ეროვნული ლიგა 2. VIII ტური:"ვიტ ჯორჯიამ" ისევ იმარჯვა, ბათუმის "დინამო" ისევ დამარცხდა

დღეს, ეროვნული ლიგის მე-8 ტურში კიდევ 3 მატჩი გაიმართა და უნდა ითქვას, ყველა დაძაბულად და საინტერესოდ წარიმართა. ისიც აღსანიშნავია, რომ სატურნირო ცხრილის ქვედა ნაწილში მყოფი გუნდები მედგარ წინააღმდეგობას უწევენ ლიდერებს.

"სამგურალი" გასვლაზე, მცხეთაში კარგა ხანს გაუძალიანდა პირველადგილოსან "ვიტ ჯორჯიას" და მხოლოდ 81-ე წუთზე მოახერხა მცველმა გიორგი გეთიაშვილმა გამარჯვების მომტანი გოლის გატანა. ხაზგასასმელია, რომ პირველ ტაიმში მასპინძელთა გუნდის ფეხბურთელმა გიორგი ვეკუამ პენალტი ვერ გამოიყენა.

თელავში ადგილობრივი გუნდისა და "ნორჩი დინამოს" შეხვედრა 1:2 დასრულდა. ანგარიში 34-ე წუთზე მასპინძელთა თავდამსხმელმა გიორგი ნიქაბაძემ გახსნა (ეს პირველობაზე მისი მე-4 გოლია), შესვენების შემდეგ კი სტუმართა ფორვარდმა,  ეროვნული ლიგა 2-ის საუკეთესო ბომბარდირმა იაგო დეისაძემ საპასუხო გოლი გაუტანა მასპინძლებს (მის ანგარიშზე 6 გოლია). მე-80 წუთზე დეისაძის პასით გიორგი ჟვანიამ გამარჯვება სტუმრებს მოუტანა.

ტექნიკურ ცენტრ "ბასაზე" "გაგრამ" 2:0 მოუგო ბათუმის "დინამოს", რომელიც სეზონის დაწყების წინ ჩემპიონატის ფავორიტად მიიჩნეოდა, მაგრამ ზედიზედ 4 მოგების შემდეგ "ცხინვალთან" წააგო. ამჯერად კი გია გეგუჩაძის შეგირდებს "გაგრამ" სძლია. პირველი გოლი "გაგრას" ლიდერმა რატი ცაცკრიალაშვილმა გაიტანა, ხოლო მეორე - თორნიკე გაფრინდაშვილმა. აღსანიშნავია, რომ მე-11 წუთზე "დინამოს" ნახევარმცველმა გიორგი ჯანელიძემ თერთმეტმეტრიანი ვერ გამოიყენა.