მატჩის დღე! კვარაცხელია ჩაკვეტაძემ უნდა შეცვალოს?

დავით ხოჭოლავას არყოფნაში, რომელიც მუდმივად სასტარტოს წევრი იყო, დაცვის ხაზი ახალი მოთამაშით უნდა შეივსოს. ჯერ არანაირი საბაბი არ გვაქვს იმისთვის, რომ სანიოლი 3-მცველიან ტაქტიკას შეცვლის.

ვილი სანიოლმა უკვე თქვა, რომ კარს გიორგი ლორია დაიცავს და კაპიტანიც იქნება. აქვს დარწმუნებით ვივარაუდებთ, რომ ნორვეგიელებთან გიორგი მამარდაშვილს ვნახავთ.

დარჩენილი დღეები ბევრს გადაწყვეტს, თუმცა გურამ კაშიასა და საბა კვირკველიას გარეშე ნორვეგიის ნაკრების წინააღმდეგ გამოსვლა რთულად წარმოგვიდგენია. მათ გვერდით თამაშის დაახლოებით თანაბარი შანსები აქვთ ლაშა დვალსა და საბა საზონოვს, ჯიმი ტაბიძეს კი, ალბათ, უფრო ნაკლები. მონღოლეთთან დაპირისპირება ფრანგმა დამრიგებელმა იქნებ ზუსტად იმის გარკვევას დაუთმოს, თუ ვინ იქნება მესამე ცენტრალური მცველი და ამისთვის ეს მატჩი მაქსიმალურად გამოიყენოს. ლორიას კაპიტნობა გვაფიქრებს, რომ კაშია დაისვენებს.




თუკი ცენტრალურ მცველად გამოყენებას არ აპირებენ, ოთარ კაკაბაძე ნორვეგიასთან მარჯვენა ფლანგზე უნდა იყოს მოაზრებული. ის 3-მცველიანი ტაქტიკისას შეტევაში ძალიან აქტიური არ არის, თუმცა, მეტოქიდან გამომდინარე, საჭიროებამ იქნებ ასეც მოიტანოს. აი, რაც შეეხება მონღოლეთის ნაკრებთან მატჩს, აქ გიორგი გოჩოლეიშვილისა და საბა ლობჟანიძისთვის დროის მიცემას ვვარაუდობთ. ერთი თუ "შახტარში" ახლა იწყებს, მეორეს თურქეთში განვითარებული მოვლენების გამო საკმაოდ გაუცდა და სანაკრებო მატჩი ძალიან გამოადგებათ. ლობჟანიძის პრესკონფერენციაზე განოჩენა გვაფიქრებს, რომ ის პირველივე წუთებიდან ითამაშებს. იქნებ სანიოლი რომელიმე მათგანის ნორვეგიელთა წინააღმდეგ დაყრდნობაზეც დაფიქრდეს.

რაც შეეხება მარცხენა ფლანგს, ჩვენი ნაკრების მთავარმა მწვრთნელმა აქ არსებულ პრობლემებზე ისაუბრა, რაც უთამაშებლობას გულისხმობს. აქედან გამომდინარე, ირაკლი აზაროვისთვის დიდი დროის მიცემა და მასზე დაკვირვება ძალიან ლოგიკური გადაწვეტილება იქნება.


სანიოლის თქმით, ლუკა გაგნიძე ახლა ნამდვილად მზადაა, ეროვნულ ნაკრებში ითამაშოს. მის ამ სიტყვებს დამტკიცება სჭირდება და ფრანგს ამაზე უკეთესი საშუალება ნაკლებად ექნება, მოსკოვის "დინამოს" შუახაზელს სასტარტოში ველით. მაინც ვივარაუდოთ, რომ ის გიორგი აბურჯანიას შეუწყვილდება (ვიცე-კაპიტანი კვეკვესკირს სათადარიგო იქნება). ვილიმ 17 წლის გაბრიელ სიგუა ძალიან შეაქო და არ გამოვრიცხავთ, დრო მასაც მიეცეს.



"ერთა ლიგის" ახალი ფორმატის გამო ამხანაგური მატჩები იშვიათადაა. ბოლოს, მაროკოსთან როცა ვითამაშეთ, ხვიჩა კვარაცხელია გუნდს ტრავმის გამო აკლდა. ზუსტად ერთი წლის წინ, ალბანეთთან დაპირისპირებაში, "კვარა", როგორც შემდეგ გაირკვა, საპატიო მიზეზით არ ყოფილა, ნეაპოლში ჩაფრინდა და მომავალ გუნდთან დაკავშირებით მოლაპარაკებები ჰქონდა. ხვიჩას ახლა ძალიან დატვირთული (და წარმატებული) სეზონი აქვს, წინ შესარჩევი ეტაპის მატჩია, ტრავმის რისკიც სულ არსებობს და მაინც გვგონია, სანიოლი მას სათადარიგოთა სკამზე დასვამს და მეორე ტაიმში დროს აუცილებლად მისცემს, თუნდაც დასკვნით 20 წუთს. ხვიჩას არყოფნაში მის პოზიციაზე გიორგი ჩაკვეტაძე უნდა ვიხილოთ. ის ბოლო დროს ბევრს თამაშობს, ტრავმები აღარ აწუხებს და ძალიან გვინდა, ნაკრებში ძველი დრო გაიხსენოს.