ჩ. ირ. 7,6
ჯონი ევანსი ჩ. ირ. 7,5
ნილ მაკგინი ჩ. ირ. 7,2

16 ივნისი. ლიონი. "სტად დე ლიონი"
უკრაინა-ჩრდ. ირლანდია 0:2
გოლები: 0:1 მაკოლი (49. ნორვუდი), 0:2 მაკგინი (96)
უკრაინა (4-2-3-1): პიატოვი - ფედეცკი, ხაჩერიდი, რაკიცკი, შევჩუკი - სტეპანენკო, სიდორჩუკი (76. გარმაში) - კონოპლიანკა, კოვალენკო (83. ზინჩენკო), იარმოლენკო - სელეზნიოვი (72. ზოზულია)
ჩრდ. ირლანდია (4-5-1): მაკგოვერნი - ჰაგესი, კეტკარტი, მაკოლი, ჯ. ევანსი - უორდი (69. მაკგინი), კ. ევანსი (90. მაკნეირი), დევისი, ნორვუდი, დალასი - ვაშინგტონი (84. მაგენისი)
გაფრთხილება: სიდორჩუკი, სელეზნიოვი - ჯ. ევანსი, დალასი, ვარდი
კუთხური: 2-3; ჯარიმა: 14-14; თამაშგარე: 3-1; კარში დარტყმა: 13-11 (5-7); ბურთის ფლობა: 65%-35%.
მაყურებელი: 51 043

ყოველდღიური სპორტული გაზეთი "ლელო"